Read mbula bwazza 1 Timoti 6 Bible Online

1 Timoti 6 - mbula bwazza bible

1 Timoti 6

¹Amǝkwaɗi mǝnana à nda ɓata twalo mala doguro ka, ɓǝa kǝ pe amǝtala-ɓala malea gulo pepe, ace mǝnana aɓwana ɓǝa kǝa na mǝɓane amur Ɓakuli andǝ kanigir ma'sǝm raka.

²Amuna-ɓala mǝnana amǝtala-ɓala malea ka amǝkwaɗi na ka, ɓǝa kǝa ci ate ama amǝ'eambǝu na à nǝ̀ ɗwanyi pea wia gulo ɗang. Akuni ka, ɓǝa pakkia wia turo anjar mǝnana ɓoaribanì ka, acemǝnana amǝtala-ɓala malea mana à kǝ li mǝɓoarne aɓalǝ aturo malea ka aɓia amǝkwaɗi na, sǝ aɓwana na mǝnana Ɓakuli kǝ earcea ka. We Timoti ka, wu kǝ kani aɓwana mǝnia yì mǝsǝtacau ka, sǝ wu kǝ kwarkiria ɓǝa kǝ kpatea.

³Ɓǝ̀ kǝ ɓwa kǝ yinǝi ɓe kanigir mana nda ɗàng andǝ mǝnia, sǝ earnǝ kanigir mǝ'mǝsǝcau nì mala Mǝtalabangŋo Yesu Kǝrǝsti, andǝ kanigir mala do mǝkpata Ɓakuli raka,

⁴ɓwe ka, twalɓamuru akini, sǝ surǝ kǝgir ɗang. Ulang mǝnia yì ɓwa ka, ndanǝ ɓabum mǝɓane mala makgir andǝ loasǝkiaban amur acau mana à kǝ yinǝ mɓali, andǝ kúnɓuana, andǝ kiɗiki ɓwa, andǝ nusǝban nǝ mǝɓane.

⁵Amǝnia yia aɓwana ka à nda aɓa yinǝ do mǝɓike koya pwari ka. Ɓabumia pǝndǝkina nǝ ɓealɓikea andǝ ɗwanyi kpata gir a njari andǝ mǝsǝcau. Abania ka, kpata Ɓakuli ka, njar mala ram gǝna na.

⁶Sǝ yale kpata Ɓakuli a tarǝia andǝ kum ɗǝmsǝban aɓa do nǝ mo'amurbuo ka,[13] kum gǝna mǝgule na.

⁷Acemǝnana sǝm ngga sǝm yinǝ kǝgir a bu sǝm a ɓanza ɗang, sǝ pa sǝm nǝ̀ umnǝ kǝgir gbal ɗang.

⁸Ace mani ka, ɓǝ̀ sǝm ndanǝ girlina andǝ agir-nggurǝu ka, mǝnia ka karǝna sǝm.

⁹Sǝ aɓwana mǝnana à kǝ alte ama à nǝ̀ duk amǝkume ka, à kǝ kpa aɓa karǝkiban, andǝ gbǝli, andǝ kum ɓamuria aɓalǝ azǝnda mala agir mǝɓane pas. À nǝ̀ kum ɓamuria aɓalǝ agir mala yinǝ mǝɓike a rǝia, mǝnana à nǝ̀ ngga masǝlǝia aɓa kiɗikiban andǝ lu-bǝsa ka.

¹⁰Acemǝnana rufi ata boalo ka, nda nlerǝ koya ɓealɓikea. Aɓea aɓwana mana bumia kǝ pi ace alta gǝna ka, gandǝa à kpana, à ɗekina paɓamuru malea aban Ɓakuli, à soana ɓabumia nǝ agir bumkiɗikea.

¹¹Sǝ we Timoti ka, a nda ɓwa mala Ɓakuli. Ace mani ka, ɓanggi agir mǝɓike mǝnia kat ka, sǝ wu kpata pakgir a njari andǝ pe mǝɓoarne, andǝ docauɓoarna, andǝ do ɓwa mala Ɓakuli, andǝ paɓamuru, andǝ earcearǝu, andǝ bwalrǝu, andǝ do ɓukɓuka.

¹²Munǝ munǝo mǝɓoarne mala paɓamuru. Bwal kàngkàng arǝ yilǝmu mǝnana málá male pà kàm raka, mana Ɓakuli tunǝo ace, sǝ a náná paɓamuru mo a rǝì a ɓadǝmbǝ amǝnakun pas ka.

¹³Ado ka mǝ nda ban tsǝko nzongcau a ɓadǝm Ɓakuli mǝnana pākiyi ko man ngga yilǝmu, sǝ a ɓadǝm Kǝrǝsti Yesu, mǝnana nakuni pepe a ɓadǝm Buntu Bilatus ka.[14]

¹⁴Kpata nzongcau mǝnia ka nǝ ɓabumo mwashat andǝ ɗwanyi cau a rǝǔ, twal adyan ba pwari nyare yiu mala Mǝtala sǝm, Yesu Kǝrǝsti.

¹⁵Ɓǝ̀ pwari nì yi karǝna ka, Ɓakuli mana ɓwangsǝban kat abani sǝ pa, sǝ yì nǝmurǝì nda Mǝyalban, yì Murǝm mala amurǝma andǝ Gbani amur amǝ'talanzali ka, nǝ̀ yia lǝmndǝ Kǝrǝsti nǝ kuli.

¹⁶Kǝ yì mwashat, nda mǝnana pà nǝ̀ wu raka, sǝ ban-do male ka, nda aɓa tǎlaban mǝcande mana kǝɓwa pà nǝ̀ gandǝ sungŋo abani raka. Kǝ mǝsǝu malaká sǝni ɗang, sǝ kǝ ɓe pà kàm nǝ̀ sǝni ɗang. Abani kat, sǝ gulo andǝ rǝcandǝa mǝnana málá male pà kàm raka, pa! Amin.

¹⁷Kwarkir amǝkume mǝnana a ɓanza man ngga, ɓǝa kǝa twalɓamuria ɗang, sǝ ɓǝa kǝa tsǝkɓalǝia arǝ agǝna malea mǝnana à kǝ kuti nǝ kutio ka ɗang. Tsǝkɓalǝu malea ka, ɓǝ̀ do amur Ɓakuli, yì ɓwa mǝnana kǝ pa sǝm nyangsang agir mǝnana kat sǝm nggǝ earce ace banɓoarnado ma'sǝm ngga.

¹⁸Nea wia ɓǝa kǝ pak mǝɓoarne nǝ boalo malea. Ɓǝa duk amǝkume aɓalǝ aturo mǝɓoarne, sǝ ɓǝa kǝ pabu aban aɓwana mǝnana à panǝi raka. A koya pwari ka, ɓǝa kǝ kumia nǝ gilǝrǝu mala bwalia aɓwana kam, nǝ agir mǝnana kat Ɓakuli pea wia ka.

¹⁹Aɓa pe mǝno anggo ka, à nǝ̀ nggǝ rambǝi ɓamuria gǝna mana nǝ̀ dupia wia tǝr kum do mǝɓoarne a nza mǝnana kǝ yiu ka, sǝ do nǝ yilǝmu mǝɓafoe ka à nǝ̀ kumi nǝ̀ duk malea.

²⁰Timoti, tsǝk kir gir mǝnana Ɓakuli po a buo ka. Yal ɓamuro arǝ naki acauɓana mala agir mǝnana à kǝ yinǝi Ɓakuli gulo raka, andǝ acau a mgbasho mǝnana aɓea ɓwana tunǝi aɓa ɓwarkio ama “Sǝlǝe” ka.

²¹Aɓea ɓwana twali ama à ndanǝ mǝno yì “Sǝlǝe” ka, gandǝa warinia à ɓwarkini tanjar mala dokwaɗi. Ɓǝ̀ ɓwamuru mala Ɓakuli do ata wun kat.