Read mbula bwazza 1 Amǝ Korinti 9 Bible Online

1 Amǝ Korinti 9 - mbula bwazza bible

1 Amǝ Korinti 9

¹Mim ngga, ǝn pa mbak ata rǝam mǝ nǝ duk ulang do mǝnana ǝn earkiyi ce ka? Mim ngga mǝ nda mǝ'mishan re? Ən sǝn ma Yesu Mǝtala sǝm nǝ mǝsǝam re? Do mǝnana wu duk amǝkwaɗi ka, pà ace turo mem mǝnana ǝn pakki Mǝtalabangŋo ka re?[92]

²Ko ɓǝ̀ ndo ama aɓea aɓwana em ama mǝ nda mǝ'mishan raka, dumǝna ama wun ngga, wu nǝ̀ em! Acemǝnana wun ngga, wu nda ka gir'lǝmndǝa aɓa mǝsǝcau mala turo mishan mem aban Mǝtalabangŋo.

³Mǝnia ka nda kunam aban aɓwana mǝnana à kǝ earce surǝ rǝcandǝa mala duk mǝ'mishan mem ngga.

⁴Nggearǝ sǝm ngga, sǝm kārǝa ɓǝa pà sǝm girlina andǝ girnuna re?[93]

⁵Aɓea amǝ'mishan, andǝ amǝ'eam Mǝtalabangŋo andǝ Bitǝrus ka, à kǝ twal amālea atea aban kà turo. Sǝm ngga, pà sǝm nǝ̀ gandǝ pa kǝla yia re?[94]

⁶Ko mim sǝnǝ Barnabas ka, sǝm nda ka kǝ aɓwana mǝnana duk púp sǝm nǝ̀ nggǝ pak turo ace linǝ́ ɓamur rǝ sǝm ngga le?[95]

⁷Ya soje nani mǝnana à kǝ mbwe aɓa turo soje male raka? Ya mǝ'rya nani mǝnana pà nǝ̀ li ɓǝlanggun mala ɓaban male raka? Sǝ ya yalgir nani mǝnana pà nǝ̀ nu kiura mala agirkusǝu male raka?

⁸[96]Mǝno ka nê mala ɓamuram na le? Nggearǝ Nggurcau mala Musa bangŋa anggo re?

⁹Nda kam à gìlǝì aɓa Nggurcau mala Musa ama, “Kǝa na ama a nǝ kùr kún nda-rya mǝnana a kǝ pangŋǝna turo nǝi aban nya mǝssa ka ɗang.” Ado ka, wu kǝ sǝni kǝla Ɓakuli na aban na cau amur ɗenyi nǝ anda-rya le?[97]

¹⁰Pa aban na cau ace sǝm re? Mǝsǝcau, nda ace sǝm sǝ à gilǝ mǝnia yì cau ka. Lǝmndǝ ama ɓwa mǝnana kat kwár ban-rya, sǝ ɓwa mǝnana nya mǝssa ka, yia kǝm ngga, à tsǝk ɓalǝia à nǝ̀ li aɓa mǝnia yì mǝssa à pakkiyi ture ka.

¹¹Mǝnana sǝm ɓealna mǝsǝɓeale cau mala Ɓakuli a ɓabum wun ngga, ɓoaro ɓǝ̀ sǝm kum girlina aban wun re?[98]

¹²Ɓǝ̀ wu pea aɓea aɓwana mana à hamnǝ cau mala Ɓakuli aban wun ngga gbasha aɓalǝ agirkuma ma'wun ngga, sǝm ngga ɓoaro ɓǝ̀ sǝm kumo ɓǝ̀ kuti malea re? Sǝa ma anggo ka, sǝm pak turo nǝ mǝnia yì bancame ka ɗang. A kúnì ka, sǝm bwal rǝ sǝm aɓalǝ agir kat, acemǝnana ɓǝ̀ sǝm ngga pak kǝgir mǝnana nǝ̀ tsǝa ɓwapǝndǝa nǝ̀ ɗwanyi ok Cau Amsǝban mala Kǝrǝsti ka ɗang.

¹³Wun ngga, wu sǝlǝ mbo ama aɓwana mǝnana à kǝ pak turo aɓa Ndàmǝgule mala Ɓakuli ka, àkǝ̀ banì sǝ à nǝ̀ kum girlina? Sǝ aɓwana mǝnana à kǝ pak turo mala ɗarǝa amur gyangŋan nǝ́ agir mǝnana à yinǝia ka, àkǝ̀ ɓālǝi sǝ à nǝ̀ li re?[99]

¹⁴Anggo gbal, Mǝtalabangŋo tsǝngŋǝna nzongcau ama aɓwana mǝnana à kǝ hamnǝ Cau Amsǝban ngga, àkǝ̀ ɓālǝi sǝ à nǝ̀ kum gir dola malea.[100]

¹⁵Sǝ yale ǝn pak turo nǝ kǝ kina aɓalǝ amǝno yì agir ka ɗang. Sǝ ǝn pa aban gilǝa wun acemǝnana ɓǝ̀ wu pakkam anggo ado ka ɗang. Ɓoaribani ɓǝ̀ ǝn wú, amur mǝnana ɓeɓwa ɓǝ̀ tamsǝam arǝ nggori nǝ turo hama mǝnana alta mbweban ace pà kàm raka.[101]

¹⁶Kat andǝ amani ka, pà mǝ nǝ jali ace hamnǝ Cau Amsǝban ɗang, acemǝnana dumǝnam púp ɓǝ̀ ǝn hamnǝi. Ɓǝ̀ ǝn hamnǝ Cau Amsǝban raka, mǝ nda aɓa ká gir'murmwana!

¹⁷Ɓǝ̀ twale mala ɓamuram na sǝ ǝn nggǝ hamnǝ cau ka, à nǝ̀ mbwem; sǝ ǝn nggǝ pe, acemǝnana gir na mǝnana Ɓakuli nǝ̀ pam ama ɓǝ̀ ǝn pe ka.[102]

¹⁸Mana nda tangnakusǝam? Kǝ gir mǝnana nda tangnakusǝam ngga, nda njar mana Ən kumo mala hamnǝ Cau Amsǝban mǝnana pà a tarǝia andǝ mbweban raka. Nda gir mana tsǝa sǝ pà mǝ nǝ alta gir mǝnana nǝma à nǝ̀ pakkam ace turo hamnǝ Cau Amsǝban mǝnana ǝn nggǝ pak ka ɗang.[103]

¹⁹Mim ngga mǝ nda ata rǝam, mǝ nda guro mala kǝɓwa ɗang. Mǝ nda mǝnana ǝn tsǝk ɓamuram, ǝn duk guro mala koyan ngga, ace mǝnana ɓǝ̀ ǝn yinǝ aɓwana pas aban Kǝrǝsti.

²⁰Aɓalǝ amǝ Yahudi ka, ǝn do kǝla ɓwa Yahudi, ace mǝnana ɓǝ̀ ǝn yinǝ amǝ Yahudi aban Yesu ka. Aɓalǝ aɓwana mǝnana a nda aɓata Nggurcau mala Musa ka, ǝn do kǝla yia, kat andǝ amani ama dupam pup ɓǝ̀ ǝn kpata Nggurcau mala Musa raka. Ən pa anggo ace mǝnana ɓǝ̀ ǝn yinǝia aban Yesu.[104]

²¹Anggo gbal, ɓǝ̀ mǝ nda aban pak turo aɓalǝ aɓwana mana à surǝ Nggurcau mala Musa raka, ǝn mgbali cau mala Nggurcau a giriban, ǝn do kǝla yia, ace mǝnana ɓǝ̀ ǝn yinǝia aban Yesu. Mǝnia ka lǝmndǝ ama ǝn ɓinǝ kpata Nggurcau mala Musa ɗang; mim ngga mǝsǝcau ka, mǝ nda aɓata Nggurcau mala Kǝrǝsti.[105]

²²Aɓalǝ aɓwana mǝnana à panǝ rǝcandǝa raka, ǝn do kǝla mwashat aɓalǝia, ace mǝnana ɓǝ̀ ǝn nunnia aban Yesu. A masǝlǝate ka ǝn duk koya gir ka aban aɓwana kat, ace mǝnana ɓǝ̀ ǝn amsǝ aɓwana aɓalǝia a koya njar mǝnana nǝ̀ gandǝ pak ka.[106]

²³Mim ngga ǝn pak amǝnia yia agir kat ka, ace mǝsǝrǝ Cau Amsǝban, ace mǝnana ɓǝ̀ ǝn kum kāmbe mem aɓalǝ atsǝkbu mana à ndakam a ɓalǝi ka.

²⁴Wu sǝlǝ mbak ama aɓa ɗire ɓanggi-amire ka, aɓwana pas sǝ à nǝ̀ ɓangŋa, sǝ ɓwa mwashat na nǝ̀ li, nǝ̀ kum tangnakusǝi ka? Wun ngga, wu nǝ̀ ɓangŋa anggo gbal, ace mǝnana ɓǝ̀ wu kum tangnakusǝ wun.[107]

²⁵Aɓwana mǝnana kat à nǝ̀ kutio aɓa pakiɗire ɓanggi-amire ka, dumǝna ama à nǝ̀ pa rǝia ace kwar rǝǔ mala ɓangmire. Yia ka à kǝ pa anggo ace mǝnana à nǝ̀ kum tangnakusǝu mana nǝ̀ mal ka; sǝ ma'sǝm ngga, sǝm nggǝ pe ace tangnakusǝu mǝnana pà nǝ̀ mal raka.[108]

²⁶Nda gir mǝnana tsǝa sǝ ǝn nggǝ ɓangmire nǝ mǝsǝam jik aban ká masǝlǝate ka; mǝ nda kǝla mǝ'ta dambe mǝnana kǝ tāban ɓà raka.

²⁷Ən kani nggūrǝam gir, ǝn ci ɓǝ̀ tanni ace mǝnana ɓǝ̀ okam; ǝn nggǝ pa anggo ace mǝnana, anzǝm mana ǝn hamǝni aɓwana Cau Amsǝban ngga, mim nǝ ɓamuram ngga, ɓǝa kǝa ginǝam, à girǝam nǝ tangnakusǝam ɗang.[109]