Read mbula bwazza 1 Amǝ Korinti 1 Bible Online

1 Amǝ Korinti 1 - mbula bwazza bible

1 Amǝ Korinti 1

¹Mǝnia yì cautera ka, pur nǝ ban Bulǝs, yì ɓwa mǝnana nǝ kani mala Ɓakuli ka, tunǝi ɓǝ̀ duk mǝturo mishan mala Kǝrǝsti Yesu. Yì Bulǝs andǝ mǝ'eam sǝm Sosǝtins na à kǝ̀ tasǝ mǝnia yì cautera ka.

²À tasǝi aban ká aban ikǝlisiya mala Ɓakuli mana a Korinti, yia aɓwana mǝnana à tària ɓǝa duk aɓwana mala Ɓakuli aɓa Kǝrǝsti Yesu ka. Yia andǝ aɓwana kat arǝ aban kat mǝnana à kǝ tunǝ lullǝ Mǝtalabangŋo Yesu mǝnana nda Mǝtalea andǝ Mǝtala sǝm ngga.[1]

³Ɓǝ̀ Ɓakuli Tar sǝm, andǝ Mǝtalabangŋo Yesu Kǝrǝsti pa wun ɓwamuru andǝ dorǝpwala.

⁴A koya pwari ka, ǝn nggǝ pakki Ɓakuli mem yàwá ace ɓwamuru male mana pa wun nǝ bu Kǝrǝsti Yesu ka.

⁵Aɓa kpapi ma'wun wunǝa Yesu ka, Ɓakuli pa na wun tsǝkbu aɓa koya njari kat, aɓa na cau ma'wun andǝ kum sǝlǝe ma'wun kat,

⁶kǝla mǝnana cau ma'sǝm amur Kǝrǝsti, yi lumsǝna aɓalǝ wun ngga.

⁷Ace mani ka, wu ɗwanyi kum ɓe kǝ ɓoro mala Bangŋo ɗang, aɓa do ma'wun mala kundǝ Mǝtala sǝm Yesu Kǝrǝsti ɓǝ̀ lǝmndǝ rǝì.

⁸Yì ka, nǝ̀ bwala wun nggam, wu nǝ̀ dum nǝ rǝcandǝa ba masǝlǝate, ace mǝnana ɓǝa kǝa kum wun nǝ ɓe kǝ cau arǝ wun a pwari yiu mala Mǝtala sǝm Yesu Kǝrǝsti ɗang.[2]

⁹Ɓakuli mǝnana tunǝ wun aɓa dotarǝu wunǝa Muni Yesu Kǝrǝsti, Mǝtala sǝm ngga, mǝ mǝsǝcau na.[3]

¹⁰Ən nggǝ zǝmbǝa wun, wun amǝ'eambǝam, aɓa lullǝ Mǝtalabangŋo Yesu Kǝrǝsti, wu oaki arǝ wun, sǝ wu kǝa duk do gakitarǝu ɗang; a kun mani ka wu duk mwashat aɓalǝ wun andǝ ɗenyicau ma'wun.

¹¹Wun amǝ'eambǝam, aɓea amǝ ɓala mala Kuliwi bangŋǝnam ama, kúnɓuana na aɓalǝ wun.

¹²Ceì nda mǝnana ama, koyan aɓalǝ wun ngga, kǝ na gir mǝnana nda ɗàng ngga. Ɓe ɓwa ka kǝ na ama, “Mim ngga Bulǝs na ǝn nggǝ kpate ka.” Man kǝ na ama, “Mim ngga Apolo na ǝn nggǝ kpate ka,” Man ngga ama, “Mim ngga Bitǝrus na ǝn nggǝ kpate ka.” Sǝ ɓeɓwa ka kǝ na ama, “Mim ngga Kǝrǝsti na ǝn nggǝ kpate ka.”

¹³Nggearǝì ka, Kǝrǝsti kǝ gau mur aɓwana le? Sǝ Bulǝs ka à gballì a nggun ace wun le? Sǝ à pakka wun batisǝma aɓa lullǝ Bulǝs le?

¹⁴Mim ngga, ǝn pakki Ɓakuli yàwá, acemǝnana ǝn pakki kǝɓwa ata wun batisǝma ɗang. Kǝ Kǝrispus andǝ Gayus na mǝnana ǝn pakkia wia batisǝma ka.

¹⁵Kǝɓwa pà nǝ̀ na, ado ama à pakki wi batisǝma aɓa lullǝam ɗang.

¹⁶E, nyar ɗǝm ngga, ǝn pakki Sǝtifanas andǝ amǝɓala male batisǝma. Sǝ kǝ yia mǝno raka, ɓalǝam kasǝ arǝ kǝɓwa mǝnana ǝn pakki wi batisǝma ɗǝm ngga ɗang.[4]

¹⁷Mim ngga Kǝrǝsti turam ace pakkia batisǝma ɗang. Yì ka, turam ɓǝ̀ ǝn yi hamnǝ Cau Mǝɓoarne mala yilǝmu. Sǝ cau mala Ɓakuli mǝnana ǝn nggǝ hamnǝi ka, pà nǝ sǝlǝ'nacau mala ɓwapǝndǝa ɗang, ace mǝnana ɓǝa kǝa nyesǝ lú mala Kǝrǝsti amur nggun-gangndi ɓà ɗang.[5]

¹⁸Cau mala lú mala Kǝrǝsti amur nggun-gangndi ka, cau mǝɓangge na aban aɓwana mǝnana à kǝ ká kìɗìkì ka. Sǝ sǝm mǝnana Ɓakuli na rǝ amsǝ sǝm ngga, aban sǝm ngga rǝcandǝa mala Ɓakuli na.

¹⁹Malǝmce bangŋa ama, “Mim ngga mǝ nǝ kiɗiki sǝlǝe mala aɓwana mǝnana à twal ɓamuria ama à ndaka amǝ'sǝle ka; sǝ mǝ nǝ tsǝk surǝgir mala amǝ ɓalgir ɓǝ̀ ueɓà.”[6]

²⁰Sǝ ake sǝ amǝ'sǝle pa? Sǝ amǝɓalgir ka à nda ke? Amǝ sǝlǝ makgir amur acau mala ɓanza man ngga à nda ke? Ɓakuli lǝmndǝ ma ama sǝlǝe mala ɓanza ka gǝmi na re?[7]

²¹Ɓakuli aɓa sǝlǝe male ka, tsǝa ɓanza gandǝ surǝì nǝ malea yì sǝlǝe ɗang. Kǝcau mǝnana sǝm hamnǝi, sǝ aɓwana nyesǝi gǝmi na ka, kǝ nda Ɓakuli amsǝna aɓwana mǝnana à pà ɓamuria abani nǝi ka.

²²Amǝ Yahudi ka à na ama, she ɓǝà sǝnǝna agir-ndǝlǝki à pangŋǝnia ka sǝ à nǝ̀ pa ɓamuria, sǝ amǝ Gǝrik ka, à kǝ alte à nǝ̀ sǝni ko cê ka sǝlǝe na a ɓalǝi.

²³Sǝ ma'sǝm ngga, sǝm nggǝ hamnǝ bǝsa Cau Amsǝban mala Kǝrǝsti mǝnana à gballì a nggun-gangndi ka. Mǝnia yì bǝsa cau ka tali annda na aban amǝ Yahudi[8], sǝ cau mǝɓangge na aban aɓwana mala acili anzali.[9]

²⁴Sǝ aban aɓwana mǝnana Ɓakuli tunǝia ka, kǝm amǝ Yahudi andǝ aɓwana mǝnana amǝ Yahudi na raka, mǝnia yì cau yilǝmu ka Kǝrǝsti na, yì mǝnana nda rǝcandǝa andǝ sǝlǝe mala Ɓakuli ka.

²⁵Sǝ gir mǝnana aɓwana sǝni kǝla ɗwanyi sǝlǝe mala Ɓakuli na ka, nda mǝnana kuti sǝlǝe mala ɓwapǝndǝa ka. Sǝ gir mǝnana ɗǝm aɓwana sǝni rǝwukya mala Ɓakuli na ka, nda rǝcandǝa mǝnana kuti mala ɓwapǝndǝa ka.

²⁶Wun amǝ'eambǝam, wu ɗenyi nǝ do ma'wun mǝnana wu duk ɗiɗyal sǝ Ɓakuli yi tunǝ wun ngga. Pas aɓalǝ wun ngga à pànǝ sǝlǝe mala ɓanza ɗang; pas aɓalǝ wun ngga à pànǝ gulo mala ɓanza ɗang; pas amǝ tau-murǝm na ɗang.

²⁷Nǝ́ eare mala Ɓakuli sǝ twal aɓwana mǝnana ɓanza nyesǝia à kwar raka, ace mǝnana ɓǝ̀ pe amǝ'sǝle kǝsǝkya ka. Ɗǝm ngga, yi twal aɓwana mǝnana ɓanza nyesǝia à pànǝ rǝcandǝa raka, ace mǝnana ɓǝ̀ pe amǝ rǝcandǝa kǝsǝkya ka.[10]

²⁸Ɓakuli twal agir mǝnana ɓanza nyesǝia ɓà ka, andǝ agir mǝnana à kǝ ɓǝsǝkia ka, andǝ agir mǝnana à pà kun ɓe kǝgir raka, ace mǝnana ɓǝ̀ nyesǝ agir mǝnana ɓanza twalia nǝ gulo ka ɓà.[11]

²⁹Anggo ka kǝɓwa ɓǝ̀ kǝa nggori a ɓadǝm Ɓakuli ɗang.

³⁰Àkǝ̀ ce gir mǝnana Ɓakuli pe ka sǝ wu kum kpapi wunǝa Kǝrǝsti Yesu, yì mǝnana Ɓakuli tsǝngŋǝni nda sǝlǝe ma'sǝm, sǝ yì nda ɓwa mǝnana gilǝki nre sǝm andǝa Ɓakuli, sǝ tàr sǝm, sǝm duk amale, sǝ yi akmúr sǝm aɓalǝ acauɓikea ma'sǝm ngga.[12]

³¹Ace mani ka, kǝla mǝnana Malǝmce na ka, “Ɓwa mǝnana kat nǝ̀ nggori ka, ɓǝ̀ nggori nǝ Mǝtalabangŋo.”[13]