Read mbula bwazza 1 Amǝ Korinti 10 Bible Online

1 Amǝ Korinti 10 - mbula bwazza bible

1 Amǝ Korinti 10

¹Wun amǝ'eambǝam, ǝn nggǝ earce nǝma ɓǝ̀ wu ɗenyi ama aká sǝm kat ka, à gya aɓata pǝrɓang, sǝ à kuti kat nǝ ɓa Nggeamur Nzuno.[110]

²Kutio mǝno à kutio aɓa pǝrɓang andǝ nggeamur ka, nda kǝla batisǝma na à pakkia wia kat à duk amǝkpata Musa ka.[111]

³Yia kat ka, à li girlina mǝ'mwashati mǝnana Ɓakuli sulǝia wia ka,[112]

⁴sǝ yia kat ka, à nu mur mǝ'mwashati mǝnana Ɓakuli pea wia ka. À nu mur mǝnana Ɓakuli pusǝia wia aɓa tali ka, sǝ mǝno yì Tali ka, nda Kǝrǝsti mǝnana giggiyi atea ka.[113]

⁵Kat andǝ amani ka, Ɓakuli ka bumi pwasǝo arǝ bangulea ɗang; nda sǝ à wukio, sǝ aluia ka à mesǝke arǝ abumban a kpawanban a ɓabondo ka.[114]

⁶Amǝno yia gir mǝnana kumia ka, à dumǝna sǝm agirkani yalung, ace mǝnana ɓǝa nun kir sǝm, ɓǝ̀ sǝm ngga tsǝk ɓabum arǝ agir mǝɓike, kǝla mǝnana yia ka à pak ka ɗang.[115]

⁷Wu kǝa duk amǝ peri aban ankúl, kǝla mǝnana aɓea ɓwana aɓalǝia pak ka ɗang. Kǝla mǝnana Malǝmce bang ngga, “Amǝno yia aɓwana ka, à do aban lili andǝ nuki agir, sǝ à lo aban pakiɗire tāki'anggwam walo-mba mala amǝ ɓanza.”[116]

⁸Ɓǝ̀ sǝm ngga eare, ɓǝ̀ sǝm kutia pakki acauɓikea nongginǝ rǝarǝu, kǝla mǝnana aɓea ɓwana atea pak ka ɗang; nda gir mǝnana tsǝa sǝ aɓa nongŋo mwashat, aɓwana aɓalǝia, á-lumi-ɓari-nong-tārú, à wu kat ka.[117]

⁹Ce sǝm eare, sǝm mwam Kǝrǝsti,[118] kǝla mǝnana aɓea ɓwana atea pa, sǝ an'yau wal-luia ka ɗang.[119]

¹⁰Ɓǝ̀ sǝm ngga nggwani, kǝla mǝnana aɓea aɓwana atea pa, sǝ Mǝturonjar mala lú, yi twaltea ka ɗang.[120]

¹¹Amǝnia yì agir kumia ka, à dumǝna sǝm agirkani, sǝ à gilǝia ace nunkir sǝm, sǝm mǝnana ado masǝlǝata anza yina amur sǝm ngga.

¹²Ace mani ka, ɓǝ̀ a kǝ́ sǝni kǝla a camǝna kàngkàng ngga, tsǝk kiro pepe, ace mǝnana wu kǝa kpa ɗang!

¹³Kǝ karǝkiban pà kàm nǝ̀ kumo mǝnana kǝ kum ɓwapǝndǝa raka. Ɓakuli ka mǝ'ɓwamuru na, pà nǝ̀ eare wu kum karǝkiban mǝnana nǝ̀ kuti rǝcandǝa mo ka ɗang. Sǝ ɓǝ̀ karǝkiban kumo ka, yì ka, nǝ̀ po rǝcandǝa mǝnana a nǝ cambi wi, sǝ nǝ̀ mǝn njargula mana a nǝ puri ɓālǝi ka.[121]

¹⁴Ace mani ka, wun amǝ'eambǝam, wu ɓanggi peri aban ankúl.[122]

¹⁵Cau mǝnia ǝn nggǝ ne ka, mǝ nda arǝ amǝ'dǝmkwara; wu sǝnggi ɓalǝi nǝ ɓamur rǝ wun.

¹⁶Nggearǝ kwap mǝnana sǝm nggǝ nu aban likwar mala Mǝtalabangŋo, sǝm nggǝ pak yàwá ace kǎ, nda tsǝa sǝ sǝm duk mwashat aɓa nkila Kǝrǝsti ka re? Sǝ bǝredi mǝnana sǝm nggǝ ɓwano sǝm nggǝ she a tarǝ sǝm nggǎ, nda tsǝa sǝm duk mwashat aɓa nggurǝ Kǝrǝsti ka re?[123]

¹⁷Sǝ kat andǝ amani ama sǝm nda pas ka, sǝm shak kat aɓa kǝ bǝredi mǝnia mwashat ka; mǝnia ka nda lǝmndǝ ama sǝm nda mwashat aɓa nggūrǝu mǝ'mwashati ka.[124]

¹⁸Wu ɗenyi nǝ amǝ Isǝrayila. Aɓwana mǝnana à kǝ li gir'nkila mǝnana à pànà ɓoro nǝi amur gyangŋan ngga, à ndanǝ kāmbe aɓa turo mana à pakki Ɓakuli amur gyangŋan ngga.[125]

¹⁹Sǝ mana ado ǝn nggǝ earce bangŋa? Mǝ nda aban bangŋa ado ama girlina mǝnana à kǝ ɗarǝna ankúl nǝi ka kǝgir na le? Sǝ nggearǝ ankúl ka, à kǝ́ gir na le?

²⁰Awo! Ɗarǝ agir mala aɓwana mǝnana à kǝ kpata Yesu raka, à kukwar na à pakiyia wia girlina ka, Ɓakuli na ɗang. Sǝ mim ngga, ǝn earce nǝma ɓǝ̀ wu oasǝ bu wun aɓa pakkiagir wunǝ akukwar ɗang.[126]

²¹A pà nǝ nu kwap mala Mǝtalabangŋo sǝ a nǝ ngga nu kwap mala akukwar ɗǝm ɗang; sǝ a pà nǝ li aɓa kwár mala Mǝtalabangŋo sǝ a nǝ ngga li aɓa kwár mala akukwar gbal ɗang.

²²Ko sǝm nggǝ earce loasǝì Mǝtalabangŋo mɓali le? Sǝm nggǝ sǝni ka, sǝm kutì nǝ rǝcandǝa le?[127]

²³Aɓwana kǝ bangŋa ama, “À earǝna sǝm ɓǝ̀ sǝm pak koya gir ka.” Sǝ agir kat, sǝ sǝm nǝ̀ kum ɓoaro malea ɗang. “Koya gir ka, à earǝna sǝm ɓǝ̀ sǝm pe.” Sǝ koya gir na, nǝ̀ ɓak ɓwa ka ɗang.

²⁴Ɓǝ̀ ɓwa ɓǝ̀ kǝa pak gir ace ɓoaro mala ɓamuri ɗang, ɓǝ̀ pe ace ɓoaro mala aɓea ɓwana.

²⁵A nǝ gandǝ li gir mǝnana kat à kǝ me a limo-nyama ka, kǝa na ama a nǝ ɗiban ɗang, ace mǝnana ɓǝ̀ ɓalǝo ɓǝ̀ kǝa kasǝo ɗang.

²⁶“Ɓanza andǝ agir mǝnana a ɓalǝi kat ka, a mala Mǝtalabangŋo na.”[128]

²⁷Ɓǝ̀ ɓwa mǝnana mǝkwaɗi na raka, tunǝo arǝ girlina sǝ a earǝna a warina ka, li gir mǝnana kat à po amǝ wu li ka, kǝa na ama a nǝ ɗiban ɗang, ace ɓalǝo.

²⁸Sǝ ɓǝ̀ ɓeɓwa banggo ama, “Mǝnia yì girlina ka à ɗarǝna agir nǝi” ka, kǝa li mǝno yì girlina ka ɗang. A pa anggo, ace ɓwa mǝnana banggo ka, andǝ ce giu-ɓabum.[129]

²⁹Ən pa aban na ce giu-ɓabumo ɗang, nda ace giu-ɓabum mala mǝno yì ɓwa ka. “Sǝ palang sǝ panzǝban mem nǝ̀ kum ɓashi ace cau mala giu-ɓabum ɓeɓwa le?

³⁰Ɓǝ̀ ǝn pakki Ɓakuli yàwá amur girlina sǝ ǝn kutia li ka, palang sǝ ɓwa nǝ̀ ɓasham amur girlina mǝnana ǝn pak yàwá amuri ka?”

³¹Sǝ ko ɓǝ̀ girlina na a nǝ li, ko a nǝ nu ka, ko ɓǝ̀ mana a nǝ pak kat ka, pe ace gusǝlǝ lullǝ Ɓakuli.

³²Kǝa duk tǝr annda mala kǝɓwa ɗang, ko amǝ Yahudi, ko aɓwana mǝnana amǝ Yahudi na raka, ko ikǝlisiya mala Ɓakuli.[130]

³³Wu pa kǝla mǝnana ǝn nggǝ pak ka; ǝn ɓariki mǝ nǝ pwasǝbum ko yan ngga, aɓalǝ agir mǝnana kat ǝn nggǝ pak ka. Ən nggǝ pa ace ɓamuram ɗang, ǝn nggǝ pa ace aɓwana kat, ace mǝnana ɓǝa kum auwa ka.[131]