Read mbula bwazza 2 Timoti 4 Bible Online

2 Timoti 4 - mbula bwazza bible

2 Timoti 4

¹Ən nggǝ nunkiro a ɓadǝm Ɓakuli andǝ Kǝrǝsti Yesu, mǝnana nǝ̀ yia ɓashì aɓwana mǝnana à ndanǝ yilǝmu andǝ amǝnana à wuna ka, a pwari yiu male mǝnana nǝ̀ yiu a dumsǝ domurǝm male ka.

²We ka, hamnǝ cau mala Ɓakuli. Do aɓa gilǝrǝu ace mǝnia yì turo ka, ko njar na kam ko pà kàm ɗang. Lǝmndǝi aɓwana ɓwarkio malea, nunkiria, sǝ wu ɓak ɓabumia nǝ munyi mǝgule andǝ kwarkiru ɓukɓuk.

³Acemǝnana pwari na kǝ yiu ka, mǝnana ɓwapǝndǝa pa nǝ̀ earnǝ kanigir mǝɓoarne raka. A kun mani ka, à nǝ̀ rambǝa amǝkanigir a rǝia mǝnana à nǝ̀ pwasǝ bumia nǝ nea wia gir mǝnana kiria kǝ oākia a rǝì, sǝ à earkiyi ce oe ka.

⁴À nǝ̀ ɓinǝ mǝsǝcau, à pànǝ earce oe ɗang, à nǝ̀ o ata njarnzǝne.

⁵Sǝ we ka, hami rǝo aɓa koya ulang ɓealǝu mala do, dumnǝ gandǝrǝu aɓa nutanni, pak turo mala Mǝhama, lumsǝ turo mǝnana a pakkiyi ace Ɓakuli ka.

⁶Ma mem ngga, pwari karǝna ɓǝ̀ ǝn pa yilǝmem kǝla ɓoro mǝnana a pe Ɓakuli ka. Pwari nying ɓanza mem karǝna.

⁷Ən munǝna munǝo mǝɓoarne, mire mem bwalǝna masǝlǝate, sǝ ǝn camǝna kàngkàng aɓa paɓamuru arǝ Kǝrǝsti māna à pam a buam ngga.

⁸Sǝ ado ka, tangnakusǝam, yì jeko mala turo-cauɓoarna ka, nda rǝ kundǝam, mǝnana Mǝtalabangŋo, Mǝɓashi aɓa mǝsǝcau nǝ̀ pam a Pwari nyare male ka. Sǝ tangnakusǝu man ngga pa acem nǝmurǝam ɗang, nda gbal acea aɓwana mǝnana kat à kǝ earce yiu male ka.

⁹Timoti, ɓariki, yiu abanam a kaurǝa.

¹⁰Acemǝnana Dimas ɗeki nam, ace earce mǝnia yì ɓanza ka, umǝna a Tasalonika. Sǝ Kǝrǝsen ngga, umǝna a Galati, sǝ mala Titus ka, umǝna a Dalmatiya.[8]

¹¹Kǝ Luka, nda mǝnana abanam ngga. Ɓǝ̀ a nǝ yiu ka, wu yiu wunǝ Markus, acemǝnana nǝ̀ yia bwalam nggam arǝ turo mem.

¹²Tikikus ka, ǝn turni a Afisu.[9]

¹³Ɓǝ̀ a nǝ yiu ka, yinǝam nǝ nggea-daura mǝnana ǝn nyi a Tǝros, a ɓala mala Karpus ka. Sǝ wu yinǝam nǝ amalǝmce mem, andǝ anggu mǝnana à nǝ̀ gilǝ gir aɓalǝia ka.[10]

¹⁴Alizanda mǝntul, pakkam gir kwan rǝǔ kǝrkǝr. Ɓakuli nǝ̀ ɓashi wi ace agir mǝnana pak ka.[11]

¹⁵We gbal ka, tsǝk kiro a rǝì, acemǝnana kǝ munǝ arǝ koya cau sǝm bang ngga.

¹⁶Tita ká mem a ɓadǝm mǝɓashi ka, kǝɓwa cam a nzǝmam ɗang. Aɓwana mesǝe, à nyem nǝmurǝam. Ɓakuli ɓǝ̀ twalia wia banì, ɓǝ̀ kǝa ɓashia wia ɗang.

¹⁷Sǝa ma Mǝtalabangŋo na atam sǝ pam rǝcandǝa ace mǝnana ɓǝ̀ ǝn hamnǝ Cau Amsǝban kat ace aɓwana mana amǝ Yahudi na raka ɓǝa oe. Nyar ɗǝm ngga, amsǝam a bu lú, a kuna im mǝnana ɓǝ́ à nǝ̀ turam aɓalǝia ka.

¹⁸Yì, yì Mǝtalabangŋo ka, nǝ̀ amsǝam aɓalǝ aɓealɓikea kat, sǝ nǝ̀ ká nǝ mim jam aɓa domurǝm male mala kuli. Gulo ka, male na kat, masǝlǝate pà kàm ɗang. Amin.

¹⁹Makkia Pǝrisǝla andǝ Akila kun, andǝ amǝɓala mala Onisǝforǝs.[12]

²⁰Arasǝtus ka, nda piu a Korinti, sǝ Tǝrofimus ka, ǝn nyi nǝ rǝkwana a Miletus.[13]

²¹Ɓariki, yiu sǝ ɓǝ̀ kunɗwal sulǝo. Yubulǝs kǝ makko kun, sǝ anggo gbal Pudem, andǝ Linos, andǝ Kǝlaudiya, andǝ acilia amǝ'eamrǝarǝu kat.

²²Ɓǝ̀ Mǝtalabangŋo do ata bangŋo mo. Ɓǝ̀ ɓwamuru male do ata wun kat.