Read mbula bwazza Amǝ Kolosi 1 Bible Online

Amǝ Kolosi 1 - mbula bwazza bible

Amǝ Kolosi 1

¹Mim Bulǝs, mǝnana mǝ nda mǝ'mishan mala Kǝrǝsti Yesu, nǝ kani mala Ɓakuli ka, mim sǝnǝ mǝ'eam sǝm Timoti, sǝm gilǝ mǝnia yì Cautera ka.

²Aban ká aban aɓwana mala Ɓakuli mǝnana a nggeala mala amǝ Kolosi, yia amǝ'eamrǝarǝu aɓa Kǝrǝsti mǝnana à dum nǝ mǝsǝcau aban Ɓakuli ka. Tár sǝm Ɓakuli ɓǝ̀ pa wun ɓwamuru andǝ dorǝpwala.

³Aɓa hiwi ma'sǝm ace wun koya pwari ka, sǝm nggǝ pakki Ɓakuli, Tár Mǝtala sǝm Yesu Kǝrǝsti yàwá,

⁴acemǝnana sǝm ongŋǝna ce paɓamuru ma'wun aɓa Kǝrǝsti Yesu andǝ earcearǝu ma'wun aban aɓwana mala Ɓakuli kat.

⁵Mǝno yì paɓamuru andǝ earcearǝu ma'wun ngga, pur aɓa tsǝkɓalǝu ma'wun arǝ agir mǝnana Ɓakuli tsǝka wunì a kuli ka, mǝnana wu okce aɓa mǝsǝcau mala Cau Amsǝban

⁶mana à yinanǝi aban wun ngga. Mǝnia yì Cau Amsǝban ngga, nda ban mǝsǝe a ɓanza kat. Nda ban pusǝ ɓealǝu a koya ban, kǝ nggaɗi do mala aɓwana kǝla mǝnana nggaɗi do ma'wun, a pwari mǝnana wu tita o sǝ wu bwalta mǝsǝcau amur ɓwamuru mala Ɓakuli ka.

⁷Abafǝras, ɓi'sǝm mǝturo mǝnana sǝm earkiyi ace raka, nda ɓwa mǝnana nǝ baní sǝ wu kum sǝlǝe amur mǝnia yì ɓwamuru ka. Yì ka, mǝturo mala Kǝrǝsti na nǝ mǝsǝcau, sǝ nda mǝnana kǝ bwala sǝm turo ace wun ngga.[1]

⁸Yì ɗǝm ngga, yi bangŋǝna sǝm ce earcearǝu ma'wun mǝnana Bangŋo Mǝfele pa wun ngga.

⁹Ace mani ka, twal a pwari mǝnana sǝm tita okce wun ngga, sǝm usǝlǝkiyi pak hiwi ace wun ɗang. Sǝm nggǝ zǝmbǝi Ɓakuli ɓǝ̀ pa wun sǝlǝe mala surǝ gir mǝnana earkiyi ce kat ka, sǝ ɓǝ̀ pa wun sǝlǝe mala Bangŋo andǝ bwalta kusǝ agir male kat.

¹⁰Sǝm nggǝ pak hiwi mǝnia ka acemǝnana ɓǝ̀ do ma'wun, ɓǝ̀ gusǝlǝ Mǝtalabangŋo, ɓǝ̀ pwasǝ bumi a koya njar, nǝ pak koya turo mǝɓoarne. Anggo sǝ wu nǝ̀ nggǝ gulo aɓa surǝ Ɓakuli pepe.

¹¹Sǝm nggǝ pak hiwi ɗǝm ama ɓǝ̀ kusǝ wun ɓǝ̀ candǝ aɓa rǝcandǝa mala gulo male mǝnana karban kat ka. Anggo sǝ wu nǝ̀ kum gandǝrǝu aɓalǝ agirbunda kat nǝ munyi, sǝ wu nǝ̀ lumsǝ nǝ banɓoarnado.

¹²Ko aya pwari ka wu nǝ̀ nggǝ pakki Tar sǝm Ɓakuli yàwá. Yì na tsǝa sǝ wu duk aɓwana mǝnana wu karǝna wu nǝ̀ kum kāmbe ma'wun aɓa liɓala ata aɓwana male mǝnana à do aɓa tǎlaban ngga.

¹³Acemǝnana amsǝna sǝm aɓata parban mala Shetan, sǝ yina nǝ sǝm aɓa Domurǝm mala Muni mǝnana earkiyi ace raka,

¹⁴mǝnana akmúr sǝm sǝ twalban acauɓikea ma'sǝm ngga.[2]

¹⁵Kǝrǝsti ka nda ɓwa mǝnana à kǝ sǝni, mana lǝmndǝ Ɓakuli mǝnana à kǝ sǝni raka. Kaniama Ɓakuli nǝ̀ pusǝ agirbunda kat ka, yì ka, ndakam ata Ɓakuli kǝla Muna-dǝmbǝa male, sǝ ndanǝ gulo karmur agir kat mǝnana Ɓakuli pusǝia ka.

¹⁶Nǝ baní sǝ Ɓakuli pusǝ koya gir mǝnana a kuli andǝa mǝnana a nzali ka. Yì nǝ̀ pusǝ agir mǝnana à kǝ sǝnia andǝa mǝnana à kǝ sǝnia raka; kat andǝ abuno-murǝm, andǝ adomurǝm, andǝ amǝ'talanzali, andǝ amǝ bwal garamurǝm. Nǝ yi sǝ à pusǝ koya gir ka, sǝ àkǝ̀ ce gulo male sǝ à pusǝia.

¹⁷Kaniama à nǝ̀ pusǝ koya gir ka ndakam, sǝ yì nǝ̀ bwal agir mǝnana à pusǝia ka abanɓwáná.

¹⁸Kǝrǝsti ɗǝm ngga nda múr amǝkpate, yia amǝnana à nda ka nggūrǝi ka. Yì ka, nda tǝr bǝsa yilǝmu mala amǝkpate. Yì nda mǝdǝmbǝa loapi ɓembe, ace mǝnana aɓa ko man kat ka ɓe do nda mǝnana a dǝmbǝa amur agir kat ka.[3]

¹⁹Ace mani ka, Ɓakuli aɓa pa male kat ka, banɓoari wi ɓǝ̀ lǝmndǝ rǝì aɓa Muni,

²⁰sǝ nǝ ban Muni ka ɓǝ̀ gilǝki tárǝu mala agirbunda kat andǝi. Nǝ nkila mala Muni mǝnana sukki amur nggun-gangndi ka, yina nǝ dorǝpwala, ace mǝnana agir kat mǝnana a kuli andǝa mǝnana a nzali ka, à nǝ̀ nyesǝia aban Ɓakuli.[4]

²¹Ɗiɗyal ka wu cambi Ɓakuli zak. Wu duk aɓiubura mala Ɓakuli aɓalǝ aɗenyicau ma'wun, mana wu lǝmndǝi nǝ aturo ɓealɓikea ma'wun ngga.

²²Sǝ adyan ngga, Ɓakuli nyesǝna wun aɓa dotarǝu andǝi, nǝ lú mala Kǝrǝsti aɓa nggūrǝi mala ɓwapǝndǝa. Nyesǝ wun ace mǝnana ɓǝ̀ pǝlǝ wun, ɓǝ̀ wu duk aɓwana ace Ɓakuli, amǝ ɗwanyi cau a rǝǔ a sǝne male[5], aɓwana mǝnana à pà nǝ̀ tsǝkia wia kun raka.

²³Sǝa ma dumǝna púp wu nǝ̀ lidǝmbǝa nǝ earnǝ mǝno yì mǝsǝcau ka, andǝ tamsǝ kusǝ wun kàngkàng amuri. Wu kǝa tusǝ kusǝ wun arǝ tsǝkɓalǝu mǝnana wu oe aɓa Cau Amsǝban ngga ɗang. Mǝnia yì Cau Amsǝban ngga à hamǝna nǝi a koya bum-ban a ɓanza, sǝ àkǝ̀ ce sǝ mim Bulǝs ka, ǝn duk guro mala Ɓakuli, ace hamnǝi.

²⁴Sǝ ado ka ban kǝ ɓoaram arǝ tanni mǝnana ǝn nggǝ nu ace wun ngga. Acemǝnana aɓa tanni mem a nggūrǝu ka, mǝ nda ban ɓariki mǝ lumsǝkun gir mǝnana ueo aɓa tanni mala Kǝrǝsti ace nggūrǝi, yì amǝkpate.

²⁵Ɓakuli tsǝngŋǝnami a buam ɓǝn pakki ikǝlisiya, yia amǝkpata Yesu turo, mǝ nggǝ hamnǝ cau male kat aban wun.

²⁶Mǝnia yì cau ka à sǝmbǝrǝ ce arǝ apǝlǝa ɓara-ɓara andǝ anza mǝno à kutikina ka, sǝ adyan ngga à pusǝni aban aɓwana mala Ɓakuli, ɓǝa sǝlǝ ce.

²⁷Ɓakuli earnace ɓǝa aɓwana male sǝlǝ ce gulo andǝ kume mana aɓa mǝnia yì cau-ɓa-sǝmbǝrǝa, mǝnana ndanǝi ace aɓwana mana amǝ Yahudi na raka. Sǝ mǝnia yì cau-ɓa-sǝmbǝrǝa ka nda mǝnana ama: Kǝrǝsti na aɓalǝ wun, sǝ ace mǝno ka wu ndanǝ tsǝkɓalǝu mala kum kāmbe aɓa gulo mala Ɓakuli.

²⁸Nda gir nî sǝ sǝm nggǝ banggi aɓwana cau mala Kǝrǝsti, sǝm nggǝ nunkir koyan ngga. Sǝm nggǝ kani koyan ngga nǝ sǝlǝe mǝnana kat Ɓakuli pa sǝm ngga. Sǝm nggǝ earce ama sǝm nǝ̀ yinǝia a ɓadǝm Ɓakuli kǝla aɓwana mǝnana à lumsǝna aɓa do malea andǝ Kǝrǝsti ka.

²⁹Ace mani ka ǝn nggǝ pak turo, ǝn nggǝ ɓariki kǝrkǝr, nǝ guli arǝ rǝcandǝa mǝgule mala Kǝrǝsti mǝnana pakkiyi turo a ɓalǝam ngga.