Read mbula bwazza Titus 2 Bible Online

Titus 2 - mbula bwazza bible

Titus 2

¹Sǝ we, Titus ka, dumǝna púp a nǝ kànì gir mǝnana nda a tarǝia andǝ kanigir mǝɓoarne mala dokpata Ɓakuli ka.

²Kania aburana mǝnana à gulna ka do-bwalɓamuru, ɓǝa dum nǝ ɓealǝu mǝnana nǝ̀ tsǝa aɓwana kat nǝ̀ pea wia gulo ka. Kania wia ɓǝa duk aɓwana mǝnana à ndanǝ ɓabum ɓaɗenyicau ka, ɓǝa bwal kàngkàng arǝ paɓamuru mǝnana pà nǝ̀ kpa raka, andǝ earcearǝu, andǝ do munyi aɓa mǝkwane.

³Anggo gbal, kanî amamǝna mǝnana à gulna ka ɓǝa duk nǝ aɓealǝu mǝnana nǝ̀ pè Ɓakuli gulo ama à ndaka male ka. Ɓǝa kǝa duk amǝ naki acau mala kìdìki lullǝ aɓwana ɗang, sǝ ɓǝa kǝa duk aguro mala mba ɗang. Ɓǝa kǝ kani aɓwana gir mǝnana nda pepe ka.

⁴Aɓa mǝno anggo ka sǝ à nǝ̀ kwarkir alongna mamǝna ɓǝa dum nǝ earcearǝu aban aburria andǝ amunia.

⁵Kania wia ɓǝa dum nǝ bwalrǝu aɓa do andǝ nacau malea, ɓǝa kǝ gya aɓa ɓoarnsari, ɓǝa duk amǝ bwal ɓala, andǝ amǝ turo-ɓoarna, andǝ amǝ oki aburria. Anggo ka, kǝɓwa pà nǝ̀ ɓǝsǝki cau mala Ɓakuli ɗang.

⁶Anggo gbal, ɓakɓabum alaggana ɓǝa dum nǝ bwalrǝu aɓa koya gir.

⁷Aɓalǝ agir kat ka, we nǝ nggearǝo ka pak gir mǝɓoarne mǝnana yia ka à nǝ̀ sǝna a rǝo ka. Aɓa kanigir mo ka, lǝmndǝ mǝsǝcau andǝ pe nǝ ɓabumo kat.

⁸Acau mǝnana à kǝ pur a kuno aɓa kanigir ka, ɓǝa duk mǝsǝcau, ɓwarkio pa a rǝì ɗang, ace mǝnana kǝ ɓwa ɓǝ̀ kǝa kum mǝɓane arǝ kanigir mo ɗang. Anggo sǝ aɓwana mǝnana à kǝ ɓinǝmuro ka, à nǝ̀ kum kǝsǝkya, acemǝnana à pà nǝ̀ kum kǝ cau mǝɓane mǝnana à nǝ̀ bangŋa amur sǝm ngga ɗang.

⁹Aɓwana mǝnana aguro na ka, kania wia ɓǝa kǝ okia amǝtala-ɓala malea amur agir kat. Ɓǝa kǝa na ama à nǝ̀ nggǝa pǝlǝcau a kunia,

¹⁰ko à nǝ̀ nggǝ iki agir a rǝia ɗang. Yia ka dumǝna púp à nǝ̀ dum nǝ ɓealɓoarna, mǝnana nǝ̀ tsǝa à nǝ̀ earnǝia ka. Anggo sǝ aɓwana kat nǝ̀ lǝmndǝ pagulo arǝ kanigir amur Ɓakuli Mǝ'amsǝ sǝm.

¹¹Ɓakuli ka, lǝmndǝna ɓwamuru male aban ɓwapǝndǝa kat, ace mǝnana nǝ̀ amsǝia ka.

¹²Mǝno yì ɓwamuru ka, kǝ kania sǝm ɓǝ̀ sǝm nying do ɗwanyi kpata Ɓakuli andǝ gyata agir mala ɓanza, ɓǝ̀ sǝm dum nǝ bwalrǝu, andǝ do-ɓealɓoarna, andǝ do pwasǝbum Ɓakuli, aɓa mǝnia yì ɓanza ka.

¹³Ɓǝ̀ do ma'sǝm pǎ anggo a pa mǝnana sǝm nda rǝ kundǝ mǝno yì tsǝkɓalǝu mana nǝ̀ yia lumsǝ sǝm nǝ bumpwasǝa ka, yì tsǝkɓalǝu arǝ yiu mala Ɓakuli ma'sǝm mǝgule, Yesu Kǝrǝsti Mǝ'amsǝban, aɓa tǎ mala ɓoarɓwa male.

¹⁴Yì nda ɓwa mǝnana yi pa yilǝmi ace amsǝ sǝm aɓa ko ya ulang cauɓikea le ka, sǝ ɓǝ̀ lak sǝm, ace mǝnana ɓǝ̀ tsǝk sǝm ɓǝ̀ sǝm pǝlǝa àkǝ̀ male, aɓwana mǝnana à ndanǝ rǝɓǝla ace pakki aturo mǝɓoarne ka.[3]

¹⁵Amǝnia ka, à ndaka gir mǝnana a nǝ kànì aɓwana ka. Ɓak ɓabumia ɓǝa kpatea. A ndanǝ rǝcandǝa mala kwarkir aɓwana, kǝa eare ɓǝ̀ kǝɓwa ɓǝsǝkio ɗang.