Read mbula bwazza 1 Amǝ Korinti 4 Bible Online

1 Amǝ Korinti 4 - mbula bwazza bible

1 Amǝ Korinti 4

¹Sǝm ngga, wu sǝn sǝm kǝla amǝturo mala Kǝrǝsti mana tsǝk sǝm, ɓǝ̀ sǝm bǝlia aɓwana ɓalǝ agir mǝsǝcau mala Ɓakuli mǝnana sǝmbǝrǝ cea ɗiɗyal sǝ adyan ngga lǝmndǝnia ka.[40]

²Sǝ gir mwashat ɓǝrɓǝr mǝnana à earkiyi ce arǝ ɓwa mǝnana Ɓakuli nyinggi wi turo a bui ka, nda mǝnana ama, ɓǝa kumi nǝ mǝsǝcau.

³Sǝ kǝgir oasǝam ko bǝti nǝ ɓashi ma'wun, ko mala ɓwapǝndǝa a muram ɗang. Yale mim ngga, ǝn nggǝ ɓashi ɓamuram ɗang.

⁴Sǝ mim ngga, ǝn panǝ sǝlǝe nǝma ǝn pangŋǝna ɓe kǝgir mǝɓane ɗang, kat andǝ amani ka ǝn pa aban bangŋa ama mǝ nda aban pusǝ ɓamuram raka. Acemǝnana kǝ Ɓakuli na mwashat mǝnana nǝ̀ ɓasham ngga.[41]

⁵Ace mani ka, wu kǝa ak dǝmbǝa pakki kǝɓwa ɓashi sǝ pwari nì bwal ɗang. Wu kundǝo she pwari mǝnana Mǝtalabangŋo nǝ̀ yiu nǝi ka. Yì nǝ nggeari, nǝ̀ pusǝ a banfana agir mǝnana aɓwana kǝ pakkia aɓa pǝndǝa ka; nǝ̀ pusǝta agir ɓa-sǝmbǝrǝa mǝnana a ɓabum aɓwana ka[42]. A pwari mǝno sǝ aɓwana mǝnana kat à pak mǝɓoarne ka, à nǝ̀ kum ɓwangsǝban aban Ɓakuli.[43]

⁶Ace ɓoaro ma'wun, wun amǝ'eambǝam, sǝ ǝn kanigir arǝ Apolo andǝ ɓamuram sǝm ɓari, ace mǝnana ɓǝ̀ wu kànì arǝ sǝm yì ɓa cau mǝnana ama, “Wu kǝa twal aɓwana kpǝm ɓǝa kuti gir mǝnana à gilǝ ka ɗang.” Anggo ka pa wun nǝ̀ nggori nǝ ɓeɓwa sǝ wu nǝ̀ ɓǝsǝki ɓeɓwa ɗang.[44]

⁷We ka, a nda ɗàng andǝ acili aɓwana le? Mana gir nì a ndanǝi mǝnana à po nǝ pa raka? Sǝ ɓǝa po nǝ pa ka, man tsǝa sǝ a kǝ nggori kǝla a pak turo ace?

⁸Ado ka, wu kumǝna agir mǝnana kat wu earkiyi cea ka! Wu angŋa dǝmbǝa wu dumǝna amǝkume! Wun ngga, wu dumǝna amurǝma sǝ pà nǝ pě ma'sǝm ɗang rǝ? E, ɓǝ̀ do ama, wun ngga wu duk amurǝma, ace mǝnana sǝm gbal ka, ɓǝ̀ sǝm duk amurǝma ata wun!

⁹Ən nggǝ sǝni kǝla Ɓakuli tsǝk sǝm, sǝm amǝ'mishan, a masǝlǝata agir kat, sǝm duk agir sǝna. Sǝm do kǝla aɓwana mǝnana à kasǝia wia ɓashi-lú a ɓamǝsǝ ɓwapǝndǝa kat andǝ amǝturonjar ka.[45]

¹⁰Ace cau mala Kǝrǝsti ka, sǝm dumǝna amǝ'ɓanggia, sǝ wun ngga wu twali ɓamur rǝ wun ado ama wu ndanǝ sǝlǝe, acemǝnana wu ndaka mala Kǝrǝsti ka! Sǝm ngga, sǝm pànǝ rǝcandǝa ɗang, sǝ wun ngga wu ndanǝ rǝcandǝa! Sǝm ngga à nyesǝ sǝm ɓà, sǝ wun ngga à kǝ pa wun gulo![46]

¹¹Ko ado ka, sǝm dum nǝ nzala andǝ mǝsamur; kǝ asangginagir nda sǝm oasǝo arǝ sǝm ngga; kusǝ pas sǝm nggǝ kum walban; sǝm nggǝ sokki kun sǝm arǝ aban ɗàngɗáng.[47]

¹²Sǝm pak turo nǝ bu sǝm kǝrkǝr. Lang aɓwana sang sǝm ngga, sǝm tsǝki wia bu; lang à pà sǝm tanni ka, sǝm bwal bum sǝm.[48]

¹³Ɓǝ̀ aɓwana tsǝka sǝm cau arǝ sǝm ngga, sǝm nyesǝia wia nǝ cau mǝɓukɓuki. Sǝm ado ka, sǝm nda ka gir ɓeami mala ɓanza, sǝm ndaka agir mǝnana à sukkia a gigi a ɓanza, ko ado ka!

¹⁴Mim ngga, ǝn pa aban gilǝa wun mǝnia ka ace mǝnana ɓǝ̀ ǝn tsǝk wun, wu kum kǝsǝkya ka ɗang. Ən pa anggo ace mǝnana ɓǝ̀ ǝn kwarkir wun kǝla amuna mem mǝnana ǝn earkiyi acea raka.

¹⁵Sǝ ko ɓǝ̀ wu ndanǝ aɓwana aɓa Kǝrǝsti mǝnana à kǝ ɗenyi nǝ wun, lakki malea bwal á-lum ngga, kat andǝ amani ka, wu ndanǝ tárrú mwashat. Acemǝnana aɓa do kpata Kǝrǝsti Yesu ma'wun ngga, mǝ nda kǝ ɓwa mǝnana ǝn duk tár wun ngga, mǝnana yina wun nǝ Cau Mǝɓoarne mala Kǝrǝsti Yesu ka.[49]

¹⁶Ace mani ka, ǝn nggǝ zǝmbǝa wun, wu twal kusǝam.[50]

¹⁷Nda gir mǝnana tsǝa sǝ ǝn tasǝ Timoti aban wun, yì muna mem aɓa kpata Mǝtalabangŋo, yì munem mana à nǝ̀ earnǝi, sǝ ǝn earkiyi ace gbal raka. Yì ka, nǝ̀ kasǝ ɓalǝ wun amur do mem aɓa Kǝrǝsti mǝnana nda mwashat andǝ kanigir mem mǝnana ǝn nggǝ kani amur Kǝrǝsti, arǝ a'ikǝlisiya mǝnana kat ǝn wari kam ngga.

¹⁸Aɓea aɓwana aɓalǝ wun ngga à nda à dum nǝ twal ɓamuru ka, acemǝnana à kǝ sǝni kǝla pà mǝ nǝ yiu a sǝn wun ɗǝm ɗang.

¹⁹Ɓǝ̀ Mǝtalabangŋo ear ka, banì pà nǝ̀ sau ɗang, mǝ nǝ yiu aban wun. Sǝ mǝ nǝ yia sǝlǝ cau mǝnana amǝ twalɓamuru mǝnia banggiyi ka, andǝ man nda rǝcandǝa mǝnana kàngkàng a ndanǝi ka.

²⁰Sǝ Domurǝm mala Ɓakuli ka, pà ace nê nǝ kun ɗang, nda ace pě nǝ rǝcandǝa mala Ɓakuli.

²¹Mǝ ye na ado wu earkiyi ce? Ɓǝ̀ ǝn yiu aban wun nǝ nkamso le, ko ɓǝ̀ ǝn yiu nǝ earcearǝu andǝ ɓukɓuka?