Read mbula bwazza Amǝ Afisu 2 Bible Online

Amǝ Afisu 2 - mbula bwazza bible

Amǝ Afisu 2

¹Ɗiɗyal ka, wu nda ka alú ace mgbikiru andǝ acauɓikea ma'wun.[8]

²Amǝno yia apwari ka, wu kǝ dukiado ma'wun aɓa cauɓikea kǝla mǝnana acili amǝ ɓanza kǝ pa, aban kpata Shetan, mana ginggi nǝ ɓanza mana à sǝnggiyi raka, sǝ bangŋo male na kǝ pak turo aɓalǝ aɓwana mǝnana à kǝ oki Ɓakuli raka.

³Sǝm kat ka, anggo sǝ sǝm duk ɗiɗyal aɓalǝia aban kpata asuno mala nggurǝu andǝ aɗenyicau mala ɓamurǝ sǝm, mǝ earce cauɓike. Sǝ mǝnia yì ɓealǝu ma'sǝm ngga tsǝa sǝm nda aɓata bumlulla mala Ɓakuli kǝla mǝnana ɓwapǝndǝa kat pak ka.

⁴Sǝ acemǝnana mǝsǝswatǝr mala Ɓakuli gul kpǝm, sǝ earce sǝm kǝrkǝr ka,

⁵nda gir nî sǝ kat andǝ wú mǝnana sǝm wu aɓalǝ acauɓikea ma'sǝm ngga, yi pa sǝm yilǝmu nǝ loasǝo mǝnana loasǝ Kǝrǝsti a ɓembe ka. Kǝ ɓwamuru mala Ɓakuli na nǝmurǝì amsǝ wun ngga.[9]

⁶Ɓakuli loasǝ sǝm a lú a tarǝ sǝm sǝnǝa Kǝrǝsti, sǝ dumsǝ sǝm ate akano a kuli, acemǝnana sǝm nda aɓa kpapi sǝnǝa Kǝrǝsti Yesu ka.

⁷Ɓakuli pe anggo ace mǝnana arǝ anza mǝnana à kǝ yiu a dǝmbǝa ka, nǝ̀ lǝmndǝ bui arǝ sǝm. Nǝ̀ na ama, sǝm ndaka turo mala ɓwamuru andǝ mǝsǝswatǝr male mǝgule andǝ mǝɓoarne kǝrkǝr, mǝnana lǝmndǝa sǝmi ata cau mala gir mǝnana Kǝrǝsti Yesu pè ka.

⁸Ɓwamuru mala Ɓakuli na amsǝ wun ngga, nǝ paɓamuru ma'wun abani. Mǝnia ka, pe ma'wun na ɗang, ɓoro mala Ɓakuli na,[10]

⁹pa ace aturo ɗang, ace mani ka, kǝɓwa ɓǝ̀ kǝa nggori ɗang.

¹⁰Sǝm nda ka aturobu mǝgule mala Ɓakuli. Yì ka, pusǝ sǝm abǝshe aɓa kpapi ma'sǝm sǝnǝa Kǝrǝsti Yesu, ace pakki aturo mǝɓoarne mǝnana ak dǝmbǝa cia ace sǝm ngga.

¹¹Ace mani ka, wun aɓwana mǝnana à ɓǝl wun ngga, wu ndaka amǝ Yahudi raka, wu ɗenyi ama ɗiɗyal ka, wu pa aɓalǝ amǝ Yahudi, aɓwana mana Ɓakuli kurcau nǝia ka ɗang. Yia amǝ Yahudi mǝnana à kǝ jali nǝ kasǝ ɓatau ka, à kǝ tunǝ wun ama, “amǝ ɗwanyi kasǝ ɓatau,” kat andǝ amani ama kasǝ ɓatau malea ka mala nggūrǝu na, je ɓabumia raka.

¹²Aɓa doe ɗiɗyal anggo ka, kǝgir kpapi wun wunǝ Kǝrǝsti ɗang. Wu nda ka abǝri mǝnana à pa aɓalǝ amǝ Isǝrayila, aɓwana mǝnana Ɓakuli tàrria ka ɗang, sǝ wu panǝ kāmbe aɓa kurcau mala Ɓakuli mana kwakite amur apàcau male aban aɓwana male ka ɗang. Wu dukiado ma'wun a ɓanza, wu panǝ Ɓakuli ɗang, sǝ wu panǝ tsǝkɓalǝu ɗang.

¹³Sǝ a dyan ngga, à dapina wun, wunǝ Kǝrǝsti Yesu. Ɗiɗyal ka, wu tári Ɓakuli ta wun zak, sǝ adyan ngga, à nyesǝna wun abani tu nǝ nkila mala Kǝrǝsti.

¹⁴Kǝrǝsti nǝ nggearǝì ka, yina nǝ dorǝpwala. Aɓa lú male amur nggun-gangndi ka, yi dapi amǝ Yahudi andǝ aɓwana mala acili anzali, à duk aɓwana mǝ'mwashati. Yi arki sheran mala ɓinǝ-mǝsǝarǝu mǝnana gau nre sǝm ngga.

¹⁵Nǝ́ lú andǝ lo male a ɓembe ka, yi wal nggurcau andǝ anzongcau, andǝ akuncau mala amǝ Yahudi. Yiu nǝ dorǝpwala a nre ka amǝ Yahudi andǝ aɓwana mǝnana amǝ Yahudi na raka. Yiu nǝ aɓwana mala amǝnia yì akāmbe ɓari ka, ɓǝa duk aɓwana mǝ'mwashati mala bǝsa nzali.[11]

¹⁶Nǝ́ lú male amur nggun-gangndi ka, Kǝrǝsti yiu nǝ dotarǝu mala amǝ Yahudi andǝ aɓwana mǝnana amǝ Yahudi na raka, aɓa nggūrǝu mwashat andǝa Ɓakuli. Anggo ka, yiu yi kiɗiki ɓibura mǝnana a nre rǝia ka.[12]

¹⁷Kǝrǝsti yiu yi hamnǝ mǝnia yì cau mǝɓoarne mala dorǝpwala ka aban wun, wun aɓwana mǝnana amǝ Yahudi na raka, mǝnana wu nda kuko nǝ Ɓakuli ka, andǝ sǝm amǝ Yahudi mǝnana abani tu ka.[13]

¹⁸Adyan ngga, sǝm kat ka, sǝm nǝ̀ gandǝ yiu aban Ɓakuli Tarrû aɓa Bangŋo mǝ'mwashati nǝ bu Kǝrǝsti.

¹⁹Sǝ adyan ngga, wun aɓwana mǝnana wu ndaka amǝ Yahudi raka, wu nda ka abǝri andǝ amǝ'kunɗangna ɗǝm ɗang, wu nda ka aɓwana mala nzali mwashat wunǝ aɓwana mala Ɓakuli. Wu nda aɓalǝ amǝɓala mala Ɓakuli.

²⁰Sǝm dapi kat ka, sǝm dumǝna ɓala male, mǝnana à ɓè amur kusǝɓa mala amǝ'mishan andǝ amǝ'ɓangna mala Ɓakuli ka. Sǝ nggea tali mǝnana kùr kusǝɓǎ ka, nda Kǝrǝsti Yesu nǝ nggearǝì.

²¹Kǝrǝsti nda mǝnana tamsǝ mǝnia yì ɓǎ ka kat, bwali a rǝarǝia sǝ kǝ ci ɓǝ̀ gulo ɓǝ̀ duk Ɓala Mǝgule ace Mǝtalabangŋo.

²²Nda aɓa kpapi ma'sǝm sǝnǝa Kǝrǝsti, sǝ wun, aɓwana mǝnana amǝ Yahudi na raka, à nda rǝ ɓak wun gbal wunǝ acili amǝkwaɗi, amǝ Yahudi, ace duk ban-do mala Ɓakuli nǝ bu Bangŋo male.