Read mbula bwazza 1 Amǝ Korinti 15 Bible Online

1 Amǝ Korinti 15 - mbula bwazza bible

1 Amǝ Korinti 15

¹Adyan ngga, wun amǝ'eamrǝarǝu, ǝn nggǝ kasǝɓalǝ wun arǝ Cau Amsǝban mǝnana ǝn hamba wunì a dǝmbǝa ka. Sǝ wu angŋǝni gbal, wu tamsǝna kusǝ wun amuri kàngkàng.

²Mǝnia yì Cau Yilǝmu ka nda mǝnana nǝ̀ amsǝ wun, ɓǝ̀ wu bwal kàngkàng arǝ cau mǝnana ǝn hamba wun ngga, she ko ɓǝa bangŋa ama paɓamuru ma'wun pa amur mǝsǝcau raka.

³Ən pana wun gir mǝnana kutibanì kat ka, yì gir mǝnana à pami gbal ka ama: Kǝrǝsti wu ace acauɓikea ma'sǝm, kǝla mana Malǝmce na ka.[147]

⁴À lumsǝi a ɓembe, sǝ à yì loasǝi nǝ yilǝmu aɓa tāruia nongŋo, kǝla mana Malǝmce na ka.[148]

⁵Kefas[149] sǝni nǝ mǝsǝì, sǝ Alaggana mana Lum-nong-ɓari ka à sǝni gbal.[150]

⁶Anzǝm man ngga, amǝ'eamrǝarǝu[151] mǝnana lakki malea kuti gbǝman-tongno ka, à sǝni àkǝ̀ tarǝia, banggulea ka à ndanǝ yilǝmu, kat andǝ amani ama cilia wukina ka.

⁷Nyare pusǝrǝi aban Jemis, nǝ nzǝmo ka, yi pusǝrǝi aban amǝ'mishan yia kat.

⁸A masǝlǝate ka, mim mǝnana kǝla pwari ɓǝlam karǝ raka sǝ a ɓǝlam ngga, yi pusǝrǝi abanam gbal.[152]

⁹Mim ngga, mǝ nda rítǎu aɓalǝ amǝ'mishan. Ɓafo ka, ǝn kārǝa ɓǝa ɓallam aɓalǝ amǝ'mishan ɗang, ace kǝ pàtanni mǝnana ǝn pe ikǝlisiya mala Ɓakuli ka.[153]

¹⁰Ɓǝ̀ mana gir nì mǝ nda ado ka, nda acemǝnana ɓwamuru mala Ɓakuli nǝ̀ cem sǝ ǝn duk gir nì, sǝ mǝnia yì ɓwamuru à lǝmndǝam ngga yi duk ɓà ɗang. Yale ǝn pak turo ǝn kuti koyan ata amǝ'mishan ngga, sǝ mǝnia ka sǝlǝpe mem na ɗang, ko bǝti, ɓwamuru mala Ɓakuli mana nda atam ngga, nǝ̀ pak mani kat.

¹¹Sǝ ace mani ka, ko mǝ nda ǝn hamba wun nǝ cau, ko yia na à hamba wunì ka, kǝcau mǝ'mwashati mǝnana wu earna nǝi ka nda.

¹²Cau mǝnana sǝm hamnggiyi nǝi ka nda mǝnana ama, Kǝrǝsti ka à loasǝi a ɓembe nǝ yilǝmu, sǝ palang ado sǝ aɓea aɓwana aɓalǝ wun kǝ na ama lo mala alú a ɓembe pa kàm ɗang?

¹³Sǝ ɓǝ̀ alú pa nǝ̀ loapi ɓembe raka, nggearǝ Kǝrǝsti gbal ka, à loasǝi a ɓembe ɗang.

¹⁴Sǝ ɓǝà loasǝ ma Kǝrǝsti a ɓembe raka, hamnǝ cau ma'sǝm dumǝna mǝɓane, sǝ nggearǝ paɓamuru ma'wun ngga, gir mǝɓane na.

¹⁵Ɓǝ̀ mǝsǝcau na ama alú kǝ loapi ɓembe nǝ yilǝmu raka, lǝmndǝ ama, sǝm kat amǝ'mishan ngga, sǝm nda aban na nyir amur Ɓakuli, yi mǝnana sǝm bangŋa ama Ɓakuli loasǝ Kǝrǝsti a ɓembe, sǝ aɓa mǝsǝcau ka loasǝi raka.

¹⁶Sǝ ɓǝ̀ loapi ɓembe mala alú pa kàm raka, lǝmndǝ ama Kǝrǝsti ka à loasǝi a ɓembe ɗang.

¹⁷Sǝ ɓǝ̀ Kǝrǝsti ka à loasǝi ɓembe nǝ yilǝmu raka, paɓamuru ma'wun ngga dumǝna gir mǝɓane, sǝ wu nda àkǝ̀ banì aɓalǝ acauɓikea ma'wun.

¹⁸Nyar ɗǝm ngga, nǝ̀ lǝmndǝ ama aɓwana mǝnana à wú aɓa paɓamuru malea aban Kǝrǝsti ka, à uena malea ɓa!

¹⁹Ɓǝ̀ tsǝkɓalǝu ma'sǝm arǝ Kǝrǝsti ka nda àkǝ̀ ce doɓanza mǝnia nǝmurǝì ka, sǝm nda ka aɓwana mǝnana caukwanban ma'sǝm kuti mala koyan ngga a ɓanza kat.

²⁰Sǝ ɓafo ka, nda mǝnana ama, à loasǝna Kǝrǝsti a ɓembe nǝ yilǝmu. Lǝmndǝ ama yì nda mǝdǝmbǝa loapi ɓembe aɓalǝ aɓwana mǝnana à nongŋǝna ntulo mala lú, à nǝ̀ loasǝia nǝ yilǝmu ka.[154]

²¹Kǝ ndo ka, kǝla mǝnana lú yiu nǝ ban ɓwa ka, loapi ɓembe ka, tinate gbal ado nǝ ban ɓeɓwa.

²²Kǝla mǝnana koyana ka kǝ wú acemǝnana sǝm kat ka, sǝm nda ka mala Adamu ka, anggo gbal ɓwa mǝnana mala Kǝrǝsti na ka, nǝ̀ kum bǝsa yilǝmu.

²³Sǝ mǝnia yì loapi ɓembe nǝ yilǝmu ka, nzongŋi nakam, ko yan ngga ndanǝ banì male aɓa tsaɗi atarǝu: Kǝrǝsti nda mǝnana a dǝmbǝa à tita loasǝe ka; sǝ a pwari nyare yiu male ka, nǝ̀ loasǝ aɓwana mǝnana amale na ka.

²⁴Anzǝm mǝno ka, sǝ masǝlǝate nǝ̀ yiu; anggo ka, Kǝrǝsti nyesǝna domurǝm pani Ɓakuli Tarrû, anzǝm mǝnana kiɗikina koya yalmuru, andǝ koya garamurǝm, andǝ koya rǝcandǝa ka.

²⁵Acemǝnana dumǝna púp, Kǝrǝsti nǝ̀ duk murǝm, she ɓǝ̀ Ɓakuli nyesǝna aɓimǝbura kat a ɓakusǝi ka.[155]

²⁶Ɓimǝbura mǝnana à nǝ̀ masǝlǝta limurǝm amuri ka nda lú.

²⁷Acemǝnana Malǝmce bangŋa ama, “Ɓakuli tsǝk girbunda kat a ɓakusǝ Kǝrǝsti.”[156] Sǝ bangŋe mǝno ama, “Girbunda kat” ka, oasǝ Ɓakuli a ɓalǝi ɗang acemǝnana Ɓakuli nǝ nggearǝì na nyesǝkiyi girbunda kat aɓata Kǝrǝsti ka.

²⁸Sǝ ɓǝa nyesǝna agir kat aɓata domurǝm mala Kǝrǝsti ka, pǝlǝa yì nǝ nggearǝì, yì Muna mala Ɓakuli ka, nǝ̀ nyesǝ ɓamuri aɓata Ɓakuli. Acemǝnana Ɓakuli mana pe Muni gara amur girbunda kat ka, nǝ̀ duk murǝm amur girbunda kat sǝ a koya ban kat.

²⁹Sǝ ɓǝ̀ alú pa nǝ̀ lo nǝ yilǝmu raka, mana nda ɓa pakki aɓwana batisǝma akuni aɓwana mǝnana à wuna ka? Mana tsǝa sǝ à nǝ̀ pè, yi mǝnana ɓǝ̀ tsǝkɓalǝu pà kàm ama a ɓe kǝ pwari ka alú nǝ̀ loapi ɓembe nǝ yilǝmu raka?

³⁰Sǝ nggearǝ sǝm ngga, mana gir nì na tsǝa sǝ sǝm nggǝ oasǝ ɓamur rǝ sǝm aɓa ká-mǝɓane koya pwari?

³¹Ən nggǝ na wun ɓafo, wun amǝ'eamrǝarǝu, koya pwari ka mǝ nda aɓa ká lú! Mǝnia ka makgir pa a rǝì ɗang kǝla mǝnana nggori mem nǝ gir mǝnana Kǝrǝsti Yesu Mǝtala sǝm pe aɓalǝ wun pak ka.

³²Ɓǝ̀ munǝo mem arǝ aɓwana mǝno a Afisu, mǝnana à soem kǝla anyam-ɓabondo ka, nda ace alta gir ɓanza ka, mana gir nì na mǝ nǝ kumo a ɓalǝi, yi mǝnana ɓǝ̀ loapi ɓembe nǝ yilǝmu pà kàm raka? Sǝ ɓǝ̀ loapi ɓembe pà kàm raka: “Ɓǝ̀ sǝm fani arǝ likiali, andǝ nukiagir, acemǝnana li ka sǝm nǝ̀ wu.”[157]

³³Wu kǝa eare ɓǝà swarki wun ɗang: “Gya a tarǝu andǝ amǝ'ɓealɓikea ka, kǝ kiɗiki ɓealǝu mǝɓoarne.”

³⁴Wu nyare aɓa ɗenyicau ma'wun, sǝ wu bwaki bu wun arǝ cauɓikea. Aɓea ɓwana ata wun, à surǝ Ɓakuli ɗang. Ən bang mǝnia ka ace ɓǝ̀ wu kum kǝsǝkya.

³⁵Sǝ ɓeɓwa nǝ̀ ɗiban ama, “Lang ngga sǝ à nǝ̀ loasǝ alú le? Ya ulang nggūrǝu na à nǝ̀ long nǝi?”

³⁶A nda ɓanggi ka! Mǝsǝɓeale mǝnana à oasǝi a nzali ka, pà nǝ̀ pur nǝ yilǝmu ɗang, she ɓǝ̀ rǝmǝna peatu ka.

³⁷Gir mǝnana à oasǝi a nzali ka mǝsǝɓeale na; nǝ̀ do ama mǝsǝɓeal yare na, ko mǝsǝɓeal ɓe girpwala na; girpwala na andǝa kǝringyi à oasǝ a nzali ka ɗang.

³⁸Ɓakuli na nǝ̀ pè mǝno yì mǝsǝɓeale ka ngguni mǝnana earce ɓǝ̀ gul nǝi ka; koya mǝsǝɓeale ka, Ɓakuli tsǝki wi ngguni male.

³⁹Anggo gbal, anggūrǝu ka à nda ɗàngɗáng. Nggurǝ ɓwapǝndǝa na ɗàng, nggurǝ agirkusǝu na ɗàng, mala anyal na ɗàng, sǝ mala anji na ɗàng.

⁴⁰Anggūrǝu na kam mala kuli na, sǝ a mala nzali nakam. Ɓoarɓwa mala anggūrǝu mǝnana nǝ kuli ka, nda ɗàng andǝ ɓoarɓwa mala anggūrǝu mǝnana a ɓanza ka.

⁴¹Pwari ka ndanǝ male yì ɓoarɓwa ɗàng, sǝ zongŋo na nǝ male ɗàng. Sǝ anlero gbal ka, à ndanǝ malea. Aɓalǝ anlero ka, ko mǝyani ka ndanǝ male yì ɓoarɓwa ɗàng.

⁴²Anggo sǝ loapi ɓembe mala alú nǝ yilǝmu nǝ̀ pa. Nggūrǝu mǝnana à lumsǝi ka, mǝnana nǝ̀ kiɗiki ka nda; nggūrǝu mǝnana à loasǝi nǝ yilǝmu ka, mǝnana pà nǝ̀ kiɗiki raka nda.

⁴³À nǝ̀ lumsǝì a tūli ka, nda yaklak sǝ ɓoar sǝna ɗang; ɓǝ̀ à nǝ̀ loasǝi ka, nǝ̀ pa aɓa rǝcandǝa andǝ ɓoarɓwa.

⁴⁴À nǝ̀ oasǝi a nzali ka, nggūrǝu mǝnana à nǝ̀ je ka nda; à nǝ̀ ngga loasǝi ka, nggūrǝu mala ɓabangŋo na. Nggūrǝu mǝnana à nǝ̀ je ka ndakam, sǝ nggūrǝu mala bangŋo nakam gbal.

⁴⁵Malǝmce ka bangŋa ama, “Ɓwa mǝdǝmbe yì Adamu ka, yi pǝlǝ ɓwa mǝyilǝmuì.”[158] Sǝ Adamu mǝ'nzǝmoe, yì Kǝrǝsti ka, Bangŋo na, mǝnana kǝ pa yilǝmu ka.

⁴⁶Gir mǝnana akiyi dǝmbǝa yiu ka, nda nggūrǝu mǝnana à nǝ̀ je ka, a nzǝmi ka, sǝ nggūrǝu mǝnana a ɓabangŋo ka kǝ kpate.

⁴⁷Adamu, ɓwa mǝdǝmbe ka, pur nǝ nzali, à pe nǝ dǝɓang; Kǝrǝsti, yì ɓaria Ɓwa ka, sulǝ nǝ kuli.

⁴⁸Aɓwana mǝnana à nda ka mala ɓanza ka, à nda kǝla ɓwa mǝnana pur a nzali ka; sǝ aɓwana mǝnana a mala kuli na ka, à nda kǝla Ɓwa mǝnana pur nǝ kuli ka.

⁴⁹Kǝla mǝnana ado sǝm nda kǝla ɓwa mǝnana pur a nzali ka, ɓe pwari na kǝ yiu ka, sǝm nǝ̀ ngga pa kǝla Ɓwa mǝnana pur nǝ kuli ka.

⁵⁰Wun amǝ'eamrǝarǝu, cau mǝnana ǝn nakiyi ka ɓālǝi nda mǝnana ama, nggūrǝu mǝnia mala nyama andǝ nkila ka, à pà nǝ̀ kutio a Domurǝm mala Ɓakuli ɗang. Anggo gbal, gir mǝnana nǝ̀ wu ka, pà nǝ̀ liɓala mala gir mǝnana pà nǝ̀ wu raka ɗang.

⁵¹Wu kwaki kir wun mǝ ara wun ɓe cau ɓa-sǝmbǝrǝa: sǝm kat sǝ sǝm nǝ̀ wu ɗang, sǝa ma sǝm kat sǝ à nǝ̀ nggaɗi sǝm.

⁵²Nǝ̀ yia pa aɓa yasǝlǝban, a kaurǝa kǝla kuɓimǝsǝu, yi mǝnana à nǝ̀ twang masǝlǝata njawe ka. Ɓǝ̀ masǝlǝata njawe man ɓuana ka, aɓwana mǝnana à wuna ka, à nǝ̀ loapi ɓembe, à pà nǝ̀ wu ɗǝm ɗang. Sǝ sǝm mǝnana ado nǝ yilǝmu, sǝnǝia kat ka, à nǝ̀ nggaɗi sǝm.

⁵³Acemǝnana nggurǝ sǝm mǝnia kǝ rǝm ngga, à nǝ̀ nggaɗi nǝ mǝnana pà nǝ̀ rǝm raka, sǝ nggūrǝu mǝnana nǝ̀ wu ka, à nǝ̀ nggaɗi nǝ mǝnana pà nǝ̀ wu raka.

⁵⁴Sǝ ɓǝ̀ nggūrǝu mǝnana nǝ̀ rǝm ngga, à nggaɗini nǝ mǝnana pà nǝ̀ rǝm raka, sǝ mǝnana nǝ̀ wu ka à nggaɗini nǝ mǝnana pà nǝ̀ wu raka, sǝ mǝnia yì cau à gilǝì aɓa Malǝmce ka, nǝ̀ yia lumsǝo ama: “Lú ka à parni aɓata limurǝm!”[159]

⁵⁵“We lú, limurǝm mo ka nda ke? We lú, barya mo ka nda ke?”[160]

⁵⁶Barya mala lú ka nda cauɓikea, sǝ Nggurcau nda mǝnana kǝ pe cauɓikea rǝcandǝa ka.

⁵⁷Sǝa ma sǝm pakki Ɓakuli yàwá mǝnana pākiyia sǝm limurǝm amur cauɓikea andǝ lú nǝ ban Mǝtala sǝm Yesu Kǝrǝsti ka!

⁵⁸Ace mani ka, wun amǝ'eambǝam, wu cam kàngkàng. Ɓǝ̀ kǝgir ɓǝ̀ kǝa gǝshi wun ɗang. Wu pita turo mala Mǝtalabangŋo koya pwari ka, acemǝnana wu sǝlǝna ama ɓe kǝ turo pà kàm wu nǝ̀ pe ace Mǝtalabangŋo, sǝ ture na ɓà ka ɗang.