Read mbula bwazza Amǝ Galati 3 Bible Online

Amǝ Galati 3 - mbula bwazza bible

Amǝ Galati 3

¹Wun amǝ Galati mǝnana wu gǝmi ka. Yana ɓwe pyauta wun? Nda àkǝ̀ ɓamǝsǝ wun sǝ à bǝlki ce lú mala Yesu Kǝrǝsti amur nggun-gangndi.

²Mǝ ɗi wun pe: Wu ak Bangŋo Mǝfele a njar mala kpata Nggurcau mala Musa le, ko nda acemǝnana wu pa ɓamur wun arǝ cau mǝnana wu ok amur Kǝrǝsti ka?

³Palang sǝ wu ɓanggea anggo? Anzǝm mǝnana wu tinata do kpata Yesu aɓa Bangŋo mala Ɓakuli ka, wu kǝ earce ado ama wu nǝ̀ masǝlǝte aɓa nggūrǝu le?

⁴Nggea tanni mǝnana wu nu aɓalǝ agir pas aban kpata Yesu ka, nda ɓà le? Kàngkàng nda ɓà le?

⁵Mǝ nǝ ɗi wun ɗǝm ngga, Bangŋo Mǝfele mǝnana Ɓakuli pa wun, sǝ pakki agir-ndǝlǝki aɓalǝ wun ngga, nda acemǝnana wu kpata Nggurcau mala Musa ka le, ko nda acemǝnana wu pa ɓamur wun arǝ Cau Amsǝban mana wu ok amur Kǝrǝsti ka?

⁶Wu sǝni ani arǝ cau mala Ibǝrayim. Malǝmce mala Ɓakuli ka bang ama, “Ibǝrayim earnǝ Ɓakuli, sǝ ata cau mala mǝno yì guliarǝu male arǝ Ɓakuli ka, Ɓakuli nyesǝi mǝ'cauɓoarna na.”[16]

⁷Ɓoaro ɓǝ̀ wu sǝlǝ ama amuna mala Ibǝrayim ngga, à nda ka aɓwana mǝnana à paɓamuria aban Ɓakuli, à earnǝi ka.[17] [18]

⁸Malǝmce ak dǝmbǝa bang ɗiɗyal ama, Ɓakuli nǝ̀ ak aɓwana mala acili anzali, à nǝ̀ pǝlǝ amǝ'cauɓoarna, ace paɓamuru malea abani. Nda sǝ ak dǝmbǝa ne Ibǝrayim mǝnia yì bǝsa cau mǝɓoarne ama, “Aɓwana arǝ anzali kat ka, à nǝ̀ kum tsǝkbu mem nǝ bano.”[19]

⁹Nda gir mǝnana tsǝa sǝ aɓwana mana à paɓamuria aban Kǝrǝsti ka, à kum lumsǝo mala tsǝkbu mǝ'mwashati mǝnana Ibǝrayim kumo, nǝ́ paɓamuru male aban Ɓakuli ka.

¹⁰Sǝ aɓwana mǝnana à makɓalǝia arǝ bwal Nggurcau ace kum akban a ɓadǝm Ɓakuli ka, à nda aɓata suban. Malǝmce ka na ama, “Suban na amur ɓwa mǝnana kat pà nǝ̀ kpata anzongcau kat mǝnana à gilǝia aɓa Malǝmce Nggurcau mala Ɓakuli raka.”[20]

¹¹Ado ka, pusǝna rǝì a banfana ama kǝɓwa pà nǝ̀ kum akban a ɓadǝm Ɓakuli nǝ ɓariki mala bwal Nggurcau ɗang. Acemǝnana Malǝmce na ama, “Ɓwa mǝnana duk mǝ'cauɓoarna aban Ɓakuli nǝ́ paɓamuru abani ka nda nǝ̀ kum yilǝmu ka.”[21] [22]

¹²Turo mala Nggurcau ka à kwakite amur guliarǝu ɗang. Akun mani ka cau male ka na ama, “Ɓwa mana bwal Nggurcau, kpata anzongcau male kat ka, nda nǝ̀ au ka.”[23]

¹³Sǝa ma do mana Kǝrǝsti yi duk su-ɓwa ace sǝm ngga, angŋǝna mur sǝm a ɓabu suban mǝnana Nggurcau yinǝi ka. Acemǝnana à gilǝa aɓa Malǝmce ama, “Suban na amur koya ɓwa mǝnana à gyari a nggun ngga.”[24]

¹⁴Kǝrǝsti akmúr sǝm ace mǝnana tsǝkbu mǝ'mwashati mǝnana Ɓakuli banggi Ibǝrayim ama nǝ̀ tsǝki wi ka, ɓǝ̀ yiu amur aɓwana arǝ anzali kat, nǝ bu Kǝrǝsti Yesu. Acemǝnana sǝm mana sǝm ndaka amǝkwaɗi ka, sǝm nǝ̀ gandǝ ak pacau mala Bangŋo Mǝfele nǝ paɓamuru.

¹⁵Wun amǝ'eamrǝarǝu, mǝ mǝnba wun ɓa mǝnia yì cau ka arǝ do mala ɓwamǝpǝnde: Kǝla mana ɓwa pà nǝ̀ gandǝ yâl cau mǝnana à earǝna amuri, ko nǝ̀ yiu nǝ ɓe kǝ cau ɗàng ama nǝ̀ tsǝa amuri nǝ̀ nggaɗi raka, anggo sǝ mǝnia pa.[25]

¹⁶Ɓakuli pacau male aban Ibǝrayim andǝ muni. Sǝni pepe, Malǝmce ne ma ama, “andǝ amuni” ɗang, mǝnana nǝ̀ lǝmndǝ ama à nda pas ka. Awo, bangŋa ama “andǝ muni”, mǝnana lǝmndǝ ama nda aban na cau amur ɓwa mwashat. Sǝ ɓwa mwashat mǝnia ka, nda Kǝrǝsti.[26]

¹⁷Mǝnia ka nda gir mǝnana ǝn nggǝ earce ne ka: Ɓakuli kurcau aban Ibǝrayim, sǝ bangŋǝna ama cau male ka nǝ̀ lumsǝì. Nggurcau mǝnana Ɓakuli yi pa, nǝ bu Musa a nzǝm mana apǝlǝa gbǝman ine nǝ lumi-tārú (430) kutikina ka, pà nǝ̀ kasǝ mǝno yì kurcau, sǝ nǝ̀ nyesǝ pacau mala Ɓakuli ɓǝ̀ duk ɓà ka ɗang.[27]

¹⁸Ɗenyi ama ɓǝ̀ nda acemǝnana sǝm bwal nggurcau mala Ɓakuli sǝ kǝ pa sǝm liɓala mǝnana pàcau ace ama nǝ̀ pa sǝm ngga, à pà nǝ̀ bang ɗǝm ama nda acemǝnana pàcau ka sǝ nǝ̀ pa sǝm liɓala ka ɗang. Sǝa ma, Ɓakuli aɓa ɓwamuru male ka, pe Ibǝrayim mǝnia yì liɓala pàcau ace ka acemǝnana bangŋǝna ama nǝ̀ pe wi.[28]

¹⁹Sǝ mana ɗe nda tǝr pa Nggurcau? Ɓakuli pa Nggurcau nǝ nzǝmo, ace mǝnana ɓǝ̀ lǝmndǝì ɓwapǝndǝa acauɓikea malea. Sǝ Nggurcau ka à ci ama ɓǝ̀ pak turo ɓǝ̀ kya bik pwari yiu mala mǝno yì muna mala Ibǝrayim, mǝnana Ɓakuli pacau ace ka. Ɓakuli pa Nggurcau male nǝ bu amǝturonjar aban Musa, mǝnana do a nre ka aɓwana andǝ Ɓakuli ace banggia wia cau mala Nggurcau ka.

²⁰Ɓǝ̀ aɓwana ɓari kurcau ka, à kǝ alta ɓwa mǝnana nǝ̀ cam a nrea ka. Sǝ Ɓakuli mana nda mwashat ka, alta kǝɓwa ate aɓa pàcau male aban Ibǝrayim ɗang.

²¹Sǝ ado ka, à nǝ̀ na ama Nggurcau Mala Musa andǝ kurcau mala Ɓakuli ka à ɓinǝ rǝarǝia le? Awo, ko bǝti! Ɓǝ̀ Nggurcau nǝ̀ gandǝ pa sǝm bǝsa yilǝmu ka, ɓǝ́ kpate ka nǝ̀ nyesǝ sǝm, ɓǝ̀ sǝm duk amǝ'cauɓoarna aban Ɓakuli.

²²Sǝ Malǝmce ka, bangŋa ama sǝm kat ka, sǝm nda aɓata kùrban mala cauɓikea. Kǝ njargula mǝnana sǝm nǝ̀ kum panzǝban nǝi, mǝnana Ɓakuli pacau ace ka, nda mǝnana ama ɓǝ̀ sǝm pa ɓamur sǝm aban Yesu Kǝrǝsti ka.

²³Kaniama njargula paɓamuru aban Kǝrǝsti ɓǝ̀ yiu aban sǝm ngga, à bwal sǝm aɓata kùrban mala Nggurcau. À kasǝ kun sǝm ba yiu mala yì paɓamuru ɓǝ̀ yi lǝmndǝ rǝì ɓǝ̀ sǝm surǝì.

²⁴Mǝ nǝ ci a ɓe njar ani: Nggurcau nǝ̀ bwala sǝm gara aban ká aban Kǝrǝsti. Yal sǝm ba pwari mǝnana à nyesǝ nre sǝm yi ɓoar sǝnǝa Ɓakuli nǝ́ guli arǝ Kǝrǝsti ka.

²⁵Sǝ adyan mǝnana njar mala guli arǝ Kǝrǝsti yina ka, sǝm pa aɓata yalban mala Nggurcau ɗǝm ɗang.

²⁶Ace mani ka, wun kat ka, wu ndaka muna mala Ɓakuli ace guli ma'wun arǝ Kǝrǝsti Yesu.

²⁷Sǝ aɓwana mǝnana kat à kum kpapi andǝ Kǝrǝsti aɓa batisǝma ka, à turǝna Kǝrǝsti a rǝia kǝla tur bǝsa daura a rǝǔ.

²⁸Kǝ cau pà kàm ɗǝm ama ɓwa man ngga ɓwa Isǝrayila na ko ɓwa Isǝrayila na raka ɗang, ɓwa man ngga guro na ko guro na raka ɗang, ɓwa man ngga ɓwabura na ko mɓwama na ka ɗang. Wun ado ka, wu dumǝna mwashat aɓa Kǝrǝsti Yesu.

²⁹Sǝ ado mǝnana wu dumǝna a mala Kǝrǝsti ka, wu nda ka amuna mǝɓafoe mala Ibǝrayim.[29] Wu nda ka amǝliɓala, sǝ pàcau mala Ɓakuli aban Ibǝrayim ngga, dumǝna ma'wun.[30]