Read mbula bwazza 1 Amǝ Korinti 6 Bible Online

1 Amǝ Korinti 6 - mbula bwazza bible

1 Amǝ Korinti 6

¹Ɓǝ̀ kǝɓwa aɓalǝ wun ndanǝ gir mǝnana kutio a nrea andǝ ɓi mǝkpata Yesu ka, palang sǝ nǝ̀ ká nǝ ce aban amǝ ɓashi mala ɓanza le? Mana tsǝa sǝ pà nǝ̀ ká nǝ ce aban amǝ kpata Kǝrǝsti Yesu ɗang?[57]

²Wun ngga, wu sǝlǝ ama aɓwana mala Ɓakuli na à nǝ̀ ɓashi ɓanza ka re? Sǝ ɓǝ̀ ndo anggo ka, yi mǝnana wu nda wu nǝ̀ ɓashi ɓanza ka, palang ado sǝ wu gandǝ pak ɓashi mala acau mǝkeke ɗang?

³Wu sǝlǝ mbo ama sǝm nda mǝnana sǝm nǝ̀ pakki amǝturonjar ɓashi ka? Sǝ nǝ koshi agir mala ɓanza mǝnia ka!

⁴Ɓǝ̀ ulang acau mǝno kum wun ngga, palang sǝ wu nǝ̀ ngga twal aceì wu nǝ̀ ká nǝia a ɓadǝmbǝa amǝɓashi mǝnana ikǝlisiya kǝ twalia nǝ gulo raka?

⁵Cau kǝsǝkya nǝ wun! Lang ado sǝ à nǝ̀ bangŋa ama kǝɓwa pà kàm aɓalǝ wun mwashat mǝnana ndanǝ sǝlǝe, nǝ̀ gandǝ gilǝki nre ka amǝ'eamrǝarǝu raka ɗang?

⁶Sǝ mǝkpata Ɓakuli pǝlǝa twal ɓi mǝkpata Ɓakuli aban ká aban amǝ ɓashi mala ɓanza!

⁷Ká ma'wun a ndaɓashi ace wuli rǝarǝ wun ngga, lǝmndǝ ama wu kpana amur abu wun. Pà nǝ̀ ɓoaribanì wu li ce arǝ wun re? Pà nǝ̀ ɓoaribanì ɓǝa tǝpǝri wun re?[58]

⁸Sǝ wun, nǝ ɓamur rǝ wun ngga, wu kǝ tǝpǝriban, wu kǝ pak mǝɓane, sǝ amǝ'eam wun na wu pakkiyia wia amǝnia yì agir ka!

⁹Wu sǝlǝ mbak ama amǝ'ɓealɓikea pa nǝ̀ kutio a Domurǝm mala Ɓakuli ɗang? Wu kǝa swarki ɓamur rǝ wun ɗang! Aɓwana mǝnana à kǝ dukdo kiɗìkì mala nonggi nǝ rǝarǝu, ko à kǝ peri ata ankúl andǝ nongginǝ amālá aɓea andǝ abura aɓea ka, à pà nǝ̀ kuti a domurǝm mala Ɓakuli ɗang. Sǝ kǝɓwa pà kàm ata amǝ kìɗìkì mala nongginǝban, ko aburana a rǝarǝia, ko amamǝna gbal a rǝarǝia, mana à nǝ̀ kum kutio a domurǝm mala Ɓakuli ka ɗang.[59]

¹⁰Kat andǝ amǝn'i, andǝ amǝ'mɓali, andǝ amǝ wal walo mba, andǝ amǝ tsǝki aɓwana cau a rǝia, andǝ amǝ ɓǝmbǝriban ngga, à pà nǝ̀ kutio a Domurǝm mala Ɓakuli ɗang.

¹¹Sǝ aɓalǝ wun ngga, anggo sǝ aɓea aɓwana pak ɗiɗyal. Sǝ adyan ngga à langŋǝna wun, à tarna wun ace Ɓakuli, wu dumǝna amǝ'cauɓoarna aɓa lullǝ Mǝtalabangŋo Yesu Kǝrǝsti, sǝ nǝ Bangŋo mala Ɓakuli ma'sǝm.[60]

¹²Ɓe ɓwa nǝ̀ na ama, “Agir kat ka, à earǝ́nam ɓǝ̀ ǝn pea.” Sǝa ma agir kat sǝ à ndanǝ ɓoaro ace pakko gbasha ɗang. E, sǝ ko ɓǝà earǝ́nam ɓǝ̀ ǝn pak koya gir nani ka, pa mǝ nǝ eare, mǝ nǝ duk guro mala kǝgir ɗang.[61]

¹³“Girlina ka nda ace bum, sǝ bum ngga nda ace girlina.” Sǝ yia kǝm ngga Ɓakuli nǝ̀ kiɗikia. Nggūrǝu ka pà ace do kìɗìkì mala nonggi nǝ rǝarǝu ɗang, nda ace pakki Mǝtalabangŋo turo; sǝ Mǝtalabangŋo ka kǝ ɗenyi nǝ nggūrǝu.

¹⁴Ɓakuli loasǝ Mǝtalabangŋo Yesu Kǝrǝsti nǝ yilǝmu a ɓembe, anggo gbal, sǝ nǝ̀ loasǝ sǝm nǝ rǝcandǝa male.

¹⁵Wu sǝlǝ mbak ama anggurǝ wun ngga, abare rǝ Kǝrǝsti na? Sǝ ado ka, mǝ nǝ twal bare rǝ nggurǝ Kǝrǝsti, mǝ nǝ kpapi andǝ mala mǝgyatarǝu le? Ko bǝti, pà nǝ̀ pa anggo ɗang![62]

¹⁶Wun ngga, wu sǝlǝ mbak ama, ɓwa mǝnana kat nong nǝ mǝgyatarǝu ka, nggūrǝia dumǝna mwashat andǝi? Malǝmce bangŋa ama, “Yia mǝnana à nda ɓari ka, à nǝ̀ duk mwashat.”[63]

¹⁷Sǝ ɓwa mǝnana à kpapini andǝ Mǝtalabangŋo ka, à dumǝna mwashat andǝi a ɓa bangŋo.[64]

¹⁸Wu ɓanggi aturo mala kìɗìkì mala nongginǝ rǝarǝu. Acemǝnana acilia acauɓikea mana kat ɓwa kǝ pea ka, à kumsǝ nggūrǝi ɗang, sǝ ɓwa mǝnana kat pak cauɓikea nongginǝ rǝarǝu ka, pangŋǝni nggūrǝi cauɓikea.

¹⁹Sǝ wun ngga, wu sǝlǝ mbak ama nggurǝ wun ngga Ndàmǝgule mala Bangŋo mala Ɓakuli na, mǝnana do a ɓabum wun, mana Ɓakuli pa wun ngga? Wun ngga, wu dupi ɓamur rǝ wun ɗang,[65]

²⁰Yesu kúr wun nǝ gǝna mǝkǝrkǝr nì. Ace mani ka, wu gusǝlǝ Ɓakuli nǝ nggūrǝ wun.[66]