Read mbula bwazza Amǝ Roma 9 Bible Online

Amǝ Roma 9 - mbula bwazza bible

Amǝ Roma 9

¹Mim ngga mǝsǝcau na ǝn nggǝ na aɓa Kǝrǝsti ka. Giu-ɓabumam mǝnana Bangŋo Mǝfele na ginggiyi nǝi ka, kǝ lǝmndǝam ama kàngkàng nyir na ǝn nakiyi ka ɗang ɓǝn na wun nǝma

²mǝ ndanǝ bumkiɗikea kǝrkǝr andǝ pi mala ɓabum koya pwari

³ace aɓwana mem, amǝ'eambǝam aɓa nggūrǝu ka. Ən earǝna ɓǝa suem, ko ɓǝa gau sǝm sǝnǝa Kǝrǝsti, ɓǝ̀ mǝno ka nǝ̀ kánia ɓǝa kum amsǝban ngga.

⁴Yia ka à ndaka amǝ'kau mala Isǝrayila; Ɓakuli tárìa ɓǝa duk amuna male; Ɓakuli lǝmndǝ gulo male kǝla Ɓakuli abania. Kurcau andǝia, sǝ pea wia Nggurcau male. Pea wia peri mala ɓa-ndàmǝgule andǝ apacau male.

⁵A Ibǝrayim, andǝ Yakupu, andǝ Ishaku ka à ndaka keà mǝnana nǝ bania sǝ tau ɓǝlban aɓa nggūrǝu mala Kǝrǝsti pur ka. Ɓwangsǝban mǝnana málá male pà kàm raka ɓǝa pè Ɓakuli mǝnana nda amur aɓwana kat ka! Amin.

⁶Ado ka mǝ nda rǝ na ama Ɓakuli ka gandǝ lumsǝ pàcau male aban Isǝrayila ɗang le? Awo pa anggo ɗang, acemǝnana aɓwana mǝnana à ɓǝlia a Isǝrayila ka, kat sǝ à nda ka ɓwana mala Ɓakuli ɗang!

⁷Sǝ ɗǝm ngga aɓwana na kat mǝnana tea pur nǝ Ibǝrayim ngga, sǝ à ndaka amuna mala Ɓakuli ka ɗang. Ɓakuli ka bangŋǝni Ibǝrayim ama, “Aɓa Ishaku sǝ amǝkeo mǝnana ǝn po cau acea, ka à nǝ̀ puro.”[93]

⁸Mǝnia ka lǝmndǝ ama amuna mǝnana à ɓǝlia aɓa nggūrǝu a tau mala Ibǝrayim ngga, à nda mǝnana à nda ka muna mala Ɓakuli ka ɗang. Kǝ amuna mǝnana à ɓǝlia ata cau mala kurcau mala Ɓakuli ka, à nda ka mǝnana à surǝia kǝla amǝkau mala Ibǝrayim ngga.

⁹Ani sǝ Ɓakuli bang pàcau male aban Ibǝrayim: “Pǝlǝa mǝnia nǝ̀ yia kar ka, mǝ nǝ nyare, sǝ Saratu nǝ̀ ɓǝl muna-ɓwabura.”[94]

¹⁰Sǝ mǝno na nǝmurǝì ɗang, Rabeka gbal ka ɓǝl amuna-burana ɓari. Sǝ amǝno yì amuna ka tárrìa mwashat, yì kà-sǝm Ishaku.

¹¹Sǝ lang Rabeka málá nǝ̀ gbashi amǝnia yì apasa ka, Ɓakuli ne wi ama, “Muna-dǝmbǝa nǝ̀ do aɓata ɓwamǝkyauwe.”[95] Ɓakuli bang mǝnia ka kaniama à nǝ̀ ɓǝlia, sǝ kaniama à nǝ̀ surǝ mǝɓoarne ko mǝɓane ka. Mǝnia ka lǝmndǝ ama Ɓakuli ka, nda rǝ pak gir mǝnana ɓabumi kànì nǝ̀ pe ka, twal a tite; pa ace ɓe kǝgir mǝnana amuna mǝnia pak ka ɗang, nda ace gir mǝnana Ɓakuli earce sǝ twal ka.

¹³Kǝla mǝnana Malǝmce na ama, “Yakupu ka ǝn earǝna ce, sǝ Isǝwa ka ǝn ɓinǝna mǝsǝì.”[96]

¹⁴Sǝ aman sǝ sǝm nǝ̀ bangŋa amur mǝno? Ɓakuli ka pak mǝɓike le? Awo! Pak mǝɓike ɗang!

¹⁵Acemǝnana Ɓakuli banggi Musa ama, “Mim ngga, mǝ nǝ lǝmndǝ ɓwamuru aban ɓwa mǝnana mǝ nǝ lǝmndǝì wi ɓwamuru ka. Sǝ mǝ nǝ sǝn mǝsǝswatǝr mala ɓwa mǝnana kat mǝ nǝ sǝn mǝsǝswatǝr male ka.”[97]

¹⁶Ace mani ka, Ɓakuli na twalkiyi ɓwa mǝnana nǝ̀ lǝmndǝì wi ɓwamuru ka. Sǝ twalban male ka kǝ kpata gir mǝnana aɓwana earce ko à ɓariki pe ka ɗang.

¹⁷Aɓa Malǝmce ka, Ɓakuli banggi Murǝm mala amǝ Masar ama, “Ən dumsǝo a bunomurǝm, ace lǝmndǝ rǝcandǝa mem a ɓalǝo, sǝ ɓanza kat ɓǝ̀ ok ce lullǝam.”[98]

¹⁸Ace mani ka, Ɓakuli kǝ lǝmndǝ ɓwamuru male amur ko yana eare nǝ̀ lǝmndǝì ɓwamuru ka, sǝ kǝ candǝ mur ɓwa mǝnana eare nǝ̀ candǝ muri ka.

¹⁹Sǝ anggo ka, wun nǝ̀ gandǝ nam ama, “Ɓǝ̀ ko man kat ka nda a bu Ɓakuli sǝ yì na ginggi nǝi ka, ace mana sǝ kǝ sǝn mǝɓane arǝ acauɓikea ma'sǝm piu? Yana ɓwe na ɗe nǝ̀ gandǝ ɓinǝ kane male?”

²⁰Sǝ a nda yana, we ɓwapǝndǝa, yì mǝnana a wu nǝ pǝlǝcau a kun Ɓakuli ka? “Gir mǝnana à pè nǝ́ pa ka, nǝ̀ gandǝ banggi ɓwa mǝnana pè ka ama, ‘Palang sǝ a pem ani’ le?”[99]

²¹Mǝɓaki-ankwaring ngga, pà nǝ́ rǝcandǝa mǝnana nǝ̀ ɓak nkwaring ace turo mǝgule andǝ nkwaring ace ko ya turo nani ka, aɓa ɗuro-dǝɓang mǝ'mwashati re?

²²Anggo gbal, ɓǝ̀ Ɓakuli earce ka, nǝ̀ gandǝ ukki bumlulla male amur aɓwana, sǝ nǝ̀ lǝmndǝ rǝcandǝa male. Sǝa ma yì ka, pak munyi nǝ gandǝrǝu nǝ aɓwana mǝnana ɓoaro ɓǝ̀ lǝmndǝia wia bumlulla ka, yia mǝnana à dupi ká kìɗìkì ka.

²³Pak munyi ace mǝnana ɓǝ̀ lǝmndǝ kume mǝnana ndakam aɓa gulo male ace aɓwana mǝnana ɓwamuria ka, yia amǝnana akdǝmbǝa tàriá ɓǝa kum kāmbe mala ɓoarɓwa male ka.

²⁴Sǝm nda ka mǝno yì aɓwana tàr sǝm ace ɓwamuru ka, sǝm mǝnana tunǝ sǝm aɓalǝ amǝ Yahudi, sǝ aɓalǝ aɓwana mala acili anzali gbal ka.

²⁵Kǝla mǝnana bangŋa aɓa Malǝmce mala Hosiya ama: “Aɓwana mana amem na raka, mǝ nǝ tunǝia ama, ‘Aɓwana mem.’ Aɓwana mǝnana ǝn earcea raka, mǝ nǝ tunǝia ama, ‘Aɓwana mem mǝnana ǝn earkiyi acea raka.’ ”[100]

²⁶Ɗǝm ngga, “Aban mana à banggia wia ɗiɗyal ama, ‘Wun ndaka aɓwana mem raka,’ àkǝ̀ banì sǝ à nǝ̀ tunǝia ama, ‘Amuna mala Ɓakuli mǝyilǝmui.’ ”[101]

²⁷Ishaya ɓua ace amǝ Isǝrayila ama: “Ko ɓǝà na ama lakki mala amǝ Isǝrayila ka nda kǝla sala a kun nggeamur ka, kǝ bǝti aɓalǝia nda à nǝ̀ kum auwa ka.

²⁸Ɓakuli ka nǝ̀ yia sulǝ ɓashi male mǝnana kasǝni ka pupup amur ɓanza. Banì pà nǝ̀ sau ɗang, nǝ̀ yia pe tsuk-tsuk.”[102]

²⁹Kǝla mǝnana Ishaya ak dǝmbǝa bangŋa ama: “Ɓǝ̀ Mǝtalabangŋo mana Kar múr gulo kat nyingma sǝm amǝkau raka, ɓǝ́ sǝm dumǝna kǝla amǝ Sodom, ɓǝ́ sǝm pǝlǝna kǝla amǝ Gomora.”[103]

³⁰Sǝ aman sǝ sǝm bangŋa? Aɓwana mala acili anzali mǝnana à kǝ kpata Nggurcau mala Ɓakuli raka, Ɓakuli nyesǝnia à pǝlǝna amǝ'cauɓoarna abani, ata cau mala guliarǝu malea arǝ Kǝrǝsti.

³¹Sǝ amǝ Isǝrayila, mǝnana à ɓariki kǝrkǝr à nǝ̀ kpata Nggurcau mǝnana ɓǝ́ nǝ̀ kánia aɓa kum do cauɓoarna aban Ɓakuli ka, ko à kumi ɗang.

³²Palang ado sǝ à gandǝ kume ɗang? À gandǝ kume ɗang acemǝnana à kpate aɓa guli arǝ Ɓakuli ɗang, yia ka à guli amur ɓariki malea arǝ agir mǝnana à pea ka. Nda gir mǝnana tsǝa sǝ à annda amur “Tali annda” ka.

³³Kǝla mǝnana à gilǝì aɓa Malǝmce ama: “Sǝni, mǝ ndya ǝn nggǝ tsǝk muna-tali a Siyona, mǝnana nǝ̀ tsǝk aɓwana à nǝ̀ anndǝ́ ka, andǝ nggea-tali mǝnana nǝ̀ cia à nǝ̀ kpa ka. Sǝa ma ɓwa mǝnana é guli a rǝi ka, pà nǝ̀ kum kǝsǝkya ɗang.”[104]