Read mbula bwazza Amǝ Mishan 9 Bible Online

Amǝ Mishan 9 - mbula bwazza bible

Amǝ Mishan 9

¹Aɓa mǝno anggo ka, Sawul na arǝ lidǝmbǝa nǝ nabura arǝ amǝkpata Mǝtalabangŋo, kǝ earce ama nǝ̀ wal-luia. Wario aban Pǝris Mǝgule,

²kya zǝmbǝi wi ɓǝ̀ pe wi acautera aban ká aban aɓwana-mǝgule mala andakpapi mala amǝ Yahudi, mana a nggeala Damaska ka. Pa anggo ace mǝnana ɓǝa eari wi, ɓǝ̀ wario sǝ kum koya ɓwa, mana kǝ kwaɗi Njar mala Mǝtalabangŋo[60], ko aburana ko amamǝna ka, nǝ̀ bwalkia, nǝ̀ tākia abuia nǝ̀ um nǝia a Urǝshalima.

³Lang Sawul mala nǝ̀ bwal Damaska ka, kara nggea tǎlaban pur nǝ kuli yi ta, kàrǝì aɓalǝu.

⁴Sawul puro kpa a nzali, pǝlǝa ok giu ne wi ama, “Sawul, Sawul, ace mana sǝ a kǝ pam tanni?”

⁵Sǝ Sawul ɗiban ama, “A nda yana le, ɓwamǝgule?” Giu eari wi ama, “Mǝ nda Yesu mǝnana a pākiyi wi tanni ka.

⁶Sǝ ado ka lo, kutio a nggeala, à nǝ̀ ngga banggo gir mǝnana a wu nǝ pak ka.”

⁷Aɓi amǝgya mala Sawul ka, à go gǝs, nacau pà kàm ɗang. À ok gi ɓwa na cau, sǝ à sǝn kǝɓwa ɗang.

⁸Sawul loapi nzali, lang mǝn mǝsǝì ka, ko kǝ sǝn ban ɗang. Pǝlǝa à bwali wi gara à kuti nǝi a Damaska.

⁹Nongŋo tārú sǝnban ɗang, lili ɗang, sǝ nu kǝgir gbal ɗang.

¹⁰Ɓe mǝkwaɗi nakam a Damaska lullǝi ama Hananiya. Mǝtalabangŋo tunǝi a lorǝo ama, “Hananiya!” Pǝlǝa eare ama, “Mǝ ndya ka, Mǝtalabangŋo.”

¹¹Pǝlǝa Mǝtalabangŋo ne wi ama, “Kyane a nreɓala mǝnana à tunǝki ama Pǝrapǝra ka, ɗice ɓeɓwa Tarsus nakam a ɓala mala Yahuda, lullǝi ama Sawul. Ndaban pak hiwi.

¹²Ən lǝmndǝni wi, aɓa sǝnsǝna ɓeɓwa lullǝi ama Hananiya yiu, yi tsǝk abui amuri ace mǝnana ɓǝ̀ sǝnban ɗǝm ngga.”

¹³Sǝ Hananiya eare ama, “Mǝtalabangŋo, ǝn ongŋǝna cau mala mǝnia yì ɓwa ka a kun aɓwana pas, andǝ gir'murmwana mǝnana lǝmndǝia aɓwana mo mana a Urǝshalima ka.

¹⁴Sǝni ado, yiu male mana akani ka, agbani pǝris nǝ pe wi rǝcandǝa ɓǝ̀ yi bwalki aɓwana kat mana à kǝ̀ peri abano ka.”

¹⁵Mǝtalabangŋo ne Hananiya ama, “Kyane, mǝnia yì ɓwa ka, ǝn tarì girturo mem na, ɓǝ̀ kyan nǝ lullǝam aban aɓwana arǝ anzali, andǝ amurǝma, andǝ ban amǝ Isǝrayila.

¹⁶Mǝ nǝ lǝmndǝì wi agir mǝnana nǝ̀ tanni a rǝia kat ace lullǝam ngga.”

¹⁷Pǝlǝa Hananiya lo kya kutio a ɓala mǝnana Sawul ndakam ngga. Tsǝk bui amur Sawul, sǝ na ama, “Mǝ'eamrǝarǝu Sawul, Mǝtalabangŋo Yesu mana pusǝrǝi abano amur njargula mǝnana a yiu nǝi ka, turam ace mǝnana wu kum sǝnban ɗǝm, sǝ wu lumsǝ nǝ Bangŋo Mǝfele.”

¹⁸Kara anggo ka, ɓe kǝgir kǝla anggwato nji puro aɓalǝ amǝsǝ Sawul à kpa, kara kǝ sǝnban ɗǝm. Pǝlǝa lo, à pakki wi batisǝma.

¹⁹Anzǝm man ngga, ak girlina li, nda sǝ kumǝna rǝcandǝa ka. Sawul pakki anonggeo bǝti ata amǝkwaɗi a Damaska.

²⁰Anggo kara tita hamnǝ cau amur Yesu arǝ andakpapi ama, “Ɓafo, Yesu ka muna mala Ɓakuli na!”

²¹Aɓwana mǝnana kat à kwaki kiria a rǝì ka à ndali, gandǝa à ɗiban ama, “Mǝnia yì ɓwa ka, nda mana mbak kǝ lǝmndǝì amǝkpata Yesu gir'murmwana a Urǝshalima ka? Sǝ nggearǝ yiu male akani ka, pa ace mǝnana nǝ̀ yia bwalkia nǝ̀ um nǝia aban agbani pǝris a Urǝshalima ka re?”

²²Hama mala Sawul ka dum nǝ rǝcandǝa, yale amǝ Yahudi mǝnana a Damaska ka, à gandǝ makgir mǝsǝcau mǝnana lǝmndǝia wia ama Yesu ka nda Kǝrǝsti Mǝ'amsǝban ngga ɗang.

²³Anzǝm anonggeo pas ka, amǝ Yahudi kurkun a rǝia ama à nǝ̀ wal lú Sawul.[61]

²⁴À camarǝ yal kunɓala mala nggeala du andǝ pwari, ace mǝnana à nǝ̀ wal-lui ka. Pǝlǝa ce kpa kir Sawul.

²⁵Nǝ du, alaggana male twali aɓa go, à sulǝi nǝ nza, a ferang arǝ sheran mana kàrǝì nggeala ka.

²⁶Lang Sawul yina a Urǝshalima ka, ɓariki ama nǝ̀ kutio aɓalǝ amǝkwaɗi. Sǝ yia ka à ɓanggi wi, acemǝnana à ear ama yì ka, mǝkwaɗi mǝ'mǝsǝcau nì na ɗang.

²⁷Pǝlǝa Barnabas wari nǝi aban amǝ'mishan, kya bǝlia wia sǝna mǝnana Sawul sǝn Mǝtalabangŋo Yesu amur njargula, andǝ cau mǝnana Mǝtalabangŋo banggi Sawul ka. Ɗǝm ngga banggia wia ce hamnǝ Cau Amsǝban mǝnana Sawul hamnǝi a Damaska nǝ rǝcandǝa aɓa lullǝ Yesu ka.

²⁸Sawul adyan ngga do ata amǝ'mishan, makrǝi aɓalǝia a Urǝshalima, kǝ hamnǝ Cau Amsǝban nǝ mǝsǝkang-kangŋa aɓa lullǝ Mǝtalabangŋo.

²⁹Sǝ ɗǝm ngga kǝ na cau nǝ amǝ Yahudi mǝnana à kǝ na kun Gǝrik ka, à camarǝ makgir andǝia kǝrkǝr. Sǝa ma à kutia alte ama à nǝ̀ wal-lui.

³⁰Lang ce nǝ̀ kpa kir amǝ'eamrǝarǝu ka, kara à ɓang nǝ Sawul à um nǝi a Kaisariya, à kya tasǝ te aban ká Tarsus, a la malea.

³¹Anggo sǝ ikǝlisiya aɓa nzali Yahudi kat, andǝ Galili andǝ Samariya ka, dum nǝ rǝpwala. Nǝ́ pa gbasha mala Bangŋo Mǝfele, amǝkwaɗi kum rǝcandǝa, sǝ à kǝ lakki, à do nǝ ɓanggi Mǝtalabangŋo.

³²Aɓa gya mala Bitǝrus arǝ ala ɗàngɗáng aban sǝn ta amǝkwaɗi ka, wario aban aɓwana mala Ɓakuli mǝnana nǝ do Lida ka.

³³Akano ka kya kum ɓeɓwa lullǝi ama Eniyas, gbakǝre na kǝ dǝurǝ rǝì ɗang. Twalna apǝlǝa tongno-nong-tārú nda aban nongŋo a kala.

³⁴Bitǝrus ne wi ama, “Eniyas, Yesu Kǝrǝsti twalǝno ban kwano mo. Lo, kar kalnongŋo mo.” Anggo kara Eniyas lo.

³⁵Aɓwana mǝnana kat a Lida andǝa mǝnana a Sharon ngga, à sǝn Eniyas pǝlǝa à paɓamuria aban Mǝtalabangŋo Yesu.

³⁶Aɓa nggeala Jopa ka, ɓe ɓwama nakam, mǝkwaɗi na, lullǝi ama Tabita. (Lullǝi nǝ kun Gǝrik ka nda Dokas, ɓālǝi nda: mbamba). Yì ka, aulǝ a pakkiyi aɓwana gir mǝɓoarne ɗang, kǝ bwali amǝtǝr kam.

³⁷Aɓalǝ amǝno yì anonggeo ka, rǝì pakki wi pak lú. Lang à sussǝna lú ka, pǝlǝa à nongsǝi aɓa ndakuli.

³⁸Lida ka nda aban Jopa tu. Lang amǝkwaɗi o ama Bitǝrus yiu, nda a Lida ka, pǝlǝa à tasǝ aɓwana ɓari, ɓǝa kya zǝmbǝi wi ama ɓǝ̀ ɓangŋa abania a kaurǝa.

³⁹Pǝlǝa Bitǝrus lo o atea. À yiu à yì bwalǝna ka, à kuti nǝi aɓa ndakuli. Aman-lú kat à kàrǝì aɓalǝu à kǝ ɓua, sǝ à kǝ lǝmndǝki wi adaura andǝ acili agir-nggurǝu mǝnana Dokas pakkia wia mana malaká wu raka.

⁴⁰Bitǝrus pusǝia a nza kat, pǝlǝa kūndǝo amur ankuni sǝ pak hiwi. Pǝlǝa pǝlǝ rǝì aban lú, sǝ bangŋa ama, “Tabita, lo!” Sǝ Tabita mǝn amǝsǝì, sǝ lang sǝn Bitǝrus ka, par bui lo dum nǝ do.

⁴¹Bitǝrus bwali a garabui, loasǝi tamsǝi amur akusǝi. Pǝlǝa tunǝ amǝkwaɗi andǝ aman-lú, sǝ pea wia Tabita nǝ yilǝmu.

⁴²Mǝnia yì gir ka ceì aki ɓa Jopa kat, sǝ ɓwapǝndǝa pas pa ɓamuria aban Mǝtalabangŋo.

⁴³Bitǝrus pakki anonggeo a Jopa pas, a ɓala mala ɓe mǝturo bangsǝki anggû mana à kǝ tunǝi ama Shiman ngga.