Read mbula bwazza 1 Amǝ Tasalonika 4 Bible Online

1 Amǝ Tasalonika 4 - mbula bwazza bible

1 Amǝ Tasalonika 4

¹Sǝ ado ka, wun amǝ'eam sǝm, wu kumǝna kwarkiru nǝ bu sǝm amur njar mǝnana ɓoaro wu nǝ̀ dukdo sǝ ɓabum Ɓakuli nǝ̀ pwasǝ a rǝì ka. Sǝ ado mǝnana wu ndarǝ duk ulang mǝno yì do ka, sǝm nggǝ zǝmbǝa wun nǝ kwarkiru mǝcande aɓa lullǝ Mǝtalabangŋo Yesu, wu lidǝmbǝa nǝi aɓa pe anggo andǝ mǝnana kuti mǝno ka ko aya pwari, aban káne a dǝmbǝa.

²Wun ngga, wu surǝna rǝ akwarkiru mǝnana sǝm pà wun nǝ rǝcandǝa mala Mǝtalabangŋo Yesu ka.

³Mǝnia ka nda kani mala Ɓakuli aban wun, ama ɓǝ̀ wu tàr ɓamur rǝ wun aɓa do aceì, wu ɓanggi ɓealǝu mala kìɗìkì mala nongginǝ rǝarǝu.

⁴Koyan aɓalǝ wun ngga, ɓǝ̀ surǝ lang sǝ nǝ̀ bwal ɓamuri[9] aɓa do tár ɓamuru ace Ɓakuli andǝ do mǝnana nǝ̀ yiu nǝ gusǝlǝban ngga.

⁵Pà aɓa do nǝ npel mala nshawari mǝkǝrkǝr nì, kǝla pe mala amǝkpata ɓanza, aɓwana mǝnana à surǝ Ɓakuli raka ɗang.

⁶Aɓa mǝnia yì cau ka kǝɓwa ɓǝ̀ kǝa pakki ɓi mǝkwaɗi gir mǝɓane ko ɓǝ̀ ɓǝmbǝri aɓa kutio arǝ alta mami ko burri ɗang. Sǝm nanà wun ɗiɗyal nǝ nunkiru ama, Mǝtalabangŋo ka kǝ ɓashia aɓwana arǝ ulang amǝno yì acauɓikea ka.

⁷Ɓakuli ka, tunǝ sǝm ace do ɓa pǝndǝkya ɗang, tunǝ sǝm ace do tar ɓamuru ace Ɓakuli.

⁸Ace mani ka, ɓwa mǝnana kat ɓinǝ mǝnia yì kanigir ka, pa aban ɓinǝ nzongcau mala ɓwapǝndǝa ɗang, nzongcau mala Ɓakuli na ɓinǝkiyi ka, yì mǝnana kǝ pa wun Bangŋo Mǝfele male ka.

⁹Amur cau mala lǝmndǝia rǝ wun earcearǝu ka panǝ ɓoaro mǝ gilǝa wun kǝgir ɗang. Acemǝnana wun nǝ ɓamur rǝ wun ngga, Ɓakuli kánìna wun ɓǝ̀ wu earcea rǝ wun.

¹⁰Aɓa mǝsǝcau ka, mǝno nda kǝ gir mǝnana wu kǝ lǝmndǝì amǝ'eamrǝarǝu kat mǝnana aɓa nzali Masǝdoniya ka. Sǝa ma, wun amǝ'eamrǝarǝu, sǝm nggǝ kwarkir wun, wu lǝmndǝi aɓa pě mǝnana kuti mǝno ka aban ká nǝi a dǝmbǝa.

¹¹Wu ɓariki wu soa mǝsǝ wun arǝ dukdo bwalrǝu aɓa ɓukɓuka, wu kǝ tsǝk ɗenyicau arǝ aturo ma'wun, wu kǝa kutiki aɓalǝ acau mala aɓwana ɗang; sǝ wu kǝ pak turo nǝ abu wun, kǝla mǝnana sǝm bangga wun ɗiɗyal ka.

¹²Ɓǝ̀ wu kǝ pa anggo ka, nggearǝ aɓwana mǝnana amǝkwaɗi na raka, à nǝ̀ sǝn wun pepe nǝ pagulo. Sǝ pa wu nǝ̀ kúndǝo arǝ kǝɓwa ace kum gir mǝnana wu pak tǝle ka ɗang.

¹³Wun amǝ'eamrǝarǝu, sǝm nggǝ earce ama wu kǝa dumnǝ ɗwanyi sǝlǝe amur amǝkwaɗi mǝnana à wuna ka, ko wu nǝ̀ dumnǝ bumkiɗikea, kǝla aɓwana mǝnana à pànǝ tsǝkɓalǝu raka ɗang.

¹⁴Sǝm ngga, sǝm earǝna nǝi ama Yesu wú, sǝ loapi ɓembe nǝ yilǝmu. Ɗǝm ngga sǝm earǝna nǝi ama aɓwana mǝnana à wu aɓa paɓamuru malea aban Yesu Kǝrǝsti ka, Ɓakuli nǝ̀ loasǝia nǝ yilǝmu, nǝ̀ yinǝia abani a tarǝia andǝ Yesu.

¹⁵Mǝnia ka sǝm nggǝ bangga wun kǝla mǝnana Mǝtalabangŋo bangga sǝm ama: sǝm mǝnana à nying sǝm nǝ yilǝmu, ba pwari yiu mala Mǝtalabangŋo ka, pà sǝm nǝ̀ aki aɓwana mǝnana à wuna ka, dǝmbǝa o abani ɗang.

¹⁶Acemǝnana Mǝtalabangŋo nǝ ɓamuri ka, nǝ̀ sulǝ nǝ kuli, nǝ giu sàrǝban mǝcande mala gbani mala amǝturonjar, andǝ ɓua mala njawe tunǝban mala Ɓakuli. Sǝ aɓwana mǝnana à wú aɓa Kǝrǝsti ka, à nda à nǝ̀ tita loapi ɓembe nǝ yilǝmu ka.

¹⁷Sǝ sǝm, mǝnana sǝm ndanǝ yilǝmu sǝ sǝm ndakam piu a pwari mǝno ka, à nǝ̀ fà sǝm a tarǝ sǝm sǝnǝia aban o a kuli, aɓalǝ apǝrɓang, ace mǝnana ɓǝ̀ sǝm kya je sǝnǝa Mǝtalabangŋo a bumkuli ka. Anggo ka, sǝm nǝ̀ do a tarǝ sǝm sǝnǝa Mǝtalabangŋo, do mǝnana málá male pà kàm raka.[10]

¹⁸Ace mani ka, wu kǝ ɓakɓabum arǝ wun nǝ amǝnia yia acau ka.