Read mbula bwazza 2 Amǝ Korinti 6 Bible Online

2 Amǝ Korinti 6 - mbula bwazza bible

2 Amǝ Korinti 6

¹Acemǝnana sǝm nda ɓituro sǝnǝa Ɓakuli ka, sǝm nggǝ zǝmbǝa wun, wu kǝa ak ɓwamuru mala Ɓakuli mǝnana pa wun ngga ɓa, wu pangŋǝna turo nǝi ɗang.

²Ɓakuli ka, kǝ bangŋa ama: “Àkǝ̀ bu-pwari mala lǝmndǝ earmuru mem ngga, ǝn oeo. Lang pwari mala amsǝo yina ka, ǝn dupo gbasha.”[17] Sǝni! Ado mǝno ka ndà pwari mǝnana Ɓakuli kǝ lǝmndǝ earmuru male ka; yalung ndà pwari amsǝban.

³Sǝm ngga, sǝm nggǝ dukdo a njar mǝnana ɓǝ̀ sǝm ngga dupi kǝɓwa tǝ́r annda raka, ace mǝnana kǝɓwa ɓǝ̀ kǝa kum mǝɓane aɓa turo mishan ma'sǝm ɗang.

⁴Akuni ka, aɓa koyagir sǝm pak ka sǝm nggǝ lǝmndǝa ama sǝm nda ka amǝturo-mishan mǝ'mǝsǝcau nì mala Ɓakuli. Sǝm nggǝ pe nǝ shakminǝu kǝrkǝr aɓalǝ atanni, aɓa rǝpina, andǝ domǝkwane.

⁵À walki sǝm, à ramta sǝm a ndàkurban, aɓwabunda lo arǝ sǝm aɓa bumlulla; sǝm pak turo aɓa aulǝa, sǝm dum nǝ gandǝrǝu aɓa ɗwanyi ntulo andǝ nzala.[18]

⁶Sǝm nggǝ lǝmndǝ ɓamur rǝ sǝm nǝ doɓoarnsari, andǝ sǝlǝe, andǝ munyi, andǝ pe mǝɓoarne, nǝ bu Bangŋo Mǝfele mǝnana aɓalǝ sǝm ngga, sǝ nǝ earcearǝu mǝɓafoe.

⁷Sǝm nggǝ hamnǝ mǝsǝcau nǝ ɓabum kat, sǝ nǝ rǝcandǝa mala Ɓakuli aban pakturo aɓalǝ sǝm. Sǝm nggǝ pakturo nǝ ɓealɓoarna ma'sǝm kǝla agirbura a bu sǝm mǝli ace ká nǝ munǝo, sǝ a bu sǝm mǝnggare ace mgbali agirbura.

⁸Sǝm nggǝ pakki Ɓakuli turo, ko aɓwana gusǝlǝ sǝm, ko à burice sǝm, ko à twal lullǝ sǝm, ko à ɓwangsǝ sǝm. Aɓwana twal sǝm kǝla amǝ swarkiban, sǝa ma sǝm nggǝ pak agir nǝ ɓabum sǝm mwashat.

⁹Sǝm do kǝla à surǝ sǝm ɗang, sǝ à surǝna rǝ sǝm pepe. Sǝm do kǝla sǝm nda kun lú, sǝ sǝm ndanǝ yilǝmu. À walki sǝm, sǝ à wal-lú sǝm ɗang.

¹⁰Kat andǝ amani ama à tsǝk sǝm aɓa bumkiɗikea ka, sǝm nda aɓa bumpwasǝa ko aya pwari. Ko ɓǝ̀ ndo ama sǝm nda ka amǝtǝr ka, sǝm nggǝ tsǝk aɓwana pas à duk amǝkume. Mǝsǝcau na ama sǝm pànǝ kǝgir ɗang, sǝa ma girbunda kat ka ma'sǝma.

¹¹Wun aɓi sǝm mǝnana a Korinti ka! Sǝm sǝmbǝrǝa wun kǝcau ɗang, sǝm na wun a banfana, sǝm mǝn ɓabum sǝm bwāng aban wun.

¹²Sǝm lǝmndǝ earcearǝu aban ká aban wun, sǝ wun ngga, wu pànǝ earcearǝu arǝ sǝm ɗang.

¹³Ən nggǝ na wun cau kǝla amunem. Ace earcearǝu mǝnana sǝm ndanǝi arǝ wun ngga, pa wu nǝ̀ lǝmndǝa sǝm earcearǝu gbal re? Wu mǝn ɓabum wun aban yiu aban sǝm.

¹⁴Wu kǝa kpapi ɓamur rǝ wun[19] wunǝ aɓwana mǝnana à pa ɓamuria aban Kǝrǝsti raka ɗang. Mana dapi ɓealɓoarna andǝ ɓealɓikea? Sǝ tǎlaban ngga, lang sǝ à nǝ̀ do andǝ pǝndǝa?

¹⁵Sǝ ya dotarǝu na dapi Kǝrǝsti andǝ Shetan? Sǝ mana dapi mǝkwaɗi andǝ ɓwa mǝnana mǝkwaɗi na raka?

¹⁶Sǝ mana dapi Ndàmǝgule mala Ɓakuli andǝ nda ka lú? Sǝm ngga, sǝm nda ka ndàmǝgule mala Ɓakuli Mǝyilǝmui. Kǝla mǝnana Ɓakuli na ka: “Mǝ nǝ do aɓalǝ aɓwana mem, mǝ nǝ gya aɓalǝia, Mǝ nǝ duk Ɓakuli amuria, sǝ yia ka, à nǝ̀ duk aɓwana mem.”[20]

¹⁷“Ace mani ka, wu puri ɓalǝ amǝ'ɓealɓikea, wu duk zak! Wu kǝa gbashi rǝia ɗang, anggo sǝ Mǝtalabangŋo na. Wu kǝa je kǝgir mǝnana mim Ɓakuli ǝn ginǝce ka ɗang, sǝ mǝ nǝ gingsǝ wun.”[21]

¹⁸“Mǝ nǝ duk Tar wun, sǝ wu nǝ̀ duk amunem. Mǝnia ka nda cau mǝnana Mǝtalabangŋo mana Karban kat bang ngga.”[22]