Read mbula bwazza Amǝ Ibǝru 4 Bible Online

Amǝ Ibǝru 4 - mbula bwazza bible

Amǝ Ibǝru 4

¹Sǝ acemǝnana pàcau mala kutio aɓa usǝlǝo mala Ɓakuli na kam piu ka, ɓǝ̀ sǝm parkir sǝm, ɓǝ̀ kǝa do ama à nǝ̀ kum kǝɓwa ata wun mǝnana nǝ̀ ɗwanyi kutio ka ɗang.

²Sǝm ongŋǝna Cau Amsǝban mana à hamnǝi, kǝla mǝnana yia à oe ka. Sǝ cau mǝnana à ok ka, ko pusǝia a gung ɗang, acemǝnana à dapì andǝ paɓamuru ɗang.[16]

³Sǝ sǝm mǝnana sǝm pà ɓamur sǝm ngga, sǝm nda sǝm nǝ̀ kutio aɓa usǝlǝo mǝno ka. Sǝ malea yì aɓwana mǝnana à pà ɓamuria raka, Ɓakuli na ama, “Pǝlǝa ǝn kánna aɓa bumlulla mem, ‘À pà nǝ̀ kutio aɓa usǝlǝo mem ɗang.’ ”[17] Bang mǝnia ka, kat andǝ amani ama malǝna aturo male ɗiɗyal a shareta ɓanza ka.

⁴À gilǝa a ɓe kǝ ban aɓa Malǝmce amur tongno-nong-ɓaria nongŋo ama: “À tongno-nong-ɓaria nongŋo ka, Ɓakuli usǝlǝo arǝ aturo male kat.”[18]

⁵Amur kǝ cau mǝnia ka, Malǝmce nyare bang ama, “À pà nǝ̀ kutio aɓa usǝlǝo mem ɗang.”[19]

⁶Njar nakam piu mǝnana aɓea ɓwana nǝ̀ kum kutio aɓa mǝno yì usǝlǝo ka, sǝ aɓwana mǝnana à ok Cau Amsǝban mǝnana à hamnǝi a nggea dǝmbe ka, à kutio ɗang ace mgbikiru malea.

⁷Ace mani ka, Ɓakuli nyare tsǝk ɓe kǝ pwari mala kutio aɓa usǝlǝo male, sǝ mǝno yì pwari ka, nda tunǝi ama “Yalung ngga.” Ɓakuli na mǝnia yì cau ka, nǝ kun Dauda ɗiɗyal ama, “Ɓǝ̀ yalung sǝ wu ok gi ka, wu kǝa na ama wu nǝ̀ tǝ́r ɓabum wun ɗang.”[20]

⁸Ɓǝa bangŋa ama Jesǝwa pania wia mǝnia yì usǝlǝo ka, Ɓakuli pa nǝ̀ nyare nǝ̀ na ce ɓe kǝ pwari usǝlǝo ɗǝm mǝnana nǝ̀ yiu ka ɗang.

⁹Ace mani ka, usǝlǝo na kam piu ace aɓwana mala Ɓakuli, kǝla usǝlǝo mala Ɓakuli a tongno-nong-ɓaria nongŋo.

¹⁰Acemǝnana ɓwa mǝnana kat kutina aɓa usǝlǝo mala Ɓakuli ka, usǝlǝni aturo male, kǝla mana Ɓakuli ka, usǝlǝ arǝ male yì aturo ka.

¹¹Ace mani ka, ɓǝ̀ sǝm ɓariki, ɓǝ̀ sǝm kutio a mǝno yì usǝlǝo ka. Sǝ ɓǝ̀ sǝm mgbiki Ɓakuli kiru, kǝla mǝnana amǝ Isǝrayila pak ka, pa sǝm nǝ̀ kuti kam ɗang.

¹²Cau mala Ɓakuli ka, ndanǝ yilǝmu, sǝ ndanǝ rǝcandǝa. Cyauwe kuti koya ulang ya nggeabyau mǝnana kuni ɓari ka. Kǝ soaban, kǝ kutia ban gakya mala bangŋe ɓwa andǝ yilǝmi. Kǝ kutio aban kpakǝri mala mú andǝ girɓamu. Kǝ pusǝta mana nda mǝɓoarne andǝ mǝɓane arǝ ɗenyicau andǝ kani mala ɓabum ɓwa.

¹³Kǝgir pà kàm ata agir mǝnana à pusǝia ka, mǝnana nǝ̀ sǝmbǝrǝi Ɓakuli ka ɗang. Koya gir ka, nda gbǝrangtang sǝ nong kwas a ɓadǝmbǝi. Sǝ yì nda kǝ ɓwa mǝnana sǝm nǝ̀ ngga bǝlki aturo ma'sǝm a ɓadǝmbǝi ka.

¹⁴Sǝ acemǝnana sǝm ndanǝ nggea Pǝris Mǝgule mǝnana warina a kuli, yì Yesu Muna mala Ɓakuli ka, ɓǝ̀ sǝm bwal paɓamuru ma'sǝm kàngkàng, kǝla mǝnana sǝm ne nǝ kun sǝm ngga.

¹⁵Mǝnia yì Pǝris Mǝgule sǝm ndanǝi ka, sǝlǝna nǝ́ arǝwukia ma'sǝm, acemǝnana yì nǝ nggearǝì ka, kutina aɓalǝ àkǝ̀ mǝnia yì akárǝkiban mǝnana à kǝ kum sǝm ngga, a koya njari, kat andǝ amani ka, ko pak cauɓikea ɗang.

¹⁶Ace mani ka, ɓǝ̀ sǝm sungŋo, nǝ mǝsǝkang-kangŋa, aban bunomurǝm mala Ɓakuli mǝ'ɓwamuru. Abanì sǝ sǝm nǝ̀ kum sǝn-mǝsǝswatǝr, andǝ ɓwamuru mǝnana nǝ̀ bwala sǝm nggam, a pwari mǝnana kat sǝm nda aɓa tǝle ka.