Read mbula bwazza 2 Amǝ Korinti 8 Bible Online

2 Amǝ Korinti 8 - mbula bwazza bible

2 Amǝ Korinti 8

¹[25]Wun amǝ'eamrǝarǝu, sǝm nggǝ earce ɓǝ̀ wu surǝ gir mǝnana Ɓakuli, aɓa ɓwamuru male ka, pè aɓalǝ a'ikǝlisiya mǝnana a nzali Masǝdoniya[26] ka.

²À kum karǝkiban kǝrkǝr nǝ atanni mǝnana yiu amuria ka; sǝa ma à lumsǝ nǝ banɓoarnado kǝrkǝr mǝnana yinǝia à mǝn buia kpǝm aɓa paɓoro malea, kat andǝ amani ama, yia ka amǝtapwasǝa na ka.

³Mǝ nǝ gandǝ bangŋa amuria ama, à pà gir mǝnana kume malea bwal ka, yale à pà gir mǝnana kuti kume malea ka nǝ eare mala ɓabumia.

⁴À camarǝ ɓuaki arǝ sǝm ama ɓǝ̀ sǝm nyinggia wia njar mala pabu ace bwalia aɓwana mala Ɓakuli.

⁵À pak gir mǝnana ɗenyicau ma'sǝm bwal banì raka. À tite ka, à pà ɓamuria aban Mǝtalabangŋo, sǝ à pà aban sǝm kǝla mǝnana Ɓakuli earce ama ɓǝa pak ka.

⁶Ace mani ka, sǝm ɓuaki arǝ Titus, yì māna nda ɓwa mǝnana tita ɓak ɓabum wun arǝ pabu ka, ɓǝ̀ nyare aban wun, ɓǝ̀ ɓak ɓabum wun, ɓǝ̀ wu kyan nǝ mǝnia yì turo pabu ka a masǝlǝate.

⁷Wun ngga wu nda dǝmbǝa aɓa koya gir ka. Wu nda dǝmbǝa aɓa paɓamuru, andǝ sǝlǝ nacau, andǝ surǝgir, andǝ rǝɓǝla arǝ turo, sǝ earcearǝu ma'wun ace sǝm. Anggo sǝ ǝn nggǝ earce ɓǝ̀ wu pa a dǝmbǝa gbal aɓa mǝnia yì ɓwamuru wu ndanǝi mala pabu ka.

⁸Ən pa aban tsǝk wun pup ɓǝ̀ wu pè anggo ɗang. Mǝ nda aban karǝki came nǝ mǝsǝcau mala earcearǝu ma'wun arǝ ɓabumpina mala pě mǝnana aɓea ikǝlisiya nani ka.

⁹Wu sǝlǝna nǝ ɓwamuru mala Mǝtala sǝm Yesu Kǝrǝsti; mǝnana kat andǝ amani ama yì ka, mǝkume na ka, yi duk mǝtǝ̀r ace wun, ace mǝnana wun, aɓa dotǝ̀r male ka, ɓǝ̀ wu pǝlǝa amǝkume.

¹⁰Sǝ kwarkiru mem nia ka: Nda à kǝ ce ɓoaro ma'wun ɓǝ̀ wu masǝlǝata gir mǝnana wu tite nǝ bǝān ngga. Nǝ bǝān ngga, wu nda ka amǝdǝmbǝa mǝnana wu bang ce pe ka, sǝ kǝ wun na mǝnana wu tita pa ka.

¹¹Ado ka, wu masǝlǝata gir mǝnana wu tite ka. Rǝɓǝla mǝnana wu lǝmndǝi a dǝmbe ka, ɓǝ̀ pusǝrǝi ado aɓa pàbu ma'wun. Wu pǎ ɓǝ̀ kārǝa arǝ gir mǝnana wu ndanǝi ka.

¹²Ɓoro mǝnana ɓwa earǝna nǝ ɓabumi mwashat nǝ̀ pà ka Ɓakuli nǝ̀ é, sǝ yì pa ɓoro ka, ɓwa ɓǝ̀ kārǝi arǝ gir mǝnana ndanǝi ka, pà a kun gir mǝnana ɓwa panǝi raka ɗang.

¹³Ən pa aban bang mǝnia ka ace mǝnana ɓǝn usǝlǝ aɓea ɓwana sǝ wun ngga mǝ nǝ para wun tanni amur wun ɗang. Eare mem ngga, ɓǝ̀ wu karǝ kat.

¹⁴Ado ka, kume ma'wun kpǝm ngga nǝ̀ gandǝ bwalia wia kam aɓa tǝle malea, ace mǝnana aɓe fara ka kume malea kpǝm ngga nǝ̀ gandǝ bwala wun kam gbal aɓa tǝle ma'wun, sǝ anggo ka, wu nǝ̀ karǝ kat.

¹⁵Kǝla mǝnana Malǝmce bang ngga: “Ɓwa mǝnana ram kpǝm ngga, kǝgir eapi wi amuri ɗang. Sǝ ɓwa mǝnana ram bǝti ka, kǝgir shingnǝi wi ɗang.”[27]

¹⁶Ən nggǝ pakki Ɓakuli yàwá, ace pe Titus ɓabum ulang mǝnana mǝ ndanǝi ace wun ngga.

¹⁷Titus ear nǝ zǝmbǝa ma'sǝm abani ɓǝ̀ kya sǝn wun ɗǝm. Yale yì nǝ nggearǝì ka, ndanǝ rǝɓǝla mala sǝn wun.

¹⁸Sǝm ndya sǝm nggǝ tasǝ ɓe mǝ'eamrǝarǝu ate ka, mǝ'eamrǝarǝu mǝnana a'ikǝlisiya kat mǝnana akani ka, à kǝ ɓwangsǝi ace turo male aɓa hamnǝ Cau Amsǝban.

¹⁹Ɗǝm ngga, amǝno yì a'ikǝlisiya ka à twalǝna mǝnia yì mǝ'eamrǝarǝu ka ɓǝ̀ duk ɓi sǝm mǝturo aɓa gya ma'sǝm. Yì ka, ɓǝà angŋa dǝmbǝa à warina a Korinti ka, sǝm nǝ̀ ngga o sǝnǝia a Urǝshalima nǝ ɓoro, ace gusǝlǝ Mǝtalabangŋo, andǝ lǝmndǝ pà ɓamuru ma'sǝm arǝ bwaliarǝu kam.

²⁰Sǝm nǝ̀ yia o a tarǝ sǝm, ace mǝnana ɓǝa kǝa tsǝka sǝm kun, amur njar mǝnana sǝm nggǝ kar nǝ mǝnia yì ɓoro ma'wun ngga ɗang.

²¹Sǝm ngga, sǝm nggǝ earce pak gir mǝnana nǝ̀ pwasǝ bum Mǝtalabangŋo ka, andǝ mǝnana ɓwapǝndǝa nǝ̀ sǝni nda a nzongŋi ka.[28]

²²Ɗǝm ngga, ɓe mǝ'eamrǝarǝu nakani mǝnana sǝm nggǝ turi aban wun andǝ aɓwana mǝno ɓari ka. Aɓa mǝsǝcau ka, lǝmndǝna sǝm kusǝ pas ama kǝ earce nǝ̀ bwala wun nggam. Sǝ ado ka, ɓabum mǝnana ndanǝi ace bwala wun ngga, kuti mǝnana ɗiɗyal ka, acemǝnana yì ka, earnǝ wun pepe.

²³Ɓǝ̀ kǝ ɓwa nǝ̀ ɗiban amur Titus ka, wu ne wi ama ɓiam na mǝnana sǝm nggǝ pak turo sǝnǝí aɓalǝ wun ngga. Sǝ ɓǝ̀ à nǝ̀ ɗiban amur amǝ'eamrǝarǝu mana ate ka, wu nea wia ama, yia ka a'ikǝlisiya nǝ̀ turia ace gusǝlǝ Kǝrǝsti.

²⁴Ace mani ka, wu lǝmndǝì aɓwana man a banfana a ɓadǝmbǝa a'ikǝlisiya, earcearǝu ma'wun andǝ tǝ́r jali ma'sǝm nǝ wun.