Read mbula bwazza Amǝ Galati 2 Bible Online

Amǝ Galati 2 - mbula bwazza bible

Amǝ Galati 2

¹Anzǝm apǝlǝa lum-nong-ine ka, ǝn nyare ǝn o a Urǝshalima ɗǝm sǝnǝ Barnabas, sǝm wari nǝ Titus ata sǝm.[9]

²Ən wari kano, acemǝnana Ɓakuli nǝ̀ lǝmndǝam ama ɓǝ̀ ǝn kyane. Akano ka, sǝm nggea do nǝ murǝ sǝm, sǝnǝ aɓwana mǝnana à twalia ama à nda ka aɓwana-mǝgule mala Ikǝlisiya ka. Pǝlǝa ǝn bǝlia wia ɓa Cau Amsǝban mǝnana ǝn nggǝ hamnǝi aban aɓwana mala acili anzali ka. Eare mem nda mǝnana kun sǝm ɓǝ̀ duk mwashat, ace mǝnana ɓǝ̀ turo mem mǝnana ǝn pangŋǝni andǝ mǝnana ado mǝ nda rǝ pe ka, ɓǝa kǝa ue ɓa ɗang.

³Sǝ yia ka, à earnǝ mim. Titus mǝnana ɓwa Gǝrik na ka, kǝɓwa ci púp ama ɓǝa kasǝi wi ɓate ɗang.

⁴Mǝno yì cau ka lo, ace aɓea ɓwana mǝnana à na ama à nda ka amǝ kpata Yesu, sǝ ɓafo à nda raka. Yia ka, à kutio aɓalǝ sǝm zàng, à kǝ shenzǝki sǝm, à kǝ earce iu panzǝban mǝnana sǝm ndanǝi aɓa Kǝrǝsti Yesu ka. À kǝ ear ama à nǝ̀ nyesǝ sǝm ɓǝ̀ sǝm duk guro mala anggurcau mala amǝ Yahudi.

⁵Sǝ sǝm ɓinǝ gbal kpekpe, sǝm nyinggia wia njargula ko bǝti ɗang. Eare ma'sǝm ngga, ɓǝ̀ sǝm yal mǝsǝcau mala Cau Amsǝban ace wun.[10]

⁶Sǝ amǝno yì aɓwana à twaliá ama à nda ka aɓwana amǝgule mala ikǝlisiya ka, à pànǝ kǝ kaɓe cau mǝnana à nǝ̀ tsǝa amur cau mǝnana ǝn nggǝ hamnǝi ka ɗang. Kat andǝ amani ama à ndaka aɓwana amǝgule aɓa dǝmbam ngga, ǝn eari mǝno ɓǝ̀ ciem ɓǝn nying kpata gir mǝnana Ɓakuli lǝmndǝam ngga ɗang, ko bǝti, acemǝnana Ɓakuli ka, kǝ lǝmndǝ tàrban ɗang.[11]

⁷Gir mǝnana ndakam ngga, nda mǝnana ama, Ɓakuli panam turo hamnǝ Cau Amsǝban aban aɓwana arǝ aɓea anzali, kǝla mǝnana Ɓakuli pe Bitǝrus hamnǝ Cau Amsǝban aban amǝ Isǝrayila ka.

⁸Kǝ Ɓakuli mǝ'mwashati, mǝnana pak turo nǝ Bitǝrus, ci mǝ'mishan na aban ká aban amǝ Isǝrayila ka, nda mǝnana pak turo nǝ mim, ciem mǝ'mishan aban ká gbal aban aɓwana mala acili anzali ka.

⁹Ɓafo, nggearǝ Jemis, sǝ Bitǝrus, sǝ Yohana, mǝnana à twalia ama à ndaka atanggea-nggun mala Ikǝlisiya ka, à sǝnǝna ɓwamuru mǝnana Ɓakuli pam mala turo mǝnia ka; pǝlǝa à ak sǝm sǝnǝ Barnabas, sǝm duk aɓia amǝturo. À pu nzǝm sǝm aban hamnǝ cau aban aɓwana mala aɓea anzali, sǝ yia ka à kutio ata turo aban amǝ Isǝrayila.

¹⁰Kǝ cau mǝnana à tsǝka sǝm a kir sǝm ngga nda mǝnana ama ɓǝ̀ sǝm nggǝ tsǝkir amǝtǝr, sǝ mǝno ka, nda kǝgir mǝnana mǝ ndanǝ bumpina ace ka.

¹¹Lang Bitǝrus yina a Antiyok ka, ǝn loa rǝì a ɓamǝsǝ ɓwapǝndǝa, acemǝnana gir mana pe ka ɓoar ɗang.[12]

¹²A yiu male a dǝmbǝa ka kǝ lili andǝ aɓwana amǝkwaɗi mǝnana amǝ Yahudi na raka, aɓwana mǝnana kǝgir oasǝia arǝ cau mala kasǝ ɓatau raka. Sǝ nǝ nzǝmo ka, lang aɓea amǝ Yahudi, agyajam mala Jemis yina ka, pǝlǝa yì, yì Bitǝrus ka, tamsǝ li girlina andǝ amǝ'eamrǝarǝu mana amǝ Yahudi na raka, tar ɓamuri zak nǝ yia. Yì ka, kǝ ɓanggi amǝ Yahudi mana à kǝ na ama ɓǝa kasǝi koya mǝkwaɗi ɓate ka.

¹³Gir nî tsǝk aɓea amǝkwaɗi mǝnana amǝ Yahudi na ka, à twal kusǝ ulang ɓua-kun-ɓari mala Bitǝrus, gandǝa à ɓosǝki kusǝ Barnabas nǝ ulang ɓealǝu mǝno.

¹⁴Lang ǝn sǝni à kǝ̀ kpata ɓafo mala Cau Amsǝban raka, pǝlǝa ǝn ne Bitǝrus a ɓamǝsǝ ɓwapǝndǝa bwāng ama: We ka, a nda ɓwa Yahudi, sǝ a kǝ duk ulang do mala aɓwana mǝnana amǝ Yahudi na raka. Sǝ palang adyan, sǝ a kǝ earce tsǝk aɓwana mǝnana amǝ Yahudi na raka, ɓǝa duk ulang do mala amǝ Yahudi?

¹⁵Mim sǝnǝ we, à ɓǝl sǝm ngga, sǝm nda ka amǝ Isǝrayila, sǝm nggǝ ɓǝsǝki nggurcau mala Musa kǝla aɓwana mǝnana amǝ Isǝrayila na raka, yia amǝ pakki acauɓikea ka ɗang.

¹⁶Kat andǝ amani ka, sǝm sǝlǝna ama, nǝ paɓamuru nǝmurǝì aban Yesu Kǝrǝsti, sǝ ɓwa nǝ̀ duk mǝ cauɓoarna aban Ɓakuli,[13] pa ace kpata anggurcau ɗang. Nggearǝ sǝm gbal ka, sǝm pa ɓamur sǝm nǝ pa aban Yesu Kǝrǝsti ace mǝnana ɓǝ̀ sǝm duk pepe, sǝm sǝnǝa Ɓakuli, a ta cau mala guli arǝ Kǝrǝsti. Pa ace kpata nggurcau ɗang. Nda acemǝnana kpata nggurcau ka, pà nǝ̀ tsǝk ɓwa ɓǝ̀ duk pepe a ɓadǝm Ɓakuli ɗang.[14]

¹⁷Sǝ mǝnana ɓǝa bangŋa ama sǝm nda aban alta do mǝɓoarne aɓa Kǝrǝsti, sǝ à yì kum sǝm ngga, sǝm nda ka mǝ'cauɓikea ka, mǝnia ka, nǝ̀ do ama Yesu pu nzǝm cauɓikea le? Awo, pa anggo ɗang!

¹⁸Sǝa ma ɓǝ̀ ǝn nyare ǝn kutia kani aɓwana njar mala nggurcau mala Musa mǝnana ǝn angŋa dǝmbǝa ǝn nyingni ka, ǝn dumǝna mǝ yàl Nggurcau mala Ɓakuli.

¹⁹Ɓǝ̀ ǝn ɓariki nǝma mǝ nǝ kpata nggurcau ka, ǝn yi sǝni ka, mǝno ka pà nǝ̀ pwasǝ bum Ɓakuli ɗang. Pǝlǝa ǝn wuki nggurcau, ǝn tamsǝ kpata nggurcau, ace mǝnana mǝ dupi Ɓakuli.

²⁰À gballìnam amur nggun-gangndi sǝnǝ Kǝrǝsti. Mǝ nda mǝnana ɗǝm nǝ yilǝmu ka ɗang, Kǝrǝsti nda mǝnana ado dukiyi a ɓalǝam ngga. Do mem aɓa nggūrǝu mala ɓanza ka, ǝn dum nǝ paɓamuru aban Muna mala Ɓakuli mǝnana earcem, sǝ paɓamuri acem ngga.[15]

²¹Ən burice ɓwamuru mala Ɓakuli ɗang. Acemǝnana ɓǝ̀ kpata nggurcau nǝ̀ tsǝk sǝm, sǝm nǝ̀ duk pepe sǝnǝa Ɓakuli ka, lú mala Kǝrǝsti ka nda ɓa.