Read mbula bwazza Amǝ Filipi 4 Bible Online

Amǝ Filipi 4 - mbula bwazza bible

Amǝ Filipi 4

¹Ace mani ka, wun amǝ'eambǝam, wu cam kàngkàng aɓa kpata Mǝtalabangŋo. Wun mǝnana ǝn earkiyi earce wun raka, sǝ ɓabumam kǝ pi ace sǝn wun ngga, wu nda ka banɓoarnado mem andǝ mbulan-gulo mem.

²Ən nggǝ ɓuaki arǝ Yudiya sǝ ǝn nggǝ ɓuaki arǝ Sǝntǝki, wu earnǝ rǝarǝ wun, acemǝnana wun ngga, wu nda ka mala Mǝtalabangŋo.

³E, ǝn nggǝ zǝmbǝo gbal, we ɓiam mǝturo mǝɓafoe. Bwali amamǝna mǝnia ka. Yia ka à pak turo kǝrkǝr atam aban hamnǝ Cau Amsǝban, a tarǝ sǝm sǝnǝa Kǝlemen andǝ acili aɓiam amǝturo, mǝnana alullǝia ka, a nda aɓa Malǝmce mala Yilǝmu ka.

⁴Wu dum nǝ banɓoarnado aɓa dotarǝu ma'wun wunǝa Mǝtalabangŋo, a koya pwari ka. Nyare mǝ nǝ na wun ɗǝm: Wu pak banɓoarnado!

⁵Ɓǝ̀ ɓwapǝndǝa sǝn domunyi ma'wun aɓa girbunda kat. Pà nǝ̀ sau ɗang, Mǝtalabangŋo nǝ̀ yiu.

⁶Ɓǝ̀ kǝgir ɓǝ̀ kǝa tsǝk wun a do-tiki nǝ muru ɗang. Aɓa koya gir ka, wu pak hiwi nǝ zǝmbǝa, wu lǝmndǝì Ɓakuli agir mǝnana wu earkiyi cea ka, sǝ wu kǝ pak yàwá.[22]

⁷Sǝ dorǝpwala mala Ɓakuli, mǝnana kǝɓwa pà nǝ̀ bwalte raka, nǝ̀ bwal ɓabum wun andǝ ɗenyicau ma'wun aɓa Kǝrǝsti Yesu.

⁸A masǝlǝate ka, wun amǝ'eamrǝarǝu, ɓǝ̀ ɗenyicau ma'wun ɓǝ̀ do amur gir mǝnana kat mǝsǝcau na, nǝ̀ yinǝ gulo, à nǝ̀ pe aɓa kpate a njari, mǝɓoarnsari na, mǝɓoarne na, andǝ mǝnana à nǝ̀ earce ka. Gir mǝnana kat karban nǝ̀ ɓoaro, sǝ gir mǝnana kat nǝ̀ yinǝ ɓwangsǝban ngga, wu tsǝk ɗenyicau ma'wun amuria.

⁹Agir mǝnana kat wu kani, wu oe, wu é, sǝ wu sǝn a rǝam ngga, wu cia aɓa turo. Sǝ Ɓakuli mǝnana kǝ pa dorǝpwala ka, nǝ̀ do ata wun.[23]

¹⁰Ban kǝ ɓoaram kǝrkǝr nǝ Mǝtalabangŋo, ama wu lǝmndǝna ɗenyinǝban ma'wun acem ɗǝm. Ən sǝlǝna ama wu kǝ ɗenyi nǝ mim koya pwari, sǝ banì sauwuna bǝti mǝnana wu kum dǝmbǝu mala bwalam nggam raka.

¹¹Ən pa aban bang mǝnia yì cau ka, acemǝnana mǝ nda aɓa tǝle ka ɗang. Mim ngga ǝn kánìna do ɗǝmbǝa nǝ gir mǝnana kat mǝ ndanǝi ka,

¹²Ən surǝna rǝ do aɓa tǝle andǝ kume. Ən kánìna do aɓa koya gir; ko aɓa ɗǝmbǝo, ko aɓa nzala, ko aɓa kume kpǝm, ko aɓa ɗwanye.

¹³Mǝ nǝ gandǝ pak koya gir ka, nǝ rǝcandǝa mǝnana Kǝrǝsti kǝ pam ngga.

¹⁴Kat andǝ amǝno ka, gbasha mǝnana wu pakkam aɓalǝ atanni mem ngga, ndanǝ ɓoaro.

¹⁵[24] Wun amǝ Filipi ka, wu sǝlǝna ama aɓalǝ anonggeo mala tita turo hamnǝ Cau Amsǝban mem, lang ǝn nying Masǝdoniya ka, kǝ wu nda, kǝ ikǝlisiya mǝnana bwalam nggam, aɓa pa ɓoro ka. Kǝ ɓe ikǝlisiya pa kàm anggo ɗang.

¹⁶Ko mǝnana mǝ nda a Tasalonika ka, wu turam ban nǝ aɓoro, ace pakkam gbasha, pa kusǝ mwashat ɗang.[25]

¹⁷Ən pa aban bang mǝnia yì cau ka acemǝnana mǝ nda rǝ alta ɓoro aban wun ngga ɗang. Nda ace mǝnana ɓǝ̀ wu kum tangnakusǝu mala pe mǝɓoarne ma'wun ngga.

¹⁸Ado ka, ǝn kumǝna agir kat mǝnana ǝn earkiyi cea ka, yale nǝ mur amuri. Ən lumsǝna nǝ agirbunda kǝrkǝr nǝ aɓoro mǝnana wu tasǝam ban nǝia nǝ bu Apafuroditus ka. À nda kǝla aɓoro mǝɓoarne mǝnana agir'a na aban Ɓakuli sǝ à kǝ pwasǝbumi ka.[26]

¹⁹Ɓakuli mem nǝ̀ pa wun koya gir mǝnana wu kǝ pak tǝle ka, aɓa kume male nggea mǝ'nyangsangŋi[27] nǝ bu Kǝrǝsti Yesu.

²⁰Adyan ngga, ɓǝ̀ gulo o aban Ɓakuli, yì Tar sǝm, málá male pà kàm ɗang. Amin.

²¹Wu pà makkun mem aban amǝkpata Kǝrǝsti Yesu. Amǝ'eamrǝarǝu mǝnana sǝm nda a tarǝ sǝm ngga, à kǝ makka wun kun.

²²Aɓwana mala Ɓakuli kat kǝ makka wun kun, nggeamurǝmi ka amǝnana aɓa ɓala mala Kaisar[28] ka.

²³Ɓǝ̀ ɓwamuru mala Mǝtalabangŋo Yesu Kǝrǝsti do ata wun kat.