Read mbula bwazza Amǝ Afisu 5 Bible Online

Amǝ Afisu 5 - mbula bwazza bible

Amǝ Afisu 5

¹Acemǝnana wu nda ka amuna mala Ɓakuli ka, ɓǝ̀ mana wu nǝ̀ pak ka wu kànì arǝ Ɓakuli.

²Do ma'wun ngga, ɓǝ̀ lumsǝ nǝ earcearǝu, kǝla mana Kǝrǝsti earce sǝm, sǝ pa yilǝmi duk gir'nkila ace sǝm, mǝnana duk ɓoro mǝɓoarne mana pwasǝbum Ɓakuli ka.[23]

³Nongginǝban, andǝ koya ulang ɓe kǝgir mǝɓeami, ko nzumon ka, ɓǝa kǝa kumia aɓalǝ wun ɗang. Acemǝnana amǝnia yì agir ka, à kārǝa arǝ do mala aɓwana mala Ɓakuli ɗang.

⁴Naki acaubwena, andǝ ndoro mǝɓane, andǝ banggia cau mǝɓangge ka, ɓǝ̀ kǝa pur a kun wun ɗang. Kǝ yàwá na wu nǝ̀ nggǝ pakki Ɓakuli ka.

⁵Wu nǝ̀ gandǝ sǝlǝ kàngkàng ama ɓwa mana kat mǝ nongginǝban na, ko mǝ pakki agir ɓeami na, ko mǝ nzumon na ka, pà nǝ̀ kum kutio a Domurǝm mala Kǝrǝsti andǝ Ɓakuli ɗang. Acemǝnana nzumon ka, ndá mwashat andǝ peri aban agirkuncau.

⁶Wu kǝa eare aɓwana mǝnana à kǝ ne ɓamuria ama amǝnia yì acauɓikea ka, à kǝgir na raka, ɓǝa swarki wun ɗang. Acemǝnana bumlulla mala Ɓakuli nǝ̀ sulǝ amur aɓwana mana kat à kǝ kwaɗi cau male raka.

⁷Wu kǝa oasǝki abu wun aɓalǝ agir mǝnana amǝnia yì aɓwana pakkiyi ka ɗang.

⁸Ɗiɗyal ka, wu nda aɓa pǝndǝa, sǝ a dyan ngga, wu kumǝna tǎlaban a bu Mǝtalabangŋo. Ace mani ka, wu dukdo mala aɓwana mǝnana à nda aɓa tǎlaban ngga.

⁹Acemǝnana mǝnia yì tǎlaban aɓalǝ wun ngga, nda nǝ̀ pusǝ mǝɓoarne, andǝ mana pepe, andǝ mǝnana mǝsǝcau na ka.

¹⁰Wu tsǝk ɗenyicau ma'wun arǝ pak agir mǝnana nǝ̀ pwasǝ bum Mǝtalabangŋo ka.

¹¹Wu cam zak, wu kǝa oasǝ abu wun aɓalǝ aturo mǝɓane andǝ amǝ ɓealɓike mǝnana aɓwana kǝ pea aɓa pǝndǝa ka ɗang. A kun mani ka, wu pusǝtea.

¹²Nggearǝ gir kǝsǝkya na ɓǝa na cau mala agir mǝnana amǝno yì aɓwana pakkiyi aɓa sǝmbǝrǝa ka.

¹³Sǝ ɓǝ̀ tǎlaban yi tana amuria ka, aɗenyicau malea mǝɓane ka, à nǝ̀ pusǝ rǝia a banfana.

¹⁴Acemǝnana tǎlaban ngga kǝ pusǝ koya gir ka a banfana. Nda gir nî sǝ à na ma, “Loapi ntulo, we mǝ'nong-ntulo, loapi ɓembe, sǝ Kǝrǝsti nǝ̀ po tǎlaban.”

¹⁵Ace mani ka, wu tsǝk kir wun arǝ do ma'wun, wu kǝa dukdo mala aɓwazala ɗang, wu dukdo mala amǝkwaro.

¹⁶Wu pak turo nǝ koya dǝmbǝu mǝnana wu ndanǝi ado ka, acemǝnana apwari mana sǝm nda aɓalǝia ka amǝɓike na.[24]

¹⁷Wu kǝa pak gir mǝnana wu pak ɗenyicau amuri raka ɗang, wu bwalta kusǝ gir mǝnana Mǝtalabangŋo earkiyi ce ama wu pak ka.

¹⁸Wu kǝa wal-walo mùr-anap ɗang, acemǝnana nǝ̀ ká nǝ wun a do kiɗìkì. Wu lumsǝ nǝ Bangŋo mala Ɓakuli akuni.

¹⁹Wu kǝ nea arǝ wun cau nǝ anggyal peri aban Ɓakuli, andǝ anggyal ɓwangsǝki Ɓakuli, andǝ anggyal nǝ Bangŋo mala Ɓakuli. Wu kǝ ɓwangsǝ Mǝtalabangŋo a ɓabum wun nǝ agí zangŋan.

²⁰Wu kǝ pakki Ɓakuli Tarrû yàwá amur koya gir, a koya bu-pwari ka, aɓa lullǝ Mǝtala sǝm Yesu Kǝrǝsti.[25]

²¹Ɗǝm ngga, wu kǝ nongsǝ meal wun aɓata rǝ wun, ace kǝ gusǝlǝ Kǝrǝsti.

²²Wun amamǝna, wu nongsǝ meal wun aɓata abura wun, kǝla mǝnana wu nǝ̀ nongsǝî Mǝtalabangŋo ka.[26]

²³Acemǝnana ɓwabura ka, nda mur mami, kǝla mǝnana Kǝrǝsti ka, nda mur ikǝlisiya, yia amǝkpate, sǝ à nda ka nggūrǝì, yì mǝnana nda Mǝ'amsǝia ka.

²⁴Kǝla mǝnana ikǝlisiya nongsǝ meali aɓata Kǝrǝsti ka, anggo gbal sǝ wun amamǝna ka, wu nǝ̀ nongsǝ meal wun aɓata abura wun aɓa koya gir ka.

²⁵Wun aburana ka, wu earce amālá wun, kǝla mǝnana Kǝrǝsti earce ikǝlisiya, yia amǝkpate, sǝ pa yilǝmi kat ace ka.[27]

²⁶Kǝrǝsti pa yilǝmi ace mǝnana ɓǝ̀ tar aɓwana male, yì ikǝlisiya, ɓǝa duk a mala Ɓakuli, nǝ̀ nggǝ lea nǝ mur lakban mala cau mala Ɓakuli.

²⁷Pak mǝnia ka, ace mǝnana ɓǝ̀ yina ace twal ikǝlisiya nǝ̀ pe ɓamuri ka, ɓǝa kumi gǝraɗau aɓa ɓoarnsari, mǝnana kǝgir dung, ko kpami, ko kǝgir mǝpǝndǝke pa a rǝì raka; ɓǝ̀ kumi aɓa do tar ɓamuru ace Ɓakuli andǝ ɗwanyi cau a rǝǔ.

²⁸Kǝla mǝno ka, dumǝna ama ɓǝa burana ɓǝa earce amālea, kǝla mǝnana à kǝ earce nggūrǝia ka. Nggearǝ ɓwabura mǝnana earce mami ka, nda aban lǝmndǝì ɓamuri earcearǝu.

²⁹Ɓwa pà nǝ̀ ɓinǝ ce nggūrǝi ɗang, she nǝ̀ ɗenyi nǝi, nǝ̀ li nǝi, kǝla mǝnana Kǝrǝsti kǝ ɗenyi nǝ ikǝlisiya, yia amǝkpate ka.

³⁰Sǝ sǝm ngga, sǝm nda ka abare nggūrǝ Kǝrǝsti.

³¹Kǝla mana Malǝmce ne ka, “Ace mani ka, ɓwabura nǝ̀ ɗeki tarrí andǝ ngge, sǝ nǝ̀ lanzǝa arǝ mami, sǝ yia kǝm ngga, à dumǝna nggūrǝu mwashat.”[28]

³²Mǝnia ka, nggea gir sǝmbǝrǝa mǝgule na, mǝnana à pusǝ ɓālǝi aban aɓwana ɗiɗyal raka, sǝa ma mǝ ndarǝ bangŋa ama, mǝnia yì cau ka, à nda rǝ kani arǝ Kǝrǝsti andǝ ikǝlisiya.

³³Kat andǝ amani ka, koya ɓwabura ka, dumǝni wi pup ɓǝ̀ earce mami kǝla mǝnana kǝ earce ɓamuri ka, sǝ mɓwama gbal ka, dumǝni wi pup ɓǝ̀ pe burri gulo.