Read mbula bwazza 2 Amǝ Korinti 10 Bible Online

2 Amǝ Korinti 10 - mbula bwazza bible

2 Amǝ Korinti 10

¹Mim Bulǝs ǝn nggǝ zǝmbǝa wun ace nongsǝmuru andǝ ɓukɓuka mala Kǝrǝsti, ǝn sǝlǝna wu kǝ twali ama, ɓǝ̀ mǝ nda aban wun ngga, ǝn loasǝki kunam ɗang, sǝ ɓǝ̀ mǝ nda zak ka, ǝn nggǝ na wun cau nǝ rǝcandǝa aɓalǝ acautera.

²Ən nggǝ zǝmbǝa wun adyan, wu kǝa ciem ɓǝn yiu ka, mǝ yi na cau nǝ pekiban ɗang; acemǝnana mǝ nǝ gandǝ peki aɓwana mǝnana à kǝ na ama sǝm nggǝ pakkia agir a pě mala amǝɓanza ka.

³Kat andǝ amani ama sǝm ndanǝ do aɓa ɓanza ka, sǝm nggǝ munǝo kǝla mǝnana ɓanza munǝkiyi ka ɗang.

⁴Agirbura mǝnana sǝm munǝkiyi nǝia ka, agirbura mala ɓanza na ɗang; agirbura ma'sǝm ngga à ndanǝ rǝcandǝa mala Ɓakuli ace kiɗiki akanggǝrang-ban mala aɗenyicau mǝɓane mala ɓwapǝndǝa, andǝ amakgir mǝ'nyirì.

⁵Sǝm nggǝ kiɗiki koya ne mala ɓwapǝndǝa aɓa gusǝlǝ-muru male mǝnana à kǝ kasǝkun aɓwana ɓǝa kǝa surǝ Ɓakuli raka. Sǝm nggǝ kurki aɗenyicau mala mgbikiru, sǝ sǝm nggǝ cia ɓǝa oki Kǝrǝsti.

⁶Sǝ anzǝm mǝnana ɓǝ̀ okiru ma'wun yi lumsǝna ka, sǝm nǝ̀ kur rǝ sǝm ace kwarkir ko ya ɗwanyi okiru nǝ pa tanni.

⁷Wun ngga, wu kǝ twal agir a sǝne mala mǝsǝu. Ɓǝ̀ à kǝ ɓwana kǝ twali ɓamuria ama à ndaka mala Kǝrǝsti ka, yia ka ɓǝa ɓǝsǝlǝ pak ɗenyicau, acemǝnana sǝm gbal ka, sǝm nda ka mala Kǝrǝsti kǝla yia.

⁸Sǝ ɓǝ̀ ǝn nggǝ nggori kǝrkǝr nǝ rǝcandǝa mǝnana Mǝtalabangŋo pa sǝm ace ɓak wun, pà ace kiɗiki wun raka, kǝsǝkya pa nǝ̀ pakkam arǝ nggori ɗang.

⁹Ən pa aban ɓariki mǝ nǝ pa wun ɓangciu nǝ acautera mem ɗang.

¹⁰Acemǝnana aɓea aɓwana kǝ na ama, “Acautera mala Bulǝs dǝmbǝrya sǝ à ndanǝ rǝcandǝa, sǝ ɓǝ̀ nda nǝ ɓamǝsǝi aban sǝm ngga, mǝ'rǝwukea na sǝ aɓa nacau ka sǝlǝ tsǝk acau ɗang.”

¹¹Amǝno yì aɓwana ka, ɓǝa sǝlǝ ama pwari mǝnana sǝm warina nǝ ɓamur rǝ sǝm ngga, sǝm nǝ̀ pang nǝ rǝcandǝa kǝla cau ma'sǝm mǝnana sǝm gilǝa aɓalǝ acautera aban sauwa ka.

¹²Sǝm ngga, sǝm kārǝa sǝm nǝ̀ karǝ rǝ sǝm sǝnǝ aɓwana mǝnana à kǝ ɓwangsǝ ɓamuria, ko ana raka, sǝm nǝ̀ na ama, sǝm nǝ̀ twal ɓamur rǝ sǝm mwashat sǝnǝia ka ɗang. Sǝ ɓǝà kǝ̀ karǝki rǝia a rǝarǝia, sǝ à kǝ sǝn purki rǝǔ malea ka, à nda aɓa ɗwanyi sǝlǝe!

¹³Nggori ma'sǝm ngga pà nǝ̀ yàllî ban mǝnana rǝcandǝa mala turo ma'sǝm go kam ngga ɗang. Sǝm nǝ nggori amur agir mǝnana à kumban aɓa nzong mala turo mǝnana Ɓakuli pà sǝm, mǝnana kpapi turo ma'sǝm aɓalǝ wun ngga.

¹⁴Sǝ acemǝnana wu nda aɓa ban mǝnana turo man go kam ngga, ká ma'sǝm aban wun nǝ Cau Amsǝban mala Kǝrǝsti ka, sǝm yàl nzong ɗang,

¹⁵Sǝ sǝm yàl nzong gbal nǝ nggori nǝ turo mǝnana aɓea ɓwana pè ka ɗang. Tsǝkɓalǝu ma'sǝm ngga, nda mǝnana ama ɓǝ̀ paɓamuru ma'wun gulo, ace mǝnana nzong turo ma'sǝm aban wun ngga, ɓǝ̀ turo a dǝmbǝa.

¹⁶Anggo ka sǝm nǝ̀ gandǝ o arǝ aɓea ban mǝnana à nda a dǝmbǝa nǝ wun, aban mǝnana kǝɓwa malaká pak turo kam raka. Sǝm nǝ ngga hamnǝ Cau Amsǝban nggam, sǝ kǝcau pà nǝ̀ lo ɗǝm ama, sǝm nggǝ nggori nǝ turo mana à pè aban turo mala ɓeɓwa ka ɗang.

¹⁷Kǝla mǝnana Malǝmce na ka, “Ɓǝ̀ kǝ ɓwa nǝ̀ nggori ka, ɓǝ̀ nggori nǝ turo mǝnana Mǝtalabangŋo pangŋǝni ka.”[32]

¹⁸Acemǝnana ɓwa mana ɓwangsǝ ɓamuri ka nda à nǝ̀ earnǝi ka ɗang, she ɓwa mǝnana Mǝtalabangŋo ɓwangsǝi ka.