Read mbula bwazza 1 Amǝ Korinti 5 Bible Online

1 Amǝ Korinti 5 - mbula bwazza bible

1 Amǝ Korinti 5

¹À bangŋǝnam ce ama mǝsǝcau kìɗìkì mala nonggi nǝ rǝarǝu na kam aɓalǝ wun, ulang mǝnana ko aɓwana mǝnana à surǝ Yesu Kǝrǝsti raka, à kǝ pak ulang gir nî ɗang, mǝnana à bangŋa ama ɓeɓwa na aɓalǝ wun kǝ nong nǝ mālá tarrí ka![51]

²Sǝ aɓa mǝno anggo ka wu kǝ jali, a kun mǝnana ɓǝ́ wu lumsǝna nǝ bumkiɗikea ka. Sǝ ɓwa mǝnana pak mǝnia yì gir ka, wu pǝri aɓalǝ wun.

³Sǝ kat andǝ amani ama ǝn pa aɓalǝ wun ado raka, ɗenyicau mem na ata wun. Sǝ nggearǝ ɓwa mǝnana pak gir mǝɓane man ngga, ǝn kasǝna ɓashi amuri kǝla mǝ nda aban wun ado.

⁴Aɓa lullǝ Yesu Kǝrǝsti, wu tunǝ kpapi mala amǝkwaɗi, sǝ mim ngga ɗenyicau mem nakam aɓalǝ wun, sǝ rǝcandǝa mala Mǝtalabangŋo Yesu gbal ka, nda kam aɓalǝ wun. Aban mǝnia yì kpapi ka,

⁵wu pusǝ mǝnia yì ɓwa ka, wu turi a ɓabu Shetan, ace mǝnana ɓǝa kiɗiki nggūrǝi mǝnana pakkina cauɓikea nǝi ka, sǝ yilǝmi ka ɓǝ̀ kum auwa a Pwari nyare yiu mala Mǝtalabangŋo.

⁶Nggori ma'wun nǝ mǝnia yì gir ka ɓoar ɗang! Wu sǝlǝ mbak ama mǝnia yì cauɓikea ka nda kǝla mǝsǝ yis[52] mǝnana bǝti ka, nǝ̀ aki ɓa muku nǝ̀ ci ɓǝ̀ vwali?[53]

⁷Dumǝna ama wu nǝ̀ pusǝ mǝnia yì ɓwa mǝɓane ka aɓalǝ wun, ace mǝnana ɓǝ̀ yis mǝ'e mala cauɓikea ɓǝ̀ kǝa pa aɓalǝ wun ɗang, ɓǝ̀ wu do aɓa ɓoarnsari. Anggo ka, wu nǝ̀ do kǝla bǝsa muku pak bǝredi mǝnana yis pa a rǝì raka, kǝla mǝnana wu pak ka. Acemǝnana Kǝrǝsti, mǝgam ma'sǝm mala Lamsan Yalimuru ka, à walni ace sǝm.[54]

⁸Ace mani ka, ɓǝ̀ sǝm pakiɗire mala amsǝban ma'sǝm nǝ bǝredi mǝnana yis pà a rǝì raka, bǝredi mǝɓoarnsari andǝ mǝ'mǝsǝcau nì. Ɓǝ̀ sǝm ngga pe nǝ yis mǝ'e mala ce'shiria andǝ ɓealɓikea ɗang.[55]

⁹Aɓa ɓe cautera mem mǝnana ǝn gilǝa wun ngga, ǝn na wun nǝma wu kǝa kpapi do a tarǝ wun wunǝ aɓwana mǝnana à nda aɓa do kiɗìkì mala nongginǝ rǝarǝia ka ɗang.

¹⁰Sǝa ma ǝn pa aban na cau amur amǝ ɗwanyi kpata Yesu mǝnana amǝ nonggi nǝ rǝarǝu na, ko amǝ sham gir mala ɓwa na, ko amǝ ɓǝmbǝriban na, ko amǝ peri aban ankúl na ka ɗang. Ɓǝ̀ nda anggo ka, lǝmndǝ ama wu nǝ̀ puri ɓanza.

¹¹Ɓa cau mǝnana ǝn nggǝ na ka nda mǝnia ka. Wu pa wu nǝ̀ kpapi do a tarǝ wun wunǝ ɓwa mǝnana tunǝ ɓamuri ama yì ka, mǝ kpata Yesu na, sǝ do aɓa cauɓikea nongginǝ aban, ko do mɓali, ko mǝ kpata alú na ka ɗang. Sǝ pà wu nǝ̀ kpapi do gbal wunǝ ɓwa mǝnana mǝ do na'nyir amur aɓwana na, ko mǝ walki a walo mba na, ko mǝɓǝmbǝriban na ka ɗang. Wu kǝa na ama wu nǝ̀ do wu nǝ̀ li girlina a tarǝ wun wunǝ ulang mǝnia yì ɓwa ka ɗang.

¹²Man oasǝ sǝm arǝ pakki amǝ ɓanza ɓashi? Aɓwana mǝnana aɓa ikǝlisiya ka nda wu nǝ̀ pakkia wia ɓashi ka.

¹³Ɓakuli nǝ̀ pakki aɓwana mǝnana amǝ ɓanza na ka ɓashi. Sǝ kǝla mǝnana Malǝmce bang ngga, “Dumǝna púp wu pǝr ɓwa mǝnana mǝ ɓealɓikea na ka, ɓǝ̀ puri ɓalǝ wun.”[56]