Read mbula bwazza 1 Amǝ Korinti 12 Bible Online

1 Amǝ Korinti 12 - mbula bwazza bible

1 Amǝ Korinti 12

¹Adyan ngga wun amǝ'eamrǝarǝu, ǝn eare nǝma ɓǝ̀ wu dum nǝ ɗwanyi sǝlǝe amur aɓoro mala Bangŋo Mǝfele mǝnana à pà sǝm ngga ɗang.

²Wun ngga, wu sǝlǝna ama ɗiɗyal mǝnana wu nda ka aɓwana aɓa do ɗwanyi surǝ Ɓakuli ka, à ɓosǝki kusǝ wun aban peri ata ankúl mǝnana à kǝ na cau raka.

³Ace mani ka, ǝn nggǝ earce nǝma ɓǝ̀ wu sǝlǝ ama, kǝɓwa pà kàm nǝ́ Bangŋo mala Ɓakuli a rǝì, sǝ nǝ̀ pur a kuni ama, “Suban na amur Yesu” ɗang. Sǝ kǝɓwa pà nǝ̀ na gbal ama, “Yesu ka Mǝtalabangŋo na” ɗang she nǝ Bangŋo Mǝfele.

⁴[139]Aɓoro mala bangŋo na kam ɗàngɗáng, sǝa ma tǝria ka pur nǝban Bangŋo Mǝfele.

⁵Aturo nakam ɗàngɗáng, sǝ Mǝtalabangŋo amuria ka nda mwashat.

⁶Anjargula turo nakam ɗàngɗáng, sǝa ma kǝ Ɓakuli mǝ'mwashati na kǝ pak turo nǝ sǝm kat ka.

⁷Sǝ koyana ka à pàni wi ɓoro mala bangŋo, ace bwali acilia aɓwana kam.

⁸Ɓe ɓwa ka, Bangŋo pe wi cau mǝnana lumsǝ nǝ sǝlǝe ka, sǝ ɓǝ̀ ɓwa ka, Bangŋo pe wi cau mǝnana lumsǝ nǝ surǝe ka.

⁹Kǝ Bangŋo mǝ'mwashati mǝnia ka, pe ɓeɓwa guli arǝ Ɓakuli, sǝ ɓeɓwa ka, pe wi ɓoro mala twalban rǝkwana.

¹⁰Ɓe ɓwa ka, Bangŋo pe wi rǝcandǝa mala pakki agir-ndǝlǝki; ɓeɓwa ka, pe wi na gi Ɓakuli. Ɓe ɓwa ka, pe wi sǝlǝe mala gau nre bangŋo mǝɓafoe andǝ mǝ'nyirì. Ɓe ɓwa ka, pe wi nacau nǝ aɓea a kun, sǝ ɓeɓwa ka, pe wi sǝlǝ mala mǝnggi ɓalǝ acau mǝnana à ne nǝ aɓea a kun ngga.

¹¹Rǝcandǝa mala amǝnia yì aɓoro ka kǝ pur nǝ ban Bangŋo mǝnia mwashat ka, sǝ kǝ Bangŋo mǝ'mwashati na kǝ gaki amǝnia yì aɓoro ka kǝla mǝnana ɓabumi kànì ka, ace mǝnana koyana ka, ɓǝ̀ kum ɓoro mǝnana kum ngga.

¹²Nggurǝ ɓwapǝndǝa ka ndanǝ abare pas, sǝ amǝnia yì abare pas ka, à yì dapi à duk nggūrǝu mǝ'mwashati. Anggo gbal sǝ Kǝrǝsti pa.[140]

¹³Sǝm kat ka, à pakka sǝm batisǝma nǝ Bangŋo mǝ'mwashati ɓǝ̀ sǝm duk nggūrǝu mwashat, amǝ Yahudi andǝ aɓwana mǝnana amǝ Yahudi na raka, aguro sǝ aɓwana mǝnana aguro na raka. Sǝ sǝm kat ka, à tsǝa sǝm nu aɓa Bangŋo mǝ'mwashati.

¹⁴Sǝ nggūrǝu ka, bare mwashat na ɗáng, abare na pas.

¹⁵Sǝ ɓǝ̀ kusǝu nǝ bangŋa ama, “Mǝ nda bu ɗang, ace mani ka ǝn pa aɓa nggūrǝu ɗang,” mǝno ka, pà nǝ̀ ci nǝ̀ puriɓa nggūrǝu ɗang.

¹⁶Sǝ ɓǝ̀ kiru nǝ̀ na ama, “Acemǝnana mǝ nda mǝsǝu raka, ǝn pa gbal aɓa nggūrǝu ɗang,” mǝno ka nǝ̀ ci nǝ̀ puri ɓa nggūrǝu le?

¹⁷Ɓǝà na ama nggūrǝu kat ka mǝsǝu na ka, ɓwa nǝ̀ okban nǝ mana? Ko a na raka, ɓǝ̀ nggūrǝu kat ka kiru na ka, ɓwa nǝ̀ ok rǝmban nǝ mana?

¹⁸Sǝ Ɓakuli ka nǝ eare male sǝ tsǝk koya bare ɓwa aɓa nggūrǝu, aban mǝnana bumi earce ka.

¹⁹Sǝ ɓǝ̀ yia kat ka, barǝu mwashat na ka, nggūrǝu ka nǝ̀ pa ake?

²⁰Abarǝu nakam pas, sǝa ma nggūrǝu ka, nda mwashat ɓǝrɓǝr.

²¹Mǝsǝu pa nǝ̀ banggi bu ama, “Kǝgir oasǝam a rǝo ɗang!” Sǝ ɓamuru pa nǝ̀ ne kusǝu gbal ama, “Kǝgir oasǝam a rǝo ɗang!”

²²Ɓafo ka, aɓea abarǝu mala nggūrǝu mǝnana à twalia kǝla à pa a kun kǝgir raka, ɓǝa pà kàm raka nggūrǝu pa nǝ̀ lumsǝ turo male ɗàng.

²³Abare nggūrǝu mǝnana à twalia ama à karǝ kǝgir raka, sǝm nggǝ tsǝk kiria kǝrkǝr. Sǝ abarǝu mǝnana à ɓoarsǝna raka, sǝm nggǝ ɗenyi nǝia pepe.

²⁴Sǝ abarǝu mǝnana amǝ ɓoarsǝne na ka, sǝm nggǝ tsǝk kiria pepe ɗang. Ɓakuli ka, tsǝk nggūrǝu abanɓwáná, acemǝnana ɓǝa tsǝk kir abarǝu mǝnana à gatti ka.

²⁵Pè anggo ace mǝnana gakya ɓǝ̀ kǝa pa aɓa nggūrǝu ɗang, sǝ abare yì nggūrǝu ka à nǝ̀ nggǝ ɗenyi nǝ rǝarǝia.

²⁶Ɓǝ̀ ɓe barǝu mwashat nanǝ tanni ka, acili abarǝu ka, à kutina aɓa tanni gbal kat ate. Sǝ ɓǝ̀ ɓe mwashat kum gulo ka, abarǝu kat ka, ban nǝ ɓoaria wia ate.

²⁷A dyan ngga, wun kat ka, wu nda ka nggurǝ Kǝrǝsti, sǝ koyana ata wun ngga, bare na.

²⁸Aɓa ikǝlisiya ka Ɓakuli tsǝngŋǝna aɓwana arǝ abancame. A bancame mǝdǝmbe ka amǝ'mishan na. A ɓaria bancame ka, amǝ'ɓangna mala Ɓakuli na. A tāruia bancame ka, amǝkanigir na. Acilia mǝnana à kpatea ka à nda ka amǝ'pakki agir-ndǝlǝki, andǝ amǝnana à pea wia rǝcandǝa mala twalban rǝkwana ka. Aɓea ɓwana ka, gandǝrǝu mala bwali aɓwana na, andǝ amǝnana malea ka yal aɓwana na ka, sǝ aɓea ɓwana ka, amǝ na akún-takuli ɗàngɗáng na.[141]

²⁹Yia kat ka, amǝ'mishan na le? Yia kat ka, amǝ'ɓangna mala Ɓakuli na le? Yia kat ka, amǝkanigir na le? Sǝ yia kat ka, à ndanǝ rǝcandǝa mala pakki agir-ndǝlǝki le?

³⁰Yia kat sǝ à ndanǝ ɓoro mala twalban rǝkwana le? Yia kat sǝ à kǝ na cau nǝ akún-takuli le? Sǝ yia kat sǝ à ndanǝ ɓoro mala bǝlki ɓalǝ akún-takuli le? À nda kat ɗang!

³¹Ɓǝ̀ rǝ wun ɓǝla arǝ kum aɓoro mǝnana à nda dǝmbǝa nǝ acilia ka. Sǝ ado ka mǝ nǝ lǝmndǝa wun njar mǝnana ɓoaro kutibanì kat ka.