Read mbula bwazza Amǝ Roma 4 Bible Online

Amǝ Roma 4 - mbula bwazza bible

Amǝ Roma 4

¹Mana ado sǝm nǝ̀ na amur Ibǝrayim, yì kà-aɓwana ma'sǝm aɓa nggūrǝu? Mana gir nì na yi sǝlǝa amur cau mala do mǝ'cauɓoarna aban Ɓakuli?

²Ɓǝa aturo mǝɓoarne male, mǝnana pea ka nda tsǝa sǝ Ɓakuli é mǝ'cauɓoarna na ka, ɓǝ́ ndanǝ kǝgir mǝnana nǝ̀ nggori nǝi ka. Sǝ Ibǝrayim ngga pà nǝ̀ gandǝ nggori aban Ɓakuli ɗang.

³Acemǝnana Malǝmce bangga sǝm ama, “Ibǝrayim ngga earnǝ Ɓakuli, sǝ Ɓakuli é mǝ'cauɓoarna na ace paɓamuru male.”[28]

⁴Ɓǝ̀ ɓwa pak turo sǝ à mbwe ka, ɓoro na à pe wi ka ɗang, tangnakusǝu turo male na kum ngga.

⁵Sǝ Ɓakuli ka kǝ twal ɓwa ɓǝ̀ do mǝ'cauɓoarna na, sǝ pa ace aturo male ɗang, nda ace paɓamuru male aban Ɓakuli, mǝnana twalkiyiban cauɓikea mala amǝ'cauɓikea ka.

⁶Dauda na cau amur mǝnia gbal. Cau male lǝmndǝ ulang tsǝkbu mǝnana nda amur ɓwa mana Ɓakuli nyesǝi mǝ'cauɓoarna na, kat andǝ amani ama pak kǝ turo ace raka. Na ama:

⁷“Tsǝkbu mala Ɓakuli na amur aɓwana mǝnana à twalǝnia wia ban amgbikiru malea, sǝ à esǝkinia wia acauɓikea malea ka.

⁸E, tsǝkbu na amur ɓwa mǝnana acauɓikea male ka Mǝtalabangŋo pà nǝ̀ cia a bumi raka.”[29]

⁹Nggearǝ mǝnia yì tsǝkbu mǝnana Dauda nakiyi ce ka, nda ace amǝ Yahudi nǝmurǝia le ko nda gbal ace aɓwana mǝnana amǝ Yahudi na raka? Sǝm bang ama à gìlǝì aɓa Malǝmce ama, “Ibǝrayim ngga earnǝ Ɓakuli, pà ɓamuri abani, sǝ Ɓakuli é mǝ'cauɓoarna na.”

¹⁰Sǝ lang sǝ Ɓakuli é? Ɓakuli é mǝ'cauɓoarna na anzǝm mǝnana à kasǝni wi ɓate[30] ka le, ko Ɓakuli é anggo sǝ ɓǝa yi kasǝi wi ɓate? Ɓakuli ak Ibǝrayim sǝ à yì kasǝi wi ɓate nǝ nzǝmo!

¹¹Yì kasǝ-ɓatau mǝnana à kasǝi Ibǝrayim ngga nda gir mǝnana lǝmndǝ ama, nǝ́ paɓamuru male aban Ɓakuli ka, Ɓakuli earǝna angŋǝni, ama yì ka, mǝ'cauɓoarna na abani, sǝ à yì kasǝi wi ɓate. Ace mani ka, Ibǝrayim nda tar aɓwana kat mǝnana à pà ɓamuria aban Ɓakuli sǝ Ɓakuli kǝ ea amǝ'cauɓoarna na, kat andǝ amani ama à kasǝia wia ɓatea raka.[31]

¹²Sǝ Ibǝrayim ɗǝm ngga, nda tar aɓwana mǝnana à kasǝia wia ɓatea, yia mǝnana kasǝ-ɓatau na à kasǝia wia nǝmurǝì ka ɗang, yia gbal ka à twalkusǝ ulang paɓamuru mala Ibǝrayim, mǝnana ndanǝi sǝ nǝ nzǝmo à yì kasǝi wi ɓate ka.

¹³Mǝnana Ɓakuli pacau aban Ibǝrayim andǝ amǝkè ama nǝ̀ tsǝkia wia bu sǝ ɓanza kat nǝ̀ duk malea ka, pa acemǝnana Ibǝrayim bwal Nggurcau mala Ɓakuli ka ɗang. Nda acemǝnana yì ka, earnǝ Ɓakuli, guli a rǝì ama nǝ̀ pak gir mǝnana bang ngga. Sǝ ace mǝno ka Ɓakuli é mǝ'cauɓoarna na.[32]

¹⁴Ɓǝ̀ pàcau mala Ɓakuli ka nda ace aɓwana mǝnana à bwal Nggurcau male mana pe Musa ka, lǝmndǝ ama guli a rǝ Ɓakuli ace mǝnana ɓǝ̀ nyesǝ sǝm ɓǝ̀ sǝm duk amǝ'cauɓoarna ka nda ɓà. Sǝ ɗǝm ngga nǝ̀ lǝmndǝ ama guli a rǝì gbal ace kum gir mǝnana pàcau ace ka nda ɓà.[33]

¹⁵Yàl Nggurcau kǝ nun bumlulla mala Ɓakuli amur aɓwana mǝnana à kǝ ɓariki ama à nǝ̀ bwali ka. Sǝ ɓǝ̀ Nggurcau pà kàm raka, yàl Nggurcau gbal ka, pà kàm ɗang!

¹⁶Ace mani ka, nǝ́ guli a rǝ Ɓakuli sǝ ɓwa nǝ̀ kum gir mǝnana Ɓakuli pàcau ace ka. Ɓakuli pe anggo ace mǝnana ɓǝa sǝlǝ ama kàngkàng gir mǝnana pàcau ace ka nǝ̀ ɓwamur aɓwana nǝi, yia aɓwana kat mǝnana amuna mala Ibǝrayim na ka. Mǝno yì ɓwamuru ka pa ace amǝ Yahudi mǝnana à kpakiyi ata Nggurcau ka nǝmurǝia ɗang, nda gbal ace aɓwana mǝnana à earnǝ Ɓakuli, à guli a rǝì kǝla mala Ibǝrayim ngga. Ibǝrayim ngga nda tar sǝm kat.[34]

¹⁷Kǝla mǝnana à gilǝì aɓa Malǝmce ka, Ɓakuli ne wi ama, “Mim ngga ǝn tsǝ́ngŋǝno a dumǝna tarrû amur aɓwana arǝ anzali pas.” Mǝnia ka pa anggo, acemǝnana Ibǝrayim earnǝ Ɓakuli mana kǝ loasǝ alú nǝ yilǝmu sǝ kǝ pusǝ agir mǝbǝshe aban mǝnana kǝgir pà kàm raka.[35]

¹⁸Kat andǝ amani ama kǝgir pà kàm mana nǝ̀ pe Ibǝrayim tsǝkɓalǝu ama nǝ̀ kum muna raka, lidǝmbǝa nǝ tsǝkɓalǝu. Pa eare ama nǝ̀ duk tarrû amur aɓwana arǝ anzali pas, acemǝnana Ɓakuli bangŋǝni wi ama, “Anggo sǝ lakki mala amǝkeo nǝ̀ pa.”[36]

¹⁹Ibǝrayim ngga apǝlǝa male málá à nǝ̀ lumsǝ gbǝman mwashat. Yi sǝni ka ena a nggūrǝi, mǝnana à nǝ̀ twali ama yì ka, lú na. Sǝ ɗǝm ngga yi sǝn mami Saratu ka ena, sǝ gandǝ ɓǝli wi muna ɗang. Kat andǝ amǝno ka, paɓamuru mala Ibǝrayim aban Ɓakuli ka, gatti ɗang.[37]

²⁰Pa eare mala Ibǝrayim nǝ́ gir mǝnana Ɓakuli na ama nǝ̀ pe ka, dǝurǝ ɗang. Aɓa mǝsǝcau ka, paɓamuru male aban Ɓakuli lidǝmbǝa nǝ rǝcandǝa, andǝ gusǝlǝ Ɓakuli.

²¹Yì ka, earǝna nǝi nǝ ɓabumi kat ama Ɓakuli nanǝ rǝcandǝa nǝ̀ lumsǝ gir mǝnana bangŋǝna ama nǝ̀ pè ka.

²²Sǝ ace paɓamuru male yì Ibǝrayim ngga, “Ɓakuli é mǝ'cauɓoarna na.”

²³Cau mǝno à bangŋi ama, “Ɓakuli é mǝ'cauɓoarna na” ka, pa ace Ibǝrayim nǝmurǝì sǝ à gilǝì ɗang.

²⁴Nda gbal ace sǝm sǝ à gilǝì, sǝm mǝnana Ɓakuli nǝ̀ ak sǝm kǝla amǝ'cauɓoarna, acemǝnana sǝm pa ɓamur sǝm abani, yì ɓwa mana loasǝ Yesu Mǝtala sǝm a ɓembe ka.

²⁵À twali à pea aɓwana ɓǝà wal-luí ace acauɓikea ma'sǝm, sǝ à yì loasǝi nǝ yilǝmu ace mǝnana ɓǝà pǝlǝ sǝm ɓǝ̀ sǝm duk amǝ'cauɓoarna aban Ɓakuli.[38] [39]