Read mbula bwazza 1 Timoti 3 Bible Online

1 Timoti 3 - mbula bwazza bible

1 Timoti 3

¹Mǝnia yì cau ka, mǝsǝcau na, mǝnana ama: Ɓǝ̀ ɓwa earce buno mala ɓwamǝgule mur ikǝlisiya ka, earǝna ce turo mǝɓoarne.

²Sǝ ɓwamǝgule mur ikǝlisiya ka, ɓǝ̀ duk do ɗwanyi cau a rǝǔ. Yì ka, nǝ̀ duk bura mɓwama mwashat, andǝ do bwalrǝu, andǝ kwaro aɓa ɗenyicau, sǝ ɓwa na mǝnana aɓwana kǝ pe wi gulo ka. Yì ka, nǝ̀ duk mǝ ak abǝri a ɓala male, sǝ nǝ̀ duk mǝsǝlǝ kanigir.

³Yì ka, pà nǝ̀ duk mǝ'nuki agir andǝ wal-wale ɗang, pà nǝ̀ duk mǝ lullo ɗang, nǝ̀ pak ɓukɓuk, pà nǝ̀ earce loasǝkiaban ɗang, sǝ pà nǝ̀ duk mǝ rufi ata boalo ɗang.

⁴Dumǝna pup nǝ̀ bwal ɓala male pepe, sǝ nǝ̀ tsǝk amuni ɓǝa kǝ oki wi nǝ pagulo.

⁵Sǝ ɓǝ̀ ɓwa pà nǝ̀ gandǝ bwal ɓala male raka, lang sǝ nǝ̀ gandǝ tsǝk kir ikǝlisiya mala Ɓakuli?

⁶Ɓwamǝgule mur ikǝlisiya ka, ɓǝ̀ kǝa duk ɓwa mǝnana loa paɓamuri aban Ɓakuli ka ɗang, acemǝnana nǝ̀ nggǝ twalɓamuri. Sǝ twalɓamuru nǝ̀ ci nǝ̀ kpa aɓa ulang ɓashi mǝnana à nǝ̀ pakki mǝɓealɓikea ka.

⁷Ndanǝ ɓoaro ɗǝm ɓǝa aɓwana mana amǝ'kwaɗi na raka, ɓǝa kǝ na mǝɓoarne amuri, ace mǝnana ɓǝ̀ kǝa kum kǝsǝkya, ɓǝ̀ kpa aɓa gbǝli mala mǝɓealɓikea ɗang.[7]

⁸Amǝ'bwal kun turo ndahiwi gbal ka, dumǝna pup ɓǝa kumia nǝ ɓealǝu mǝɓoarne, ɓǝa kǝa duk amǝ'kunɓarina ɗang. À pà nǝ̀ duk amǝ ɓiki nu mùr ɓǝlanggun anap, ko amǝ alta kume nǝ ɓǝmbǝriki aɓwana ɗang.

⁹Dumǝna pup à nǝ̀ bwal gir mana à lǝmndǝi nda mǝsǝcau mǝlime mala do paɓamuru mala amǝkwaɗi nǝ ɗenyicau mǝɓoarnsari.

¹⁰Ɓǝa sǝn gya malea peatu pepe, ɓǝa kumia nǝ do mǝɓane raka, sǝ ɓǝa bwalturo ndahiwi.

¹¹Anggo gbal, sǝ duk pup ama, amamǝna mǝnana amǝ'bwalturo ɓa ndahiwi[8] na ka, ɓǝa kumia nǝ ɓealɓoarna, ɓǝa kǝa duk amǝ twalki alullǝu ɗang, ɓǝa dum nǝ bwalrǝu andǝ mǝsǝcau aɓa koya gir.

¹²Mǝ'bwal kun turo ndahiwi ka, dumǝna pup nǝ̀ duk bura mɓwama mwashat, nǝ̀ bwal amuna andǝ ɓala male pepe.

¹³Aɓwana mǝnana à pak turo malea pepe ka, à nǝ̀ kumbi ɓamuria lullǝu mǝɓoarne, sǝ à nǝ̀ bang cau nǝ mǝsǝkang-kangŋa amur paɓamuru malea aban Kǝrǝsti Yesu.

¹⁴Mǝ ndanǝ tsǝkɓalǝu ama mǝ nǝ ká aban wun banì pà nǝ̀ sau ɗang. Sǝ mǝ ndaban gilǝa mǝnia yì gir ka, ace mǝnana ama,

¹⁵ɓǝ̀ ǝn wari tu raka, wu surǝ ulang do mǝnana koyan aɓalǝ amǝ'ɓala mala Ɓakuli nǝ̀ dum nǝi ka. Acemǝnana ikǝlisiya mala Ɓakuli mǝyilǝmuì ka, nda nggun ɓalǝu andǝ kusǝɓa mala mǝsǝcau.

¹⁶Kǝ̀ makgir pà kàm ɗang, gir ɓa-sǝmbǝrǝa mala cau paɓamuru ma'sǝm ngga lim kǝkǝr: Kǝrǝsti ka, yi pur aɓa nggūrǝ ɓwapǝndǝa, sǝ à lǝmndǝi mǝ'cauɓoarna na nǝ bu Bangŋo mala Ɓakuli. Amǝturonjar sǝni, sǝ à hamnǝ cê aban aɓwana mala aɓea anzali. Aɓwana a ɓanza paɓamuria abani, sǝ à twali à um nǝi a kuli aɓa ɓoarɓwa.