Read mbula bwazza 2 Amǝ Korinti 5 Bible Online

2 Amǝ Korinti 5 - mbula bwazza bible

2 Amǝ Korinti 5

¹Anggurǝ sǝm ngga à nda kǝla agumli mǝnana sǝm dukiyi aɓalǝia akani a ɓanza. Sǝa ma ɓǝ amǝnia yì agumli sanggina ka, sǝm sǝlǝna ama Ɓakuli nǝ̀ pe ko yan ata sǝm ngga ɓala a kuli, nggūrǝu mǝnana malkiyi raka, mǝnana Ɓakuli nǝ nggearǝì gilǝki ace sǝm, bu ɓwapǝndǝa nǝ̀ pè raka.

²Aɓa mǝnia yì gumli ka, sǝm nggǝ ingge, rǝ sǝm kǝ ɓǝla ace kutia ɓala mǝnana a kuli ka, kǝla oasǝ bǝsa agir-nggurǝu.

³Acemǝnana ɓǝ̀ sǝm oasǝni ka, pà sǝm nǝ̀ duk gbǝrangtang ɗang.

⁴A do ma'sǝm aɓa mǝnia yì gumli a ɓanza ka, sǝm nggǝ ingge aɓata dǝmbǝrya mala atanni. Ingge ma'sǝm ngga pà acemǝnana sǝm nggǝ earce swár nggūrǝu mala ɓanza ka ɗang, nda acemǝnana sǝm nggǝ earce oasǝ nggūrǝu mala kuli, ace mǝnana nggurǝ sǝm mǝnana kǝ wu ka, à nǝ̀ nggaɗi nǝ mǝnana pà nǝ̀ wu raka.

⁵Ɓakuli nǝ nggearǝì nda mǝnana gilǝki sǝm ace mǝnia yì nggaɗi ka, sǝ pà sǝm Bangŋo Mǝfele male acemǝnana ɓǝ̀ lǝmndǝ ama anggo sǝ nǝ̀ yia lumsǝo.

⁶Ace mani ka, sǝm ndanǝ mǝsǝkang-kangŋa ko aya pwari, kat andǝ amani ama sǝm sǝlǝna ama, ɓǝ̀ sǝm ndakani nǝ yilǝmu aɓa nggūrǝu a ɓanza ka, sǝm pà la aban Mǝtalabangŋo ɗang.

⁷Do ma'sǝm ngga, do guli arǝ Ɓakuli na, mala sǝngir nǝ mǝsǝu na ɗang.

⁸E, sǝm ndanǝ mǝsǝkang-kangŋa, ɓǝ́ eare ma'sǝm ngga, ɓǝ̀ sǝm gapi tarǝ sǝm sǝnǝ mǝnia yì nggūrǝu mala ɓanza ka, ɓǝ̀ sǝm do aban Mǝtalabangŋo.

⁹Sǝ ado ka, tsǝkdǝmbǝu ma'sǝm ngga, nda mǝnana ɓǝ̀ sǝm pwasǝ bumi, ko sǝm ndakani aɓa mǝnia yì nggūrǝu, ko sǝm purini ɓalǝi.

¹⁰Acemǝnana sǝm kat ka, dumǝna púp sǝm nǝ̀ ngga came, sǝ do ma'sǝm nǝ̀ lǝmndǝ kwas, a ɓadǝm buno pak ɓashi mala Kǝrǝsti. Ko yan ata sǝm ngga nǝ̀ kum gir mana kārǝa arǝ gir mǝnana pè aɓa mǝnia yì nggūrǝu a ɓanza ka, ko mǝɓoarne ko mǝɓike.[14]

¹¹Sǝm ngga sǝm surǝna rǝ mana nda ɓanggi Mǝtalabangŋo, sǝ sǝm nggǝ ɓariki sǝm nǝ̀ nun ɗenyicau mala aɓwana abani. Ɓakuli ka surǝna rǝ sǝm pepe, sǝ tsǝkɓalǝu mem ngga nda mǝnana ama wun ngga wu surǝna rǝ sǝm gbal anggo aɓa ɗenyicau ma'wun.

¹²Sǝm pà aban ɓariki ɗǝm ama sǝm nǝ̀ ɓwangsǝ ɓamur rǝ sǝm aban wun ɗang. Awo, sǝm nda ban pà wun tǝ́r gir mǝnana wu nǝ̀ jali nǝ sǝm nǝi ka, ace mǝnana ɓǝ̀ wu kum cau mǝnana wu nǝ̀ ne aɓwana mana à kǝ nggori nǝ puro mala ɓwa aɓa nggūrǝu sǝ à fali nǝ ɓealǝia raka.

¹³Ɓǝ̀ lǝmndǝa kǝla dǝm sǝm kwar raka, nda àkǝ̀ ce gulo mala Ɓakuli. Sǝ ɓǝ̀ sǝm kwar nǝ kwaro ka, nda àkǝ̀ ce ɓoaro ma'wun.

¹⁴Ɓǝ̀ nda a koya nkanggari ka, earcearǝu mala Kǝrǝsti kǝ yal sǝm. Acemǝnana sǝm pana eare ama, Kǝrǝsti wu ace ɓwapǝndǝa kat ka, sǝm pana eare gbal ama sǝm kat ka, sǝm nda te aɓa lú male.

¹⁵Yi wu ace koyana le ka, ace mǝnana aɓwana mana à ak yilǝmu mǝbǝshe male ka, ɓǝa kǝa dupi ɓamuria ɗang, ɓǝa dupi Kǝrǝsti, mǝnana wu sǝ à loasǝi acea ka.

¹⁶Ace mani ka, twal adyan aban ká dǝmbǝa ka, sǝm nggǝ sǝn ɓwapǝndǝa ɗǝm nǝ sǝne mala ɓanza aɓa nggurǝu ɗang. Kat andǝ amani ama ɗiɗyal ka, sǝm twal Kǝrǝsti aɓa sǝne mala nggūrǝu ka, adyan ngga, anggo sǝ sǝm twali ɗang.

¹⁷Ace mani ka, ɓwa mǝnana kat dumǝna mala Kǝrǝsti ka, pǝlǝna bǝsa ɓwa. Do mǝ'e kutina, do mǝbǝshe tinate.[15]

¹⁸Mǝnia yì agir kat ka, ɓoro na nǝban Ɓakuli, mǝnana nyesǝ sǝm a dotarǝu andǝi nǝ bu Kǝrǝsti, sǝ pa sǝm turo bǝlban, mala nyesǝ aɓwana abani ka.

¹⁹Ɓakuli ka nda aban bǝl ɓanza nǝ̀ nyesǝi abani nǝ bu Kǝrǝsti, bwal acauɓikea malea a ɓabumi ɗang. Sǝ yì ka, pana sǝm a bu sǝm yì cau bǝlban ace nyesǝ aɓwana abani.

²⁰Ace mani ka, sǝm nda ka mǝ'pwantu mala Kǝrǝsti; Ɓakuli na rǝ ɓuaki arǝ wun nǝ kun sǝm ama wu kwaki kir wun arǝ cau ma'sǝm. Sǝm nggǝ ɓuaki arǝ wun a kuni Kǝrǝsti ama, wu gilǝki nre wun wunǝa Ɓakuli.

²¹Ɓakuli tsǝk Kǝrǝsti, mǝnana panǝ cauɓikea raka, pǝlǝ cauɓikea ace sǝm, ace mǝnana a ɓalǝi ka, sǝm nǝ̀ pǝlǝ amǝ'cauɓoarna aban Ɓakuli.[16]