Read mbula bwazza Amǝ Ibǝru 6 Bible Online

Amǝ Ibǝru 6 - mbula bwazza bible

Amǝ Ibǝru 6

¹Ace mani ka, ɓǝ̀ sǝm ɗeki akanigir mala tita eaulǝki acau amur Kǝrǝsti. Ɓǝ̀ sǝm tùr a dǝmbǝa, ɓǝ̀ sǝm lumsǝ aɓa bwaltagir. Ɓǝ̀ sǝm ngga nyar ɗǝm aban kwakita kusǝɓǎ amur pwanzali andǝ vwaki bu arǝ aturo mǝnana à nǝ̀ kánǝban a lú, andǝ paɓamuru aban Ɓakuli ɗang.

²Sǝ ɓǝ̀ sǝm ngga camarǝ ɓǝsǝlǝki kanigir amur batisǝma, andǝ tsǝkbu amur aɓwana, andǝ lo mala alú, andǝ amur kasǝ ɓashi mǝnana masǝlǝate pà kàm raka ɗang.

³Ɓoaro sǝm nǝ̀ tùr a dǝmbǝa! Sǝ mǝnia ka nda gir mǝnana sǝm nǝ̀ pa, ɓǝ̀ Ɓakuli ear ka.

⁴Aɓwana mǝnana à purî ɓa paɓamuru malea arǝ Kǝrǝsti ka, à pà nǝ̀ gandǝ nyesǝia ɗǝm ɓǝa pwanzali ɗang. Lang sǝ mani ka nǝ̀ pa anzǝm mana à kumǝna tǎlaban a ɓabumia, à ongŋǝna ɓoro mana yiu nǝ kuli, mana Ɓakuli kǝ pea aɓwana male, sǝ à kumǝna kāmbe malea mala Bangŋo Mǝfele, sǝ à nyare à yì pǝlǝ nǝ nzǝmia ka?

⁵Ɗǝm ngga anzǝm mana à ongŋǝna ɓoro mala cau mala Ɓakuli andǝ arǝcandǝa mala nza mǝnana kǝ yiu ka,

⁶sǝ ɓǝà yi nyare à purî njar mala paɓamuru malea aɓa Kǝrǝsti ka, à nda rǝ ɓǝsǝlǝ gballì Muna mala Ɓakuli amur nggun-gangndi. Nyar ɗǝm ngga à nda rǝ pe wi kǝsǝkya a ɓamǝsǝ ɓwapǝndǝa.

⁷Nzali mǝnana kǝ nu murmbulo mana kǝ nya amuri tutu, sǝ kǝ pusǝ agir-soro, ace pà girlina mala aɓwana mǝnana à kǝ rǝì ka, nǝ̀ kum tsǝkbu mala Ɓakuli amuri.

⁸Sǝ nzali mǝnana kǝ pusǝ azwe andǝ bondo mǝɓike ka, ɓe kǝ ɓoaro pa a rǝì ɗang. Gbashina ban suban, a masǝlǝate ka, à nǝ̀ pìsǝì.

⁹Wun amǝ'eamrǝarǝu mǝnana ǝn earkiyi cea ka, ko kat andǝ amani ama sǝm bangŋa ana ka, sǝm ndanǝ mǝsǝkang-kangŋa ama, wu ndanǝ agir mǝɓoarne mǝnana à kǝ yiu a tarǝia andǝ amsǝban ngga.

¹⁰Ɓakuli ka mǝ'ɗwanyi mǝsǝcau na ɗang; ɓālǝi pà nǝ̀ lorǝ aturo ma'wun andǝ earcearǝu mǝnana wu lǝmndǝi ace, nǝ ɗenyi mǝnana wu ɗenyi nǝ aɓwana male, sǝ wu ndarǝ lidǝmbǝa nǝi ka ɗang.

¹¹Sǝm nggǝ earce ama koyan ata wun ngga, ɓǝ̀ lǝmndǝ ulang mǝno yì rǝɓǝla arǝ turo mǝɓoarne ka, ba masǝlǝate, ace mǝnana tsǝkɓalǝu ma'wun ngga, ɓǝ̀ kum lumsǝo.

¹²Sǝm earce ama ɓǝ̀ wu duk amǝnkundǝr ɗang. Sǝm ama, wu sǝn arǝ aɓwana mǝnana ace paɓamuru andǝ munyi malea ka, à yì kum gir mǝnana Ɓakuli na ce nǝ̀ pà ka.

¹³Ɓakuli nǝ̀ pàcau male aban Ibǝrayim ngga, kan nǝ ɓamuri, acemǝnana kǝɓwa pà kàm gulo kuti, mǝnana nǝ̀ kan nǝi ka ɗang.

¹⁴Kan ama, “Ɓafo, mǝ nǝ tsǝko bu, sǝ mǝ nǝ tsǝk amǝkeo ɓǝa lakki pas.”[23]

¹⁵Sǝ acemǝnana Ibǝrayim pak munyi, kundǝ ka, yi kum gir mǝnana Ɓakuli ne wi ama nǝ̀ pe wi ka.

¹⁶Aɓwana kǝ kan nǝ́ aɓwana mǝnana à kutia nǝ́ gulo ka, sǝ kángir ka, nda lǝmndǝ ama gir ka mǝsǝcau na, sǝ nda mǝnana nǝ̀ tamsǝ koya makgir ka.

¹⁷Ɓakuli pa cau nǝ kana, acemǝnana kǝ earce ama aɓwana mǝnana à nǝ̀ kum gir mǝnana pàcau ace ka, ɓǝa dum nǝ sǝlǝe ama, yì ka, pà nǝ̀ nggaɗi ɗenyicau male arǝ kane male ɗang.

¹⁸Ɓakuli pana pàcau andǝ kángir male yia kǝm. Amǝnia yì agir ɓari ka, à kǝ gandǝ nggaɗia ɗang, acemǝnana Ɓakuli ka, pà nǝ̀ gandǝ na nyir ɗang. Ace mani ka, sǝm mana sǝm ɓangŋǝna aban ká alta auwa abani ka, sǝm kumǝna ɓakɓabum mǝgule ace bwal kàngkàng arǝ tsǝkɓalǝu mǝnana à tsǝka sǝmi a dǝm sǝm ngga.

¹⁹Mǝnia yì tsǝkɓalǝu sǝm ndanǝi ka, nda rǝcandǝa mǝnana bwal yilǝmi sǝm kàngkàng, dǝurǝo pa kàm raka. Yì tsǝkɓalǝu ka, nda mǝnana nǝ̀ ká nǝ sǝm anzǝm lagir aɓa Ban Nggea Mǝfele ka.

²⁰Yesu angŋa dǝmbǝa warina kam ace sǝm. Dumǝna Pǝris Mǝgule mǝnana dobuno-pǝris male pà nǝ̀ mal raka, kǝla mala Melkizedek.