Read mbula bwazza 1 Amǝ Korinti 14 Bible Online

1 Amǝ Korinti 14 - mbula bwazza bible

1 Amǝ Korinti 14

¹Ɓǝ̀ earcearǝu duk gir mǝnana nda wu nǝ̀ ɓangŋa ate amur acili agir ka, sǝ ɓǝ̀ rǝ wun ɓǝla arǝ kum aɓoro mala Bangŋo, nggeamurǝmi ka ɓoro mala na gì Ɓakuli.

²Ɓǝ̀ ɓwa na arǝ na cau nǝ aɓea akún ngga, cau male ka nda andǝ Ɓakuli. Kǝ ɓwapǝndǝa pa nǝ̀ ok ɓālǝi ɗang; yì ka, nda aban na cau mala agir-sǝmbǝrǝa nǝ rǝcandǝa mala Bangŋo.

³Sǝ ɓwa mǝnana kat kǝ na gi Ɓakuli ka, nda ban ne aɓwana ɓǝa kum ɓakban andǝ rǝcandǝa andǝ girikiban.

⁴Ɓwa mǝnana kǝ na cau nǝ akún-takuli ka, nda ban ɓak ɓamuri, sǝ ɓwa mǝnana kǝ na gi Ɓakuli ka, nda ban ɓak ikǝlisiya kat.

⁵Eare mem ngga, koyan ata wun ngga ɓǝ̀ na cau nǝ akún-takuli; sǝ gir mana ǝn earce kutibanì ka, nda mǝnana ama koyan ata wun ngga ɓǝ̀ na gi Ɓakuli. Acemǝnana na gi Ɓakuli ka, kuti nacau nǝ akún-takuli, she ko ɓǝ̀ do ama ɓeɓwa na abanì, mǝnana nǝ̀ bǝl ɓa cau mǝno à ne nǝ kún-takuli ka, ace ɓak ikǝlisiya.

⁶Wun amǝ'eamrǝarǝu, ɓǝ̀ ǝn yiu aban wun, sǝ ǝn nggǝ na wun cau nǝ akún-takuli ka, mana wu nǝ̀ kumo a ɓalǝi? Sǝ ɓǝ̀ ǝn yiu nǝ sǝne mala Bangŋo, ko surǝgir, ko na gi Ɓakuli, ko kanigir ka, amǝnia ka à nǝ̀ bwala wun nggam.

⁷Ko nggearǝ agir-nggwam mǝnana à pànǝ yilǝmu raka, kǝla antetu ko zangŋan, sǝ ɓǝa walia ko à twangŋia, sǝ gia waria rǝia ɗàngɗáng raka, kǝɓwa pà nǝ̀ bwalta ɓoaro mala gia ɗang.

⁸Sǝ ɓǝ̀ mǝtwang njawe-lwa twangŋi a nzongŋi raka, palang sǝ à nǝ̀ sǝlǝ ama njawe-lwa na à twang ngga?

⁹Anggo gbal, ɓǝ̀ ɓwa ne aɓwana cau nǝ kún mǝnana à bwalte raka, palang sǝ à nǝ̀ surǝ cau mǝnana nakiyi ka? Cau mǝno ne ka umna andǝ gung.

¹⁰Akún na kam ɗàngɗáng a ɓanza, sǝ ko mǝyani ka ɓālǝi na kam.

¹¹Sǝ ɓǝ̀ ǝn bwalta kún mǝnana à kǝ ne raka, ǝn dumǝna ɓwa-kúnɗangna aban ɓwa mǝno nakiyi cau ka, sǝ yì gbal ka dumǝna ɓwa-kúnɗangna abanam.

¹²Anggo gbal sǝ pa aban wun. Acemǝnana rǝ wun kǝ ɓǝla arǝ kum aɓoro mǝnana Bangŋo nǝ̀ pākiyi ka, wu ɓariki wu kwaro aɓalǝ amǝnana à nǝ̀ ɓak ikǝlisiya kat ka.

¹³Ace mani ka, ɓwa mǝnana kat kǝ na cau nǝ aɓea akún-takuli ka, ɓǝ̀ pak hiwi gbal ama ɓǝ̀ kum bǝl ɓacau mǝnana ne ka.

¹⁴Sǝ ɓǝ̀ ǝn pak hiwi nǝ ɓe kún mǝnana ǝn surǝì raka, bangŋo mem na pakkiyi hiwi ka, ɗenyicau pà aɓa gir mǝnana ǝn nakiyi ka ɗang.

¹⁵Sǝ ado ka, mana mǝ nǝ pa? Mǝ nǝ pak hiwi nǝ bangŋo mem, sǝ mǝ nǝ pak hiwi nǝ ɗenyicau mem gbal. Mǝ nǝ tu'nggyal nǝ bangŋo mem, sǝ mǝ nǝ tu'nggyal gbal nǝ acau mǝnana ǝn bwalta ɓalǝia ka.

¹⁶Sǝ ɓǝa kǝ ɓwangsǝ Ɓakuli nǝ bangŋo nǝmurǝì ka, lang sǝ aɓwana mǝnana à oeo sǝ à bwalta cau mo raka à nǝ̀ ear ama ɓǝ̀ do anggo? Palang sǝ à nǝ̀ bwalo kam arǝ pak yàwá yi mǝnana yia ka à surǝ cau mǝnana a nakiyi raka?

¹⁷Ɓafo ka, hiwi ɓwangsǝban mo aban Ɓakuli ka ndanǝ ɓoaro, sǝ aɓwana mǝnana à kǝ oeo ka, à kum ɓakban ɗang.

¹⁸Ən pakki Ɓakuli yàwá, acemǝnana ǝn kuti koyana ata wun ngga nǝ nacau nǝ akún-takuli.

¹⁹Sǝa ama aban rambǝa mala ikǝlisiya ka, kǝpǝna mǝ na cau tongno mǝnana aɓwana nǝ̀ bwalte, à nǝ̀ kani kǝgir kam ngga, amur mǝnana mǝ nǝ nakia acau á-lum nǝ akún-takuli ka.

²⁰Wun amǝ'eamrǝarǝu, wu kǝa pǝlǝ amuntulo aɓa ɗenyicau ma'wun amur surǝ amǝnia yì agir ka ɗang. Wu duk amuntulo arǝ ɓealɓikea, sǝ wu gul aɓa ɗenyicau ma'wun.

²¹Aɓa Nggurcau mala Musa ka Mǝtalabangŋo bangŋa ama: “Mǝ nǝ ne aɓwana mem cau nǝ amǝ'kunɗangna. Mǝ nǝ na cau nǝ mburkun abǝri. Kat andǝ amani ka, à pà nǝ̀ okam ɗang.”[144]

²²Kǝ ndo ka, nacau nǝ akún-takuli ka gir'lǝmndǝa na ace aɓwana mǝnana amǝkwaɗi na raka, pà nǝ̀ duk gir'lǝmndǝa aban amǝkwaɗi ɗang. Ɓoaro mala na gi Ɓakuli ka, nda ace amǝkwaɗi, pa ace aɓwana mǝnana amǝkwaɗi na raka ɗang.

²³Ɓǝ̀ yi do ama ikǝlisiya yi ramǝna kat, sǝ koyana ka lo aban na cau nǝ akún-takuli. Ɓǝ̀ aɓwana mǝnana à bwalta ce ɗang, ko amǝkwaɗi na raka, à yiu ata wun, à yì ok koyana aban na cau nǝ akún-takuli ka, à pà nǝ̀ twali ama múr wun pǝlǝ nǝ pǝlǝa re?

²⁴Ɓǝa na ama koyan ngga nda rǝ na gi Ɓakuli, sǝ aɓwana mǝnana amǝkwaɗi na ɗang, ko à bwalta ce raka, à yiu ata wun ngga, cau mala Ɓakuli mǝnana à ok ka, nǝ̀ soea a ɓabumia, nǝ̀ lǝmndǝia wia acauɓikea malea.

²⁵Ɓǝ̀ à ndarǝ oe ka, aɗenyicau ɓa-sǝmbǝrǝa malea ka, à nǝ̀ pusǝrǝia a banfana. Sǝ à nǝ̀ ɓun amur ankunia, à nǝ̀ peri aban Ɓakuli, à nǝ̀ nggǝ na ama, “Ɓafo na, Ɓakuli ka ndakani aɓalǝ wun!”

²⁶Wun amǝ'eamrǝarǝu, ɓa cau mǝnana ǝn nakiyi ka ndya ka. Ɓǝ̀ wu yi dapina abanɓwáná aban peri ka, aɓea ɓwana ka nggyal na à nǝ̀ tù ka. Aɓea ka gir na à ndanǝi à nǝ̀ kani ikǝlisiya ka. Aɓea ɓwana man ngga causǝna na Ɓakuli lǝmndǝia wia aɓa bangŋo à nǝ̀ ne ikǝlisiya ka. Aɓea aɓwana ka à nǝ̀ bangcau nǝ akún-takuli. Aɓea ɓwana ka à nǝ̀ bǝlki ɓalǝ acau mǝnana à nea nǝ akún-takuli ka. Sǝa ma koya gir à pe kat ka, ɓǝa pe ace ɓak ikǝlisiya.

²⁷Ɓǝ̀ aɓwana ɓǝa kǝa kútì ɓari ko tārú, mǝnana à nǝ̀ na cau nǝ akún-takuli ka ɗang. À nǝ̀ na gbal ka, à nǝ̀ nggǝ oasǝki a rǝia, sǝ dumǝna púp ama ɓeɓwa nakam mǝnana nǝ̀ bǝlki ɓalǝ ace ka.

²⁸Sǝ ɓǝ̀ kǝɓwa pà kàm mǝnana nǝ̀ bǝl ɓa cau raka, yì mǝ'nacau nǝ kún-takuli ka ɓǝ̀ duk kuni ɗǝong aban kpapi mala ikǝlisiya, nacau male ɓǝ̀ do a nre andǝ Ɓakuli.

²⁹Aɓwana ɓari ko tārú mǝnana Ɓakuli pea wia cau male ka, ɓǝa na cau, sǝ acili ɓwapǝndǝa ka ɓǝa pelǝki ɓa cau mǝnana à bangŋi ka.

³⁰Ɓǝ̀ kǝ ɓwa aban do, kum bǝsa causǝna mǝnana Ɓakuli lǝmndǝì wi aɓa bangŋo, sǝ ɓeɓwa na ban na cau ka, ɓwa mǝno kǝ na cau ka ɓǝ̀ tamsǝ nacau male.

³¹Aɓa oasǝke a rǝarǝia ka aɓwana mǝnana à ndanǝ cau mala Ɓakuli à nǝ̀ bang ngga, à nǝ̀ gandǝ na cau kat, ace mǝnana koyan ngga ɓǝ̀ kum gir kania, ɓǝa kum ɓakban.

³²Abangŋo mala na gi Ɓakuli mǝnana amǝ'ɓangna nani ka à nda aɓata yalban mala amǝ'ɓangna.

³³Acemǝnana Ɓakuli ka, Ɓakuli mala zuriki gir na ɗang, mala nongsǝ cau a tarǝia na andǝ dorǝpwala. Kǝla mǝnana ndakam arǝ abankpapi mala aɓwana mala Ɓakuli ka,

³⁴amamǝna ɓǝa do kunia ɗǝong aban koya dapi mala ikǝlisiya, acemǝnana à earia wia ɓǝà na cau ɗang[145]. Akuni ka ɓǝà do aɓa nyesǝmuru kǝla mǝnana Nggurcau mala Musa kànì ka.[146]

³⁵Ɓǝ̀ ɓe kǝgir nakam à kǝ earce surǝì ka, ɓǝa ɗi ka aburria a ɓala, acemǝnana gir kǝsǝkya na ɓǝ̀ mɓwama na cau aɓa ndahiwi.

³⁶Nggearǝì ka, wu kǝ sǝni kǝla cau mala Ɓakuli tite aban wun le? Ko ana raka, wu kǝ nda mǝnana bwal ban wun nǝmurǝ wun ngga le?

³⁷Ɓǝ̀ kǝ ɓwa kǝ sǝni kǝla yì ka, mǝ na gì Ɓakuli na, ko ndanǝ ɓe kǝ ɓoro mala Bangŋo ka, ɓǝ̀ sǝlǝ ama cau mǝnia ǝn gilǝa wun ngga, nzongcau na, pur nǝ ban Mǝtalabangŋo nǝ nggearǝì.

³⁸Ɓǝ̀ ɓwa burice mǝnia ka, yì nǝ nggearǝì ka à nǝ̀ burice.

³⁹Ace mani ka, wun amǝ'eamrǝarǝu, ɓǝ̀ rǝ wun ɓǝla arǝ bang cau mala Ɓakuli, sǝ wu kǝa pǝrki amǝ'nacau nǝ akún-takuli ɗang.

⁴⁰Wu tsǝk kir wun ama ko mana le ka, ɓǝa pè pepe a njargula male.