Read mbula bwazza Amǝ Roma 10 Bible Online

Amǝ Roma 10 - mbula bwazza bible

Amǝ Roma 10

¹Wun amǝ'eambǝam, ɓabumam andǝ zǝmbǝa mem aban Ɓakuli ka, nda ace amǝ Isǝrayila ɓǝa kum auwa.

²Mǝ nda rǝ nakunia aɓa mǝsǝcau ama yia ka à ndanǝ bumpina arǝ kpata Ɓakuli, sǝ bumpina malea ka, pa aɓa sǝlǝe ɗang.

³Acemǝnana yia ka à bwalta njargula mǝnana Ɓakuli akiyina aɓwana nǝi ɓǝa duk amǝ cauɓoarna abani ka ɗang, sǝ ɗǝm ngga à kutia kwakita malea yì njar mala kum akban aban Ɓakuli, nǝ ɓariki malea arǝ bwal Nggurcau. Ace mani ka, à pa ɓamuria arǝ njar mala Ɓakuli mǝnana kǝ pǝlǝna aɓwana nǝi ɓǝa duk amǝ'cauɓoarna ka ɗang.

⁴Kǝrǝsti ka yi malǝna turo mala nê mǝnana Ɓakuli pà Nggurcau ace ka. Ace mǝno ka aɓwana kat mǝnana à earnǝi à paɓamuria abani ka, à nyesǝnia amǝ'cauɓoarna na aban Ɓakuli.

⁵Amur njar mala do mǝ'cauɓoarna aban Ɓakuli, mǝnana à kumnggiyi nǝ bwal Nggurcau ka, Musa gilǝ ama, “Ɓwa mǝnana kat kpata Nggurcau lumsǝ agir mǝnana kat nzongcau male na ka, ɓwe na nǝ̀ kum yilǝmu ka.”[105]

⁶Sǝ ɓwa mǝnana pàɓamuru male aɓa guli arǝ Kǝrǝsti na yinǝi wi kum akban aban Ɓakuli ka, pà nǝ̀ ɗiban a ɗenyicau male ama, “Yana nǝ̀ eau a kuli, ace mǝnana nǝ̀ ngga sulǝ Kǝrǝsti a nzali ka” ɗang?[106]

⁷Pa nǝ̀ ɗiban gbal ama, “Yana nǝ̀ sulǝ a tanzali, ace mǝnana nǝ̀ ngga loasǝ Kǝrǝsti a ɓembe ka” ɗang?[107]

⁸Cau mala Amsǝban mǝnana à nǝ̀ kumi nǝ guli arǝ Kǝrǝsti, mana nda cau mǝnana sǝm nggǝ hamnǝi ka, pa kuko ɗang. Yale Malǝmce mala Ɓakuli ka bangŋa ama: “Ceì ka nda abano tù, nda a mburkuno, sǝ nda a ɓabumo.”[108]

⁹Ɓǝ̀ a wu nǝ na nǝ kuno ama, “Yesu ka Mǝtalabangŋo na,” sǝ a nǝ earnǝi nǝ mǝsǝcau a ɓabumo ama Ɓakuli loasǝi a ɓembe ka, a nǝ kum amsǝban.

¹⁰Acemǝnana nǝ ɓabum sǝ ɓwa nǝ̀ eare nǝ̀ pà ɓamuri aban Kǝrǝsti, sǝ aɓa pě anggo ka Ɓakuli angŋǝni mǝ'cauɓoarna na; sǝ ɗǝm ngga nǝ kûn sǝ ɓwa nǝ̀ bang paɓamuru male aban Kǝrǝsti, sǝ aɓa pě anggo ka kumǝna amsǝban.

¹¹Kǝla mǝnana Malǝmce na ka, “Ɓwa mǝnana kat paɓamuri abani ka, pà nǝ̀ nu kǝsǝkya ɗang.”[109]

¹²Aɓa mǝnia ka kǝgir gakita ɓwa Yahudi andǝ ɓwa mǝnana ɓwa Yahudi na raka ɗang. Yia kat ka, à ndanǝ Mǝtalabangŋo mwashat mǝnana nda Mǝtalabangŋo amur aɓwana kat, sǝ atsǝkbu male mǝnana nyangsang ngga kǝ soapia aɓwana mǝnana kat à kǝ warinǝ ɓua malea abani ka.

¹³Kǝla mǝnana Malǝmce bang ngga: “Ɓwa mǝnana kat kǝ ɓua aban Mǝtalabangŋo kǝ tunǝ lullǝ Mǝtalabangŋo ka, nǝ̀ kum amsǝban.”[110]

¹⁴Sǝa ma lang sǝ à nǝ̀ tunǝi ɓǝ̀ amsǝia, yi mǝnana ɓǝa pa ɓamuria abani raka? Sǝ lang sǝ à nǝ̀ paɓamuria abani, yi mǝnana à malaká ok kǝcau amuri raka? Sǝ lang sǝ à nǝ̀ ok cau amuri, yi mǝnana kǝɓwa hambia wia ce raka?

¹⁵Sǝ lang sǝ aɓwana nǝ̀ hamnǝ cau, yi mǝnana Ɓakuli turia raka? Kǝla mǝnana à gilǝì ka: “Yiu mala aɓwana mǝnana à kǝ hamnǝ Cau Amsǝban ngga gir mǝɓoarne na kǝ̀rkǝ́r!”[111]

¹⁶Sǝa ma aɓwana kat sǝ ak man yì Cau Amsǝban ngga ɗang. Acemǝnana Ishaya, mǝɓangna mala Ɓakuli nǝ ɓamuri ka, bangŋa ama: “Mǝtalabangŋo, ya ɓwa na earnǝ cau mana sǝm hamnǝi ka?”[112]

¹⁷Ace mani ka, paɓamuru ka kǝ yiu aɓa ok cau mala Ɓakuli, yì Cau Amsǝban mala Kǝrǝsti mǝnana à hamnǝi ka.

¹⁸Sǝ ǝn ɗiban nǝma: nggearǝì ka, à ok ce re? E, à ongŋa. Malǝmce ka bang ama: “Cau ka angŋǝna ɓanza kat, acau malea kutikina arǝ aban, kya bwal masǝlǝata ɓanza.”[113]

¹⁹Sǝ ǝn nggǝ ɗiban ɗǝm nǝma: “Nggearǝì ka, amǝ Isǝrayila bwalta ce re? E, à bwalte, acemǝnana a nza mala Musa ka, Ɓakuli bangŋa ama, “Mǝ nǝ tsǝa, wu nǝ̀ pak mɓali arǝ aɓwana mǝnana à karǝ kǝgir raka. Mǝ nǝ tsǝa, bum wun nǝ lullo, arǝ cili anzali mǝnana à surǝ kǝgir raka.”[114]

²⁰Ɗǝm ngga Ishaya na cau nǝ rǝcandǝa ama, “Aɓwana mǝnana à altam raka, à nda à kumam ngga. Ən lǝmndǝ ɓamuram aban aɓwana mǝnana à ɗi cem raka.”[115]

²¹Sǝ amur amǝ Isǝrayila ka, Ɓakuli na ama, “Ən mǝn abuam aɓa pwari kat ace ak amǝnia yì amǝ'mgbikiru andǝ amǝ'murcandǝa” ka.[116]