Read mbula bwazza 2 Amǝ Korinti 12 Bible Online

2 Amǝ Korinti 12 - mbula bwazza bible

2 Amǝ Korinti 12

¹Dumǝnam ama mǝ nggori, ko kat andǝ amani ama pà nǝ̀ pur kǝgir raka. Sǝ ado ka, mǝ nǝ na cau amur asǝnsǝna andǝ acausǝna mǝnana Mǝtalabangŋo lǝmndǝamia ka.

²Ən surǝ ɓeɓwa aɓa Kǝrǝsti pǝlǝa lum-nong-ine mǝno kuti ka, mǝnana à fwe à um nǝi a tāruia kuli ka. Ko nda aɓa nggūrǝu, ko pa aɓa nggūrǝu ɗang, ǝn sǝlǝ mǝno ka ɗang, kǝ Ɓakuli na surǝì ka.

³Earka nda aɓa nggūrǝu, ko pa aɓa nggūrǝu ɗang. Mim ngga, ǝn sǝlǝ ɗang, kǝ Ɓakuli na sǝlǝ ka, ama mǝnia yì ɓwa ka,

⁴à twali à um nǝi a paradayis a kuli. Kya ok acau mǝcandǝke, agir mǝnana ɓwapǝndǝa pa nǝ̀ gandǝ nea nǝ kuni raka.

⁵Mǝ nǝ nggori nǝ mǝnia yì ɓwa ka, pa mǝ nǝ nggori nǝ ɓamuram ɗang. Mǝ nǝ nggori nǝ rǝwukya mem.

⁶Ko ɓǝ̀ ǝn earce nǝma mǝ nǝ nggori ka, pa mǝ nǝ duk ɓwaɓana ɗang, acemǝnana mǝsǝcau na mǝ nǝ na ka. Sǝ pa mǝ nǝ nggori ɗang, acemǝnana ǝn earce nǝma kǝɓwa ɓǝ̀ kǝa ɓwangsǝam, ɓǝ̀ kutiban gir mǝnana à sǝni a ɓalǝam, ko à kǝ̀ oe a kunam ngga ɗang.

⁷Ɓakuli lǝmndǝam asǝnsǝna amǝpa ndali, sǝ ace mǝnana mǝ ngga pak nǝ twal ɓamuru ace raka, à oasǝam zwe aɓa nyamam[40], ɓǝ̀ do kǝla mǝturonjar mala Shetan, ɓǝ̀ kǝ param.[41]

⁸Kusǝ tārú mǝ nda ban zǝmbǝi Mǝtalabangŋo nǝma ɓǝ̀ pusǝami.

⁹Sǝ koya zǝmbǝa ka, kǝ earam ama, “Ɓwamuru mem nda kǝgir mǝnana à kǝ earce ka. Rǝcandǝa mem kǝ pak turo pepe aɓa rǝwukya.” Ace mani ka, ban kǝ ɓoaram, mǝ nǝ nggori nǝ rǝwukya mem ace mǝnana ɓǝ̀ rǝcandǝa mala Kǝrǝsti ɓǝ̀ pakturo nǝ mim ngga.

¹⁰[42]Nda gir nî sǝ ban kǝ ɓoaram arǝ rǝɓunggia mem, andǝ sanggiban, andǝ domǝkwane, andǝ pàtanni, andǝ atanni mǝnana ǝn nggǝ kutio aɓalǝia ace Kǝrǝsti ka. Acemǝnana ɓǝ̀ mǝ nda aɓa rǝɓunggia ka, sǝ mǝ nǝ̀ kum rǝcandǝa.

¹¹Ən kutia pakkiagir kǝla ɓwaɓana. Sǝ wu nda wu ciem a ɓalǝi ka, a kun mǝnana ɓǝ́ wu nǝ̀ nggǝ ɓwangsǝam ngga. Acemǝnana amǝno yì “akanggǝrang amǝ'mishan” ma'wun ngga, à kutiam nǝ kǝgir ɗang, kat andǝ amani ama mǝ nda kǝgir gbal raka.

¹²Mǝnana mǝ nda aban wun ngga, wu sǝnǝna agir mǝnana à lǝmndǝ ama mǝ nda mǝ'mishan ngga; agir-lǝmndǝa, andǝ agir-gyambǝliban, andǝ agir-ndali mǝnana à pea aɓa turo mem aɓalǝ wun nǝ gandǝrǝu ka.

¹³Mana gir nì na ǝn pakki acilia a'ikǝlisiya sǝ ǝn pakka wun ɗang? Kǝgir mǝnana ǝn pakka wun raka nda mǝnana ama ǝn dupa wun twalo a bui mala boalo raka. Ida wu twalam ban mǝnia yì ɓwarkio ka!

¹⁴Ado ka, mǝ ndo ǝn nggǝ na ce tāruia ká mem aban wun ngga, sǝ pà mǝ nǝ dupa wun twalo ɗang. Agirkuma ma'wun na ǝn alkiyite ka ɗang. Kǝ wun na ǝn earkiyi ce ka. Ko ɓǝ̀ mani na raka, amuna na à nǝ̀ rambǝi amǝɓǝlia gǝna ka ɗang, amǝɓǝlban na à kǝ rambǝi amuna gǝna ka.

¹⁵Ace mani ka, bumam nǝ pwasǝo mǝ kiɗiki koya gir nani mǝ ndanǝi ka, andǝ nggearǝ ɓamuram, ace yilǝmi wun. Sǝ nggearǝì ka, acemǝnana ǝn earce wun kpǝm ngga nda tsǝa sǝ wu earcem bǝti ka le?

¹⁶Aɓea aɓwana aɓalǝ wun earǝna ama mǝ nda twalo aban wun ɗang. Sǝ aɓea aɓwana ka à kǝ na ama, mǝ nda nggea-mǝkutan, ǝn limǝsǝ wun nǝ swarkiban.

¹⁷Sǝ lang sǝ mǝno ka pa? Aɓwana mǝnana ǝn tasǝia aban wun ngga, kǝ ɓwa atea tǝpǝri wun le?

¹⁸Ən ɓuaki arǝ Titus ɓǝ̀ kyane aban wun, sǝ ǝn tasǝ ɓe mǝ'eamrǝarǝu ɓǝa kyan andǝi. Titus kya tǝpǝri wun le? Kǝ̀ bangŋo mǝ'mwashati na pak turo nǝ sǝm, sǝ kǝ̀ njargula mǝ'mwashati na sǝm kpate ka re?[43]

¹⁹Yakǝla wu kǝ sǝni kǝla acau mǝnia sǝm nggǝ nea ka, nda ace pusǝ ɓamur rǝ sǝm. Awo! Sǝm nggǝ bangga wun mǝnia ka kǝla aguro mala Kǝrǝsti, sǝ Ɓakuli nda mǝ'nakún sǝm. Koya gir sǝm pak ka, wun amǝ'eamrǝarǝu, nda ace pa wun rǝcandǝa.

²⁰Ɓangciu kǝ pakkam ama ɓǝ̀ ǝn yiu ka, yakǝla mǝ nǝ yia kum wun pà kǝla mǝnana mǝ nǝ earce ɓǝ̀ wu pak ka ɗang, sǝ wun ngga, yakǝla wu kumam pa kǝla mǝnana wu nǝ̀ earcem mǝ pak ka ɗang. Ɓangciu kǝ pakkam ama, mǝ nǝ yia kum kúnɓuana, andǝ mɓali, andǝ bumlulla, andǝ earce-ɓamuru, andǝ kiɗikiɓwa, andǝ twal-lullǝu, andǝ candǝmuru, andǝ zuriki nre-rǝarǝu.[44]

²¹E, ɓangciu kǝ pakkam ama ɓǝ̀ ǝn yiu aban wun ɗǝm ngga, Ɓakuli mem nǝ̀ kyauwikiam a ɓadǝm wun. Sǝ ɗǝm ngga ǝn nggǝ ɓangŋa ama mǝ nǝ kum bumkiɗikea amur aɓwana pas ata wun. Aɓwana mǝnana à malaká nying buia arǝ acauɓikea mǝ'e malea mala pǝndǝki rǝarǝu, andǝ kiɗìkì mala nongginǝ-rǝarǝu, andǝ do-kiɗìkì mala gyatarǝu raka.