Read mbula bwazza Amǝ Galati 4 Bible Online

Amǝ Galati 4 - mbula bwazza bible

Amǝ Galati 4

¹Wu sǝni ani: Ɓǝ̀ tarrú wú, sǝ nyinggi amuni mǝkeke ɓala ka, amǝno yì amuna ka kǝgir gauwia andǝ guro-ɓala ɗang. À nda aɓata ɓwa mǝnana à pe wi yal ɓala ka, she ɓǝa gulkina ka, kat andǝ amani ama, à ndaka amǝtala kume mala tarrìa kat ka.

²Dumǝnia wia púp ɓǝa oki amǝ'lǝsǝban, she ɓǝa kya bwalǝna pǝlǝa mǝnana tarrìa kasǝ ka.

³Kani ama Yesu nǝ̀ yiu ka, anggo gbal sǝ sǝm pa. Sǝm nda kǝla amuna, aguro mala abangŋo mǝnana ado à bwal ɓanza mǝnia ka.

⁴Sǝa ma, lang pwari ni yi karǝna ka, Ɓakuli tur Muni, mǝnana mɓwama nǝ̀ ɓǝli, a ɓata nggurcau mala Musa ka.

⁵Ɓakuli turi, ace mǝnana ɓǝ̀ yi akmúr aɓwana mǝnana à nda ka aguro mala nggurcau ka, ace mǝnana sǝm ngga ɓǝ̀ sǝm kum bancame mala duk amuna male.[31]

⁶Sǝ acemǝnana sǝm nda ka amuni ka, Ɓakuli tasǝ Bangŋo mala Muni a ɓabum sǝm, mǝnana kǝ tsǝk sǝm, sǝm nggǝ tunǝi ama, “Dâ, Tárram.”

⁷Ado ka, wu nda ka guro ɗǝm ɗang, wu nda ka muna mala Ɓakuli. Sǝ acemǝnana wu nda ka muni ka, Ɓakuli tsǝngŋǝna wu dumǝna amǝliɓala male.

⁸Ɗiɗyal, mǝnana wu malaká surǝ Ɓakuli raka, wu nda ka aguro mala agir mǝnana aɓa mǝsǝcau ka a Ɓakuli na raka.

⁹Sǝ ado mǝnana wu surǝna rǝ Ɓakuli, ko a na raka, Ɓakuli surǝna rǝ wun ngga, palang sǝ wu kǝ earce nyar nǝ ta wun, wu nǝ̀ duk aguro mala alú andǝ akukwar mala ɓanza man, mǝnana à panǝ kǝ rǝcandǝa raka?

¹⁰Wu nda aban ɓariki wu nǝ̀ alta dǝmcauwa aban Ɓakuli nǝ kpata pakkia alamsan mala aɓea apwari, ko azongŋo, andǝ akunaban, andǝ apǝlǝa.

¹¹Wu kǝ pam ɓangciu, ɓǝa kǝa na ama nggea gandǝa mem mana arǝ wun ngga nda ɓa ɗang.

¹²Wun amǝ'eamrǝarǝu, ǝn nggǝ zǝmbǝa wun, wu do ulang do mem, do gapitarǝu nǝ amǝnia yì agir ka. Nggearǝ mim ngga, ǝn pǝlǝna kǝla wun, wun aɓwana mǝnana wu nda ka amǝ Isǝrayila raka, mǝnana sǝm pa aɓata anggurcau raka. A dǝmbe mǝnana ǝn hamnǝ Cau Amsǝban aban wun ngga, wu pakkam kǝgir mǝɓane ɗang.

¹³Wu sǝlǝ ama, a nggea dǝmbe mǝno ǝn hamnǝ Cau Amsǝban aban wun ngga, mǝ ndanǝ rǝkwana a rǝam.

¹⁴Kat andǝ gir mǝnana mǝ nda a ɓalǝi aɓa nggūrǝam, ɓǝ́ nǝ̀ tsǝk wun, wu nǝ̀ ginǝam, wu nǝ̀ nyesǝ cem ɓà ka, wu ginǝam ɗang. Yale, wu gingsǝam, wu ɗenyi nǝ mim, kǝla ɓe mǝturonjar mǝnana sulǝ nǝ ban Ɓakuli ka, sǝ wu em kǝla mǝ nda Kǝrǝsti Yesu nǝ nggearǝì.

¹⁵Sǝ bumpwasǝa mǝnana wu ndanǝi ɗiɗyal ka, nda mǝ ye le? Ən sǝlǝna nǝma ɓǝ̀ nǝ̀ gandǝ pa ka, ɓǝ́ wu nǝ̀ pusǝki amǝsǝ wun, wu nǝ̀ pam mia.

¹⁶Ado ka, ǝn pǝlǝna ɓi wun mǝbura acemǝnana ǝn nggǝ na wun mǝsǝcau ka le?

¹⁷Amǝno yì amǝkanigir mǝ'nyir nì ka, à ndanǝ rǝɓǝla arǝ alta ɓabum wun, sǝ ɗenyicau malea aban wun ngga, mǝɓoarne na ɗang. À kǝ ɓariki ama ɓǝ̀ sǝm gau sǝnǝa wun, ace mǝnana kǝ̀ yia na ɓǝ̀ wu kǝ okia wia ka.

¹⁸Ɓǝ̀ kǝ ɓwa na nǝ rǝɓǝla mala pakka wun mǝɓoarne ka, ɓoaro na gir nì ɗang, sǝa ma ɓǝà kǝ̀ pe pwari-pwari. Ɓǝà kǝa na ama, she pwari mǝnana mǝ nda aban wun ngga, sǝ à nǝ̀ pakka wun ɗang.

¹⁹Wun amunem mǝnana ǝn earkiyi acea raka! Ən nggǝ ok kwanban a rǝam ace wun, kǝla mɓwama mǝnana nda aban gbashi ka, sǝ mǝno ka pà nǝ̀ mal ɗang she ɓǝ̀ Kǝrǝsti lumsǝna aɓalǝ wun ngga.

²⁰Ən earǝnace nǝma, ɓǝ́ mǝ nda ban wun ado, ace mǝnana mǝ ɓunmba wun giem. Sǝ ado ka, ǝn surǝ gir mǝnana mǝ nǝ pa ace wun ngga ɗang.

²¹Wun aɓwana mǝnana wu earce do aɓata Nggurcau mala Musa ka, kàngkàng wu surǝ gir mǝnana Nggurcau nakiyi ka?

²²Malǝmce na ama, Ibǝrayim ngga ndanǝ amuna ɓari, man mwashat ka, à ɓǝla andǝ man-guro male, sǝ man mwashat ka, à ɓǝla andǝ man-ala male, mǝnana guro na raka.[32]

²³Muni mǝnana nǝ bu man-guro ka, à ɓǝli aɓa ɓariki mala ɓwapǝndǝa. Sǝ muni mǝnana nǝ bu man-ala male ka, à ɓǝli kǝla lumsǝo mala pàcau mala Ɓakuli.

²⁴Amǝnia yì agir ka, à nǝ̀ twalia kun-ndunocau na. Amamǝna mǝnia ɓari ka, à do a kun akurcau mala Ɓakuli mana ɓari ka. Mɓwama mǝdǝmbe yì Haga ka, cam a kun kurcau mana à pà a Nkono Saina, mǝnana kǝ ɓǝl amuna mǝnana aguro mala nggurcau na ka.

²⁵Sǝ Haga, mǝnana cam a kunì Nkono Saina a nzali Arabiya ka, nda lǝmndǝ nggeala Urǝshalima mǝnana ado ka, acemǝnana yì andǝ aɓwana male ka, à nda ka guro, aɓata nggurcau.

²⁶Sǝ ɓe mɓwama man yì Saratu ka, nda kǝla Urǝshalima, mǝnana a kuli ka. Yì ka, guro na ɗang. Sǝ Urǝshalima mǝnana a kuli ka, nda nggea sǝm kat.

²⁷Kǝla mǝnana mǝɓangna mala Ɓakuli yì Ishaya na ama: “Pak banɓoarnado, we nkombi, mǝnana à kǝ ɓǝl muna raka! Mak yalang, ace bumpwasǝa, we ɓwan a ok kwanban mala gbashi raka! Acemǝnana mɓwama mana burri ginǝki o ɗeki ka, adyan ngga ndanǝ amuna pas, à kutini mala mɓwama mana burri ɗeki raka.”[33]

²⁸Sǝ ado ka, wun amǝ'eambǝam, wu nda ka amuna mala kurcau, kǝla mana Ishaku pak ka.

²⁹Muna mana à ɓǝli nǝ ɓariki mala ɓwapǝndǝa ka, pe Ishaku, yì muna mǝnana à ɓǝli nǝ rǝcandǝa mala Bangŋo mala Ɓakuli ka, tanni. Anggo gbal yalung ngga, aɓwana mǝnana à kǝ earce ama ɓǝ̀ wu kpata nggurcau ka, à kǝ pa wun tanni.[34]

³⁰Sǝ mana Malǝmce na amuri ɗe? Na ama, “Pǝr man-guro andǝ muni, acemǝnana muna mala man-guro ka, pà nǝ̀ dapi ata liɓala andǝ muna mala mǝtala ɓala ɗang.”[35]

³¹Ace mani ka, wun amǝ'eamrǝarǝu, sǝm ngga, sǝm nda ka amuna mala man-guro ɗang; sǝm nda ka amuna mala man-ala mana à ɓǝli aɓa do ɓamuru ka.