Read mbula bwazza Titus 1 Bible Online

Titus 1 - mbula bwazza bible

Titus 1

¹Cautera mǝnia ka pur nǝ banam Bulǝs, guro mala Ɓakuli andǝ mǝ'mishan mala Yesu Kǝrǝsti. À turam aban aɓwana mala Ɓakuli mana tària ka ace ɓak paɓamuru malea abani, sǝ mǝ kania wia ɓǝa surǝ mǝsǝcau mǝnana kǝ lǝmndǝì aɓwana njar mala dokpata Ɓakuli ka.

²Mǝno yì paɓamuru andǝ sǝlǝe ka, nda mǝnana kǝ pea wia tsǝkɓalǝu ama à nǝ̀ kum yilǝmu mǝnana málá male pà kàm raka, yì yilǝmu mǝnana Ɓakuli mana kǝ na nyir raka, bangŋa a shareta ɓanza ama nǝ̀ pea wia ka.

³Anggo lang pwari male mǝnana tsǝk ka yi karǝna ka, Ɓakuli yi lǝmndǝi a banfana aɓa cau male. Mǝnia yì cau ka, à pam sǝ ǝn yi hamnǝi kǝla mǝnana Ɓakuli Mǝ'amsǝ sǝm tasǝam ngga.

⁴Ən nggǝ gilǝì Titus, munem mǝ'mǝsǝcau nì aɓa paɓamuru mǝnana sǝm kat sǝm nda a ɓalǝi ka. Ɓǝ̀ Tar sǝm Ɓakuli andǝ Kǝrǝsti Yesu Mǝ'amsǝ sǝm, bwalo kam nǝ ɓwamuru andǝ dorǝpwala![1]

⁵Gir mǝnana tsǝa sǝ ǝn nyio a luran Kǝreti ka, nda mǝnana ama wu masǝlǝata pakki aturo mǝnana ɓoaro ɓǝa pea ka, sǝ wu twal aɓwana aɓa koya la, wu cia ɓǝa duk aɓwana-mǝgule mala turo mala Ɓakuli. Kǝla mǝnana ǝn banggo ka,

⁶ɓwamǝgule aɓa turo mala Ɓakuli ka, dumǝna púp ama nǝ̀ duk ɓwa mǝ'ɗwanyi cau a rǝǔ. Yì ka, nǝ̀ duk bura mɓwama mwashat, sǝ amuna male gbal ka, amǝkpata Ɓakuli na, mǝnana à surǝia nǝ ɓealǝu mala mgbikiru andǝ gandǝban raka.[2]

⁷Sǝ acemǝnana ɓwamǝgule amur ikǝlisiya ka, Ɓakuli panì wi turo ɗenyi nǝ aɓwana male yì Ɓakuli ka, dumǝna púp ama nǝ̀ dukdo ɗwanyi cau a rǝǔ. Pà nǝ̀ gulǝsǝmuru andǝ kaurǝ pak bumlulla ɗang. Pà nǝ̀ duk mǝ'nu'mba andǝ mǝ'munǝki amunǝo ɗang, sǝ pà nǝ̀ duk mǝ rufi ata kume ɗang.

⁸A kun mani ka, dumǝna púp ama nǝ̀ duk mǝ'ak aɓwana, andǝ mǝ'earce gir mǝnana mǝɓoarne na ka. Yì ka, nǝ̀ dum nǝ bwalɓamuru, andǝ came amur mǝsǝcau, andǝ do tar ɓamuru ace Ɓakuli, andǝ hamírǝu.

⁹Dumǝna púp ama nǝ̀ bwal kàngkàng arǝ kanigir mana à nǝ̀ earnǝi, kǝla mǝnana à kani wi ka. Anggo sǝ nǝ̀ kumo nǝ̀ bwali aɓwana kam nǝ kanigir mǝɓoarne, sǝ nǝ̀ lǝmndǝì aɓwana mǝnana à kǝ ɓinǝ mǝnia yì kanigir ka, ɓwarkio malea.

¹⁰Aɓwana na kana pas mǝnana amǝ'mgbikiru na, sǝ amǝ'fekicau na andǝ amǝ swarkiban. Banggulea ka à nda ka amǝ Yahudi mǝnana à pǝlǝ amǝkwaɗi sǝ à ɓinǝ kingging nǝ kania aɓwana gir ama, ɓǝa kasǝo ɓato raka, we ka a malaká kum amsǝban ɗang.

¹¹Amǝnia yia aɓwana ka, ɓǝa tamsǝia arǝ kani amǝkwaɗi gìr, acemǝnana nǝ akanigir mǝɓane malea ka, à nda ban tsǝk amǝɓala kat ɓǝa nying kpata kanigir mǝnana nda pepe ka. Tǝ́r kanigir mala amǝnia yì aɓwana ka, nda ace alta boalo mǝnana à nǝ̀ kumo a ɓalǝi ka.

¹²Nggearǝ ɓe mǝɓangna aɓalǝia ka bangŋa ama, “Amǝ Kǝreti ka amǝnyir na ko a ya pwari, aɓwana na nǝ ɓealǝu mala anyamɓikea, amǝligula amǝnkundǝr ni.”

¹³Cau mǝnia ka mǝsǝcau na. Ace mani ka, gimbia nǝ rǝcandǝa, ace mǝnana ɓǝ̀ paɓamuru malea ɓǝ̀ duk mǝɓoarne.

¹⁴Anggo ka, à pà nǝ̀ tsǝk kiria ɗǝm arǝ anjarnzǝne mala amǝ Yahudi andǝ anzongcau mala aɓwana mǝnana à ɓinǝ mǝsǝcau ka ɗang.

¹⁵Aban aɓwana mǝnana bumia pwatpwat ka, ko man ngga mǝ pwatpwati na. Sǝ aban ɓwana mǝnana amǝ bumpǝndǝkia na sǝ amǝ ɓinǝ ak cau na ka, kǝgir pà kàm mǝɓoarne na ɗang. Yale ɗenyicau malea andǝ ɓabumia ka à pǝndǝkina.

¹⁶Amǝnia yia aɓwana ka, à kǝ bang nǝ mburkunia ama à surǝ Ɓakuli, sǝ pakkiagir malea ka lǝmndǝ ama à surǝ Ɓakuli ɗang. Aɓwana na à nǝ̀ ɓinǝia, amǝ ɗwanyi okiru na, à kārǝa à nǝ̀ pak kǝgir mǝɓoarne ɗang.