Read mbula bwazza 1 Amǝ Korinti 11 Bible Online

1 Amǝ Korinti 11 - mbula bwazza bible

1 Amǝ Korinti 11

¹Wu sǝn a rǝam, kǝla mǝnana ǝn nggǝ sǝn arǝ Kǝrǝsti ka.[132]

²Ən nggǝ ɓwangsǝ wun, acemǝnana wu kǝ ɗenyi nǝ mim aɓa koya gir, sǝ wu kǝ kpata gir mǝnana kat ǝn kania wun ngga.

³Ado ka ǝn nggǝ earce ɓǝ̀ wu sǝlǝ ama, múr koya ɓwabura ka, nda Kǝrǝsti, múr koya mɓwama ka, nda ɓwabura, sǝ múr Kǝrǝsti ka, nda Ɓakuli.[133]

⁴Ɓǝ̀ ɓwabura nǝ pak hiwi, ko nǝ hamnǝ cau mala Ɓakuli, sǝ gir ɓamúrí ka, ɓǝsǝkina múrí.

⁵Sǝ mɓwama mǝnana kǝ pak hiwi, ko kǝ hamnǝ cau mala Ɓakuli, sǝ gir ɓamúrí raka, ɓǝsǝkina múrí; nda kǝla mɓwama mǝnana swár múrí ka.

⁶Sǝ ɓǝ̀ ɓine ama pà nǝ̀ gir ɓamúrí raka, nǝ̀ kasǝki nyang muri. Sǝ acemǝnana gir kǝsǝkya na ɓǝ̀ mɓwama kasǝki nyang múrí ka, yì ka, nǝ̀ pǝti múrí.

⁷Ɓwabura pa nǝ̀ gir ɓamúrí aban peri ɗang, acemǝnana à pè pur Ɓakuli, sǝ kǝ lǝmndǝ ɓoarɓwa mala Ɓakuli. Sǝ mɓwama ka, lǝmndǝ ɓoarɓwa mala ɓwabura.[134]

⁸À pusǝ ɓwabura arǝ mɓwama ɗang. Mɓwama na à pusǝì arǝ ɓwabura ka.[135]

⁹Sǝ ɓwabura ka à pusǝì ace mɓwama ɗang, kǝ mɓwama na mǝnana à pusǝì ace ɓwabura ka.

¹⁰Àkǝ̀ ce mǝnia ka, sǝ ace amǝturonjar ka, ɓoaro ɓǝ̀ mɓwama pǝti ɓamuri ace mǝnana ɓǝ̀ lǝmndǝ ama yì ka, nda aɓata yalban mala ɓuri.

¹¹Sǝ aɓa do ma'sǝm, aɓwana mala Mǝtalabangŋo ka, mɓwama andǝ ɓwabura ka à dupi rǝarǝia.

¹²Kat andǝ amani ama mɓwama mǝdǝmbe pur nǝ rǝ ɓwabura ka, acilia aburana kat ka mɓwama nǝ̀ ɓǝlia, sǝ agirbunda kat ka, à pur nǝ bu Ɓakuli.[136]

¹³Wu kasǝ mǝnia yì cau ka nǝ nggearǝ wun: Ɓoaro ɓǝ̀ mɓwama pak hiwi aban Ɓakuli nǝ ɓamúrí atarǝì le?

¹⁴Sǝ aɓa sǝne mala ɓwa ka, ɓǝ̀ ɓwabura nying nyang-múrí dāri buktuk ka, gir kǝsǝkya na re?

¹⁵Sǝ dārya mala nyang amúr mɓwama ka, gir jali na andǝ ɓoarɓwa male re? Nyang mǝdāre ka à pe mɓwama ace gir múrí.

¹⁶Sǝ ɓǝ̀ ɓwa na ama nǝ̀ yinǝ makgir amur mǝnia ka, kǝgir mǝnana mǝ nǝ gandǝ ne ka nda mǝnana ama, sǝm pànǝ ɓe kǝ kuncau ɗang, ko a'ikǝlisiya mala Ɓakuli ka, à pa nǝi gbal ɗang.

¹⁷Aɓalǝ amǝnia yì akwarkiru ka, pà mǝ nǝ ɓwangsǝ wun ɗang, acemǝnana akpapíkí ma'wun a tarǝ wun ngga, à kǝ kiɗiki agir kǝ kuti gilǝke.

¹⁸A tite ka, ǝn o ama ɓǝ̀ wu yiu abanarǝ wun ngga, kun wun kǝ gakì tàrǝia, sǝ mim ngga, ɓǝ́ mǝ nǝ eare ama anggo sǝ ce pa.

¹⁹Dumǝna púp kun wun nǝ̀ gakia, ace mǝnana aɓwana mǝnana aɓalǝ wun nǝ mǝsǝcau mala Ɓakuli ka, ɓǝa surǝia.

²⁰Yale yiu ma'wun abanarǝ wun ngga, wu pànǝ ɗenyicau mala likwar mala Mǝtalabangŋo a bum wun ɗang.

²¹Acemǝnana koyan ngga ɓǝ̀ yiu ka, kpa nǝ kpa amur girlina, ko kundǝrǝu pà kàm ɗang. Gir nî tsǝa, aɓea ɓwana kǝ dum nǝ nzala, sǝ aɓea ɓwana ka, à ɗǝmnggya, gandǝa à kǝ wal-wale.

²²Wu pànǝ aɓala mǝnana wu nǝ̀ lili, wu nǝ̀ nu kàm ngga re? Ko wu kǝ earce wu nǝ̀ nyesǝ ikǝlisiya mala Ɓakuli ɓà, sǝ wu nǝ̀ pe amǝtǝr kǝsǝkya? Mana ado mǝ nǝ bangga wun? Wu kǝ earce ama ɓǝ̀ ǝn ɓwangsǝ wun le? Pà mǝ nǝ ɓwangsǝ wun ace mǝnia ka ɗang, ko bǝti!

²³Kanigir mǝnana ǝn ak a bu Mǝtalabangŋo nǝ nggearǝì ka, nda ǝn kania wun ngga ama: Àkǝ̀ bu du mǝnana à mangŋa Mǝtalabangŋo Yesu nǝi ka, twal bǝredi,

²⁴sǝ pak yàwá aban Ɓakuli. Pǝlǝa ɓwani, sǝ bangŋa ama, “Mǝnia ka nggūrǝam na, mǝnana à pà ace wun ngga. Wu kǝ pak mǝnia ka ace ɗenyi nǝ mim.”

²⁵Anggo gbal, anzǝm mǝnana à shangna bǝredi ka, pǝlǝa twal kwap mala mùr ɓǝlanggun anap, sǝ bangŋa ama, “Mǝnia yì kwap ka nda bǝsa kurcau a nre Ɓakuli andǝ aɓwana male, mǝnana à earǝna nǝi nǝ nkilem ngga. Ko aya pwari wu nda aban nue ka, wu pè ace ɗenyi nǝ mim.”[137]

²⁶Mǝnia ka lǝmndǝ ama, pwari mǝnana kat wu nda ban shak mǝnia yì bǝredi, sǝ wu nda aban nu aɓa mǝnia yì kwap ka, wu nda ban hamnǝ ce lú mala Mǝtalabangŋo ba nyare yiu male.[138]

²⁷Ace mani ka, ɓǝ̀ koyana sǝ shak mǝnia yì bǝredi, ko sǝ nu aɓa mǝnia yì kwap aɓa do kyauwiki Mǝtalabangŋo ka, pangŋǝna cauɓikea arǝ nggūrǝu andǝ nkila mala Mǝtalabangŋo.

²⁸Ace mani ka, ɓǝ̀ ɓwa ɓǝ̀ pelǝki ɓamuri peatu, sǝ ɓǝ̀ shak bǝredi, ɓǝ̀ nu aɓa mǝnia yì kwap ka.

²⁹Ɓwa mǝnana kat she sǝ nu, sǝ pe nggurǝ Kǝrǝsti gulo raka, nda ban nunmbi ɓamuri ɓashi.

³⁰Nda gir mǝnana tsǝa sǝ aɓwana pas aɓalǝ wun ngga, à nda aɓa rǝwukya andǝ rǝkwana, sǝ aɓea wukina ka.

³¹Sǝ ɓǝ̀ sǝm pelǝkina ɓamur rǝ sǝm ngga, pà sǝm nǝ̀ kutio aɓata ɓashi mala Ɓakuli ɗang.

³²Ɓǝ̀ Mǝtalabangŋo na ɓasha sǝm ngga, nunkiru na, ace mǝnana ɓǝ̀ ɓashi-lú ɓǝ̀ kǝa sulǝo amur sǝm sǝnǝa amǝ ɓanza ɗang.

³³Ace mani ka, wun amǝ'eamrǝarǝu, ɓǝ̀ wu yiu a dapi aban likwar mala Mǝtalabangŋo ka, wu kundǝ rǝarǝ wun.

³⁴Ɓǝ̀ kǝɓwa kǝ ok nzala ka, ɓǝ̀ lili a ɓala, ace mǝnana ɓǝ̀ ɓashi mala Ɓakuli ɓǝ̀ kǝa sulǝo amur wun aɓa dapi ma'wun ɗang. Acili acau ka, ɓǝ̀ ǝn yina ka, mǝ nǝ yia bangga wun agir mǝnana wu nǝ̀ pak ka.