Read mbula bwazza 1 Amǝ Korinti 13 Bible Online

1 Amǝ Korinti 13 - mbula bwazza bible

1 Amǝ Korinti 13

¹Ɓǝ̀ mǝ gandǝ na cau nǝ akún mǝnana a ɓanza kat andǝ akún mala amǝturonjar, sǝ ǝn panǝ earcearǝu raka, ǝn dumǝna gonggwang mǝ loasǝbani, ko ana raka, ǝn dumǝna kuli mala amǝ'ntul.

²Ɓǝa bangŋa ama, mǝ ndanǝ ɓoro mala na ɓabum Ɓakuli, ko ǝn bwalta acau ɓa-sǝmbǝrǝa kat, sǝ ǝn surǝ koya gir ka, ko mǝ ndanǝ guli arǝ Ɓakuli, ulang mana nǝ̀ gandǝ gǝshi ankono, sǝ ǝn panǝ earcearǝu raka, mǝ nda kǝgir ɗang.[142]

³Ɓǝ̀ mǝ nǝ pe amǝtǝr agirkuma mem kat, mǝ nǝ pà nggūrǝam ɓǝa pisǝì ace nggori, sǝ ǝn panǝ earcearǝu raka, mani pà nǝ̀ puram kǝgir ɗang.

⁴Earcearǝu ka ndanǝ munyi, andǝ pe mǝɓoarne. Earcearǝu ka kǝ pak mɓali ɗang, kǝ nggori, ko gusǝlǝ-muru ɗang.

⁵Earcearǝu kǝ pa arkikun ɗang, panǝ earce-ɓamuru ɗang, sǝ kǝ kaurǝa arǝ pak bumlulla ɗang. Earcearǝu kǝ bwal ɓwa a bum ɗang.[143]

⁶Ban kǝ ɓoari wi arǝ ɓealɓikea ɗang, ban kǝ ɓoari wi arǝ mǝsǝcau.

⁷Earcearǝu kǝ bwaki bui arǝ ɓwa ɗang. Earnǝɓwa male, andǝ tsǝkɓalǝu male, andǝ gandǝrǝu male aɓalǝ agir kat ka kǝ kpa ɗang.

⁸Earcearǝu ka masǝlǝate pà kàm ɗang, kǝ makban ɗang. Na ɓabum Ɓakuli ka nǝ̀ ngga came. Anakiacau nǝ akún-takuli ka à nǝ̀ ngga came. Ko sǝlǝe ka nǝ̀ ngga kutio.

⁹Surǝe ma'sǝm ngga lumsǝ ɗang, sǝ sǝm surǝ ɓabum Ɓakuli kat ɗang.

¹⁰Sǝa ma ɓǝ̀ gir mana lumsǝ ka, yina ka, amǝnana à lumsǝ raka, à nǝ̀ ndǝrmi.

¹¹Mǝnana mǝ nda muna ka, ǝn nggǝ na cau, ǝn nggǝ ɗenyicau sǝ ǝn nggǝ sǝngir a sǝne mala amuna. Lang adyan ǝn karǝna-ɓwa ka, ǝn bwaki buam arǝ pakkia agir mala amuntulo.

¹²Adyan ngga, sǝm nggǝ sǝnban mbǝrǝm-mbǝrǝm, kǝla yilǝmi gir aɓa tapwari mǝpǝndǝke, sǝ a dǝmbǝa ka, sǝm ne sǝnban ɓamǝsǝu andǝ ɓamǝsǝu. Ado ka, surǝe mem ngga lumsǝ ɗang, sǝ a dǝmbǝa ka, mǝ nǝ surǝ koman ngga, kǝla mǝnana Ɓakuli surǝam ɗǝɗak ka.

¹³Ado ka, amǝnia yì agir tārú, à nda à ue ka: paɓamuru, andǝ tsǝkɓalǝu, andǝ earcearǝu; sǝ mǝgule malea kat ka, nda earcearǝu.