Read mbula bwazza 2 Amǝ Korinti 7 Bible Online

2 Amǝ Korinti 7 - mbula bwazza bible

2 Amǝ Korinti 7

¹Wun amǝ'eamrǝarǝu, acemǝnana sǝm ndanǝ amǝnia yì apacau ka, ɓǝ̀ sǝm lak ɓamur rǝ sǝm arǝ agir kat mǝnana à nǝ̀ ká nǝ nggurǝ sǝm ko bangŋo[23] ma'sǝm aɓa pě mǝnana Ɓakuli ginǝce ka. Ɓǝ̀ sǝm nggǝ pa anggo ka, sǝm nǝ̀ kum lumsǝo nǝ domǝfele aɓa ɓanggi Ɓakuli.

²Wu lǝmndǝa sǝm earcearǝu a ɓabum wun. Sǝm pakki kǝɓwa mǝɓane ɗang; sǝm tsǝk kǝɓwa a njargula ɓwarkio ɗang, sǝ sǝm ɓǝmbǝri kǝɓwa ɗang.

³Ən pa aban na mǝnia yì cau ka ace ɓǝsǝki wun ɓà ɗang. Sǝ kǝla mǝnana ǝn bangŋa a dǝmbǝa ka, wun ngga wu nda a ɓabum sǝm, ko aɓa lú ko aɓa yilǝmu.

⁴Mǝ ndanǝ mǝsǝkang-kangŋa arǝ wun, sǝ ǝn nggǝ nggori nǝ wun. Wu ɓàngnà ɓabumam kǝrkǝr; aɓalǝ atanni ma'sǝm kat ka ǝn lumsǝ nǝ banɓoarnado kǝrkǝr.

⁵Lang sǝm yì bwalǝna Masǝdoniya ka, ko sǝm kum usǝlǝo a nggurǝ sǝm ɗang. A koya ban sǝm pǝlǝ ka, kǝ tanni na. Nǝ nza ka, kúnɓuana na, nǝ ɓaɓalǝu ka, ɓalǝkasǝkya na.[24]

⁶Sǝ Ɓakuli mǝnana kǝ giriki amǝ ɓabum ɓunggia ka, nda yi giriki sǝm nǝ yiu mala Titus ka.

⁷Sǝn ɓamǝsǝi na pa sǝm bumpwasǝa nǝmurǝì ka ɗang, nda andǝ cau mǝnana yi na ama, wu ɓak ɓabumi ka. Yi bangga sǝm ce rǝɓǝla ma'wun acem, andǝ bumkiɗikea ma'wun arǝ gir mǝnana kumban ngga, andǝ pu anzǝm ma'wun acem; sǝ mǝno ka ciem banɓoaram kǝrkǝr.

⁸Ko ɓǝa na ama ǝn kiɗikea wun ɓabum wun nǝ mǝno yì cautera ǝn tasǝa wuni ka, ǝn pak ɓǝnsǝlǝma ɗang. Kat andǝ amani ka ǝn yi pak ɓǝnsǝlǝma, lang ǝn yi sǝlǝ ama ce kwan rǝ wun zuku ka.

⁹Sǝ ado ka, ban kǝ ɓoaram, pa acemǝnana ama ǝn kiɗiki bum wun ngga ɗang, nda acemǝnana ama kiɗiki mala ɓabum wun tsǝk wun, wu pwanzali, wu nggaɗi aɓeal wun. Mǝno ka nda ulang bumkiɗikea mǝnana Ɓakuli earkiyice ama ɓǝ̀ aɓwana male ɓǝa kǝ pak ka. Ace mani ka, sǝm pakka wun gir-kwanrǝu ɗang.

¹⁰Ulang bumkiɗikea mǝnana Ɓakuli earkiyice ɓǝ̀ sǝm kutio a ɓalǝi ka, nda mǝnana kǝ tsǝk sǝm, ɓǝ̀ sǝm nying cauɓikea, aban ká kum amsǝban. Ɓǝnsǝlǝma pa kàm aɓa ulang mǝno yì bumkiɗikea ka ɗang. Sǝa ma bumkiɗikea mǝnana mala ɓanza na ka, pǝlǝì cauɓikea nzǝm pa a ɓalǝi ɗang, sǝ kǝ ká nǝ ɓwa a lú.

¹¹Wu sǝn gir mǝnana bumkiɗikea mala ɓanggi Ɓakuli pusǝ aɓalǝ wun ngga! Tsǝk wun arǝ kum ɓabumpina mala pě. Tsǝk wun a lǝmndǝ do kunpwasǝa ma'wun. Tsǝk wun a bumlulla arǝ pě mǝɓane. Tsǝk wun a ɓalǝkasǝkya. Tsǝk wun a rǝuɓǝla ace sǝn ɓamǝsǝam. Tsǝk wun a ɓabumpina arǝ pakki agir mala Ɓakuli, sǝ pà wun ɓabum mala nunkir amǝ'cauɓikea. Wu lǝmndǝna arǝ anjar kat ama wu pangŋǝna gir mǝnana kat ɓoaro ɓǝa pe ka.

¹²Tǝr gilǝa wun mǝno yì cautera ka, pa ace ɓwa mǝnana pak cauɓikea, ko ɓwa mǝnana à pakki wi cauɓikea ka ɗang. Ən gilǝa wun ace mǝnana, a ɓadǝm Ɓakuli ka, wun nǝ ɓamur rǝ wun ngga, wu nǝ̀ sǝn lime mala pu a nzǝm ma'wun arǝ sǝm.

¹³Mǝnia ka ɓakɓabum sǝm kǝrkǝr. Kpapi andǝ mǝno yì ɓakɓabum ngga, banɓoara sǝm arǝ sǝn bumpwasǝa mala Titus ace akban mǝnana wun kat wu é sǝ wu ci ɓabumi nong ngga.

¹⁴Ən bangŋǝni wi nǝma, ǝn nggǝ nggori nǝ wun, sǝ ado ka wu pam kǝsǝkya ɗang. Sǝ kǝla mǝnana ko man kat sǝm bangga wun ngga mǝsǝcau na ka, anggo gbal sǝ nggori ma'sǝm aban Titus ka, dumǝna mǝsǝì!

¹⁵A dyan ngga earcearǝu male aban wun ngga, kuti rǝcandǝa, yi mana ɓǝ̀ ɗenyi nǝ okiru ma'wun kat abani andǝ akban mǝnana wu é nǝ rǝɓǝla andǝ pagulo ka.

¹⁶Adyan ngga, mǝ ndanǝ banɓoarnado, acemǝnana mǝ ndanǝ mǝsǝkang-kangŋa arǝ wun.