Read mbula bwazza Amǝ Galati 5 Bible Online

Amǝ Galati 5 - mbula bwazza bible

Amǝ Galati 5

¹A mǝsǝcau ka, Kǝrǝsti panzǝna sǝm; ace mani ka, wu cam kàngkàng aɓa mǝnia yì panzǝban ngga, wu kǝa na ama wu nǝ̀ taɓǝli rǝ wun aɓa doguro mala Nggurcau mala Musa ɗǝm ɗang.

²Wu kwaki kir wun! Mim Bulǝs ǝn nggǝ na wun mǝnia yì cau ka: Ɓǝ̀ wu eare à kasǝa ɓata wun ama, nda nǝ̀ tsǝk ɓwa ɓǝ̀ duk pepe a ɓadǝm Ɓakuli ka, lǝmndǝ ama Kǝrǝsti ka nda ɓà aban wun.

³Ən nggǝ ɓǝsǝlǝa wuni ɗǝm ama, ɓwa mǝnana kpata nzongcau mala kasǝ-ɓatau ka[36], dumǝni wi púp ɓǝ̀ kpata anzongcau mala Musa kat.

⁴Acemǝnana ɓǝ̀ wu kǝ ɓariki ama, wu nǝ̀ kum akban aban Ɓakuli nǝ kpata Nggurcau ka, wu gauwuni tarǝ wun wunǝi yì Yesu, wu purni ɓata ɓwamuru mala Ɓakuli.

⁵Sǝ sǝm ngga, ace paɓamuru ma'sǝm aban Kǝrǝsti ka, sǝm tsǝk ɓalǝ sǝm, sǝm nggǝ kúndǝo nǝ rǝɓǝla ɓǝ̀ Ɓakuli ak sǝm, ɓǝ̀ nyesǝ sǝm ɓǝ̀ sǝm duk pepe a ɓadǝmbǝi nǝ Bangŋo male.

⁶Ɓǝ̀ ɓwa tsǝngŋǝna paɓamuru male aban Kǝrǝsti Yesu ka, ɓe kǝ girkuma pà kàm aɓa kasǝ-ɓatau, ko ɗwanyi kasǝ-ɓatau ɗang. Gir mǝnana ɓoaro à nǝ̀ na ce ka nda kǝ paɓamuru mǝnana kǝ lǝmndǝrǝi aɓa earcearǝu ka.[37]

⁷Wu tite ka, wu nda arǝ lidǝmbǝa pepe. Sǝ yana yi tamsǝ wun ɗǝm arǝ kpata mǝsǝcau?

⁸Mǝno yì swarkiban ngga, à pà nǝ̀ na ama pur nǝban Ɓakuli ɗang, acemǝnana yì nǝ̀ tunǝ wun sǝ yiu nǝ wun aɓa panzǝban.

⁹Kanigir mǝ'nyir nì ka, nda kǝla yist mǝnana bǝti ka, nǝ̀ aki ɓa dyar bǝredi kat, nǝ̀ ci ɓǝ̀ vwali ka.[38]

¹⁰Mǝ ndanǝ makɓalǝu arǝ Mǝtalabangŋo ama pa wu nǝ̀ ɓinǝ cau mem, wu nǝ̀ earnǝ ɓe kǝ cau ɗang. Ɓakuli nǝ̀ ɓashi mǝno yì ɓwa kǝ zurǝki kusǝ wun ngga, ko ɓǝ̀ yì nda yan ngga.

¹¹Wun amǝ'eamrǝarǝu, ɓǝa bangŋa ama ado mǝno ka, cau mala kasǝ-ɓatau na ǝn nggǝ hamnǝi piu ka, palang sǝ mǝ nda aɓa nutanni a bu amǝ Yahudi? Sǝ ɓǝ̀ nda anggo ka, hamnǝ Cau Amsǝban mala Kǝrǝsti Yesu mǝnana ǝn nggǝ hamnǝi amur lú male a nggun-gangndi ka, ɓǝ́ pà nǝ̀ yinǝ bumkiɗikea aban amǝ Yahudi ɗang.

¹²Yale eare mem ngga nggearǝ aɓwana mǝnana à kǝ pa wun tanni, à kǝ zurǝki kusǝ wun nǝ cau mala kasǝ-ɓatau ka, ɓǝa jamsǝ ɓamuria, ɓǝa duk abaran nǝ yia.

¹³Wun amǝ'eambǝam, à tunǝ wun ace mǝnana ɓǝ̀ wu yi do aɓa panzǝban. Sǝa ma wu kǝa na ama wu nǝ̀ nyesǝ dopanzǝban mǝnana wu kumo à panzǝ wun arǝ Nggurcau ka, ɓǝ̀ dupa wun njargula kpata anpel mala nggūrǝu aban pakki acauɓikea ɗang. Akuni ka, wu kǝ pakkia rǝ wun turo aɓa earcearǝu.

¹⁴Nggearǝ anggurcau kat mǝnana Ɓakuli pâ ka, à ci kat aɓa mǝnia yì nzongcau mwashat mana ama: “Earce ɓeo mǝkunɓala kǝla mǝnana a earce ɓamuro ka.”[39]

¹⁵Sǝ ɓǝ̀ akuni lǝmndǝì arǝ wun earcearǝu, wu camarǝ munǝo andǝ loasǝban a rǝarǝ wun ngga, wu parkir wun, ɓǝ̀ a na raka wu nǝ̀ kiɗiki rǝarǝ wun.

¹⁶Cau mǝnana ǝn nggǝ bang ngga ndya ani ka: Wu nyinggi Bangŋo Mǝfele ban ɓǝ̀ ging nǝ yilǝmi wun. Anggo ka, pa wu nǝ̀ nggǝ pakki agir mala kpata suno mala nggūrǝu ɗang.

¹⁷Gir mǝnana nggūrǝu earkiyice ka nda a mgbasho nǝ gir mǝnana Bangŋo earkiyice ka. Sǝ Bangŋo ka, kǝ tsǝk sǝm arǝ earce agir mǝnana nggūrǝu ginǝki cea ka. Amǝnia yì agir ɓari ka, à nda ɓibura. Yia ka, à kǝ munǝo a rǝarǝia pwari-pwari. Nda gir mǝnana kǝ tsǝk wun sǝ wu kǝ gandǝ pak mǝɓoarne mǝnana wu kǝ earce pe ka raka.[40]

¹⁸Sǝ ɓǝ̀ wu nying Bangŋo mala Ɓakuli ging nǝ wun ngga, wu pa aɓata pe-púp mala Nggurcau mala Musa ɗǝm ɗang.

¹⁹Ɓǝ̀ wu kpata gir mǝnana nggurǝ wun mǝ'cauɓike earkiyi ce ka, ɓǝlle ka kǝ pusǝrǝi ani: kìɗìkì mala nongginǝ rǝarǝu, andǝ aturo pǝndǝki rǝǔ, andǝ ɗwanyi bwalrǝu arǝ pakkiagir kǝsǝkya,[41]

²⁰andǝ kpata agir mala alú, andǝ pakkia agir monzǝo, andǝ ɓinǝ-mǝsǝarǝu, andǝ munǝki arǝarǝu, andǝ mɓali, andǝ nggea bumlulla mǝɓane, andǝ earce ɓamuru, andǝ gakitarǝu, andǝ tarki rǝarǝu,

²¹andǝ shamgir mala ɓwa, andǝ wal-walo gir, andǝ ká kpapí mǝɓane mala nukiagir andǝ nongginǝban, andǝ acili acauɓikea kǝla amǝnia ka. Mǝ ɓǝsǝlǝa wuni ɗǝm kǝla mǝnana ǝn na wun a dǝmbǝa ka, ama ɓwa mǝnana kat kǝ do aɓata a'ulang mǝnia yì ado ka, pà nǝ̀ kutio a Domurǝm mala Ɓakuli ɗang.

²²Sǝ ɓǝ̀ Bangŋo Mǝfele na ginggi nǝ sǝm ngga, nǝ̀ pusǝ amǝnia yia aɓealǝu ka aɓalǝ sǝm: earcearǝu, andǝ bumpwasǝa, andǝ dorǝpwala,[42] andǝ munyi, andǝ tsǝkir ɓwa, andǝ pemǝɓoarne, andǝ do'amurmǝsǝcau,

²³andǝ ɓukɓuka,[43] sǝ bwalrǝu. Ɓe kǝ nggurcau pà kàm amur amǝnia yia agir ka ɗang.

²⁴Aɓwana mǝnana à mala Kǝrǝsti Yesu na ka, à gballìna ɓealǝu mala ɓwapǝndǝa mǝ'cauɓike andǝ anpel andǝ asuno male, amur nggun-gangndi mala Yesu.

²⁵Ɓǝ̀ sǝm nda ban do aɓata Bangŋo mala Ɓakuli ka, sǝm nǝ̀ kwaɗi lǝmndǝbu mala Bangŋo aɓa do ma'sǝm kat.

²⁶Ɓǝ̀ sǝm ngga gusǝlǝ mur sǝm, ko ɓǝ̀ sǝm nggǝ altacau arǝarǝ sǝm, ko ɓǝ̀ sǝm nggǝ pak mɓali arǝarǝ sǝm ɗang.