Read mbula bwazza 2 Amǝ Korinti 3 Bible Online

2 Amǝ Korinti 3 - mbula bwazza bible

2 Amǝ Korinti 3

¹Sǝm nda ban tita ɓwangsǝ ɓamur rǝ sǝm ɗǝm le? Ko dumǝna ama sǝm ngga ɓǝ̀ sǝm pang nǝ acautera mǝnana à nǝ̀ lǝmndǝ ayana nda sǝm aban wun, ko ɓǝ̀ sǝm alte ɓǝ̀ wu gilǝ amǝnana à nǝ̀ ne acilia aɓwana cau amur sǝm, kǝla mǝnana a ɓea ɓwana pakkiyi ka le?

²Wun nǝ ɓamur rǝ wun ngga wu nda ka cautera ma'sǝm mala lǝmndǝ ayana nda sǝm, mǝnana à gilǝì a ɓabum sǝm, mǝnana koyana le ka, nǝ̀ gandǝ ɓallè, sǝ nǝ̀ surǝ aturo ma'sǝm mǝɓoarne aɓalǝ wun.

³Nda a banfana ama, wu nda ka cautera mǝnana Kǝrǝsti nǝ nggearǝì nǝ̀ gilǝì ka. Sǝ yì cautera ka nda gir mǝnana pur aɓa turo-mishan ma'sǝm ngga. À gilǝì nǝ biro ɗang, nda nǝ Bangŋo mala Ɓakuli mǝyilǝmuì sǝ à gilǝì. Pà amur akpamgbang tali sǝ à gilǝì ɗang, nda a ɓabum ɓwapǝndǝa.[7]

⁴Sǝm bang mǝnia ka, acemǝnana sǝm ndanǝ mǝsǝkang-kangŋa a ɓadǝm Ɓakuli nǝ ban Kǝrǝsti.

⁵Sǝm pa aban bang ama sǝm karǝna a mala pak mǝnia yì turo aɓa rǝcandǝa ma'sǝm ɗang. Kārǝa ma'sǝm ngga, pur nǝban Ɓakuli.

⁶Yì na nyesǝ sǝm, sǝm duk amǝturo-mishan mala bǝsa kurcau ka. Mǝnia ka, kurcau mala Nggurcau mala Musa mǝnana à gilǝì nǝ gilǝe ka na ɗang, mala Bangŋo mala Ɓakuli na. Kpata kurcau mǝ'e, mǝnana à gilǝì nǝ gilǝe ka, kǝ kánǝban a lú, sǝ mala bǝsa kurcau, mǝnana kpate nda kpata gi Bangŋo ka, nǝ̀ kánǝban a kum yilǝmu.[8]

⁷Kurcau mǝ'e mana anggurcau male ka Ɓakuli gilǝia a nzǝm kpamgbang tali sǝ pe Musa ka, yiu nǝ pàcau mala lú, kat andǝ amani ka yiu a tarǝia andǝ tá mala ɓoarɓwa mala Ɓakuli. Lang Musa nǝ̀ yinǝi aban aɓwana ka, ɓoarɓwa male tsǝa ɓamǝsǝ Musa kǝ tá karara, amǝ Isǝrayila gandǝ came à nǝ̀ sǝn ɓamǝsǝi ɗang, ace ɓiki tá male. Nǝ nzǝmo ka mǝno yì tá ka twal amsǝa yi ndǝrmia.[9]

⁸Ɓǝ̀ kurcau mǝ'e kum ɓoarɓwa anggo ka, lang sǝ ɓoarɓwa mǝnana à nǝ̀ kumo aɓata kurcau mǝbǝshe ka nǝ̀ pa, ado mǝnana Bangŋo Mǝfele kǝ pa yilǝmu ka?

⁹Ɓǝ̀ kurcau mǝ'e, mǝnana kǝ kasǝ ɓashi-lú amur ɓwa, ndanǝ ɓoarɓwa anggo ka, ɓoarɓwa mala kurcau mǝbǝshe, mǝnana kǝ pa yilǝmu ka, pà nǝ̀ kuti mǝno kpǝm nǝ gulo re?

¹⁰Mǝsǝcau, ɓoarɓwa mala kurcau mǝ'e mǝnana ndakam ɗiɗyal ka, adyan ngga ɓoarɓwa na ɗang ko bǝti, ɓǝa kārǝí arǝ ɓoarɓwa mala bǝsa kurcau, mǝnana karmuri nǝ gulo ka.

¹¹Sǝ ɓǝ̀ kurcau mǝ'e mǝnana te malǝna ka, yiu nǝ ɓoarɓwa ka, mala kurcau mǝbǝshe mǝnana te pà nǝ̀ mal raka, ɓoarɓwa male nǝ̀ kutibanì kǝrkǝr.

¹²Sǝ acemǝnana kurcau mǝbǝshe kǝ pa sǝm ulang mǝno yì tsǝkɓalǝu ka, sǝm ndanǝ mǝsǝkang-kangŋa.

¹³Pà sǝm nǝ̀ kumsǝ lagir a ɓamǝsǝ sǝm kǝla mana Musa pak ka ɗang. Musa gìr ɓamǝsǝi nǝ lagir ace mǝnana amǝ Isǝrayila ɓǝa kǝa sǝn málá mala ta mala ɓoarɓwa mǝnana a ɓamǝsǝi ka ɗang, kat andǝ amani ama ɓoarɓwe na arǝ mal ka.[10]

¹⁴Sǝ amǝ Isǝrayila ka ɓabumia girkina, ba yalung ko aya pwari sǝ à ndarǝ ɓal amalǝmce mala kurcau mǝ'e ka, mǝno yì lagir ka nda kam piu a ɓamǝsǝia. Yì lagir ka, à kǝ gandǝ pusǝe ɗang, she ɓǝ̀ ɓwa pànà ɓamuri aban Kǝrǝsti ka.

¹⁵E, ko yalung sǝ ɓǝa ɓal Nggurcau mala Musa ka, mǝno yì lagir ka, girǝna ɓabumia, à pà nǝ̀ bwalte ɗang.

¹⁶Sǝ ɓǝ̀ nda a ya pwari sǝ ɓwa pǝlǝ rǝì aban Mǝtalabangŋo ka, mǝno yì lagir ka à pusǝni![11]

¹⁷Mǝtalabangŋo andǝ Bangŋo ka à nda mwashat, sǝ ban mǝnana Bangŋo mala Mǝtalabangŋo na kam ngga, panzǝban na kam.

¹⁸Sǝm mǝnana kat sǝm panǝ lagir a ɓamǝsǝ sǝm raka, sǝ sǝm ndarǝ lǝmndǝ ta mala ɓoarɓwa mala Ɓakuli ka, à nda rǝ nggaɗi sǝm ɓǝ̀ sǝm pa kǝla yì, nǝ ɓoarɓwa mǝnana kǝ ká nǝ ká a dǝmbǝa ka. Mǝnia yì ɓoarɓwa ka pur nǝban Mǝtalabangŋo mǝnana nda Bangŋo ka.