Read mbula bwazza Jemis 1 Bible Online

Jemis 1 - mbula bwazza bible

Jemis 1

¹Mim Jemis, guro mala Ɓakuli andǝ mala Mǝtalabangŋo Yesu Kǝrǝsti, mǝ nda ban terǝ cau aban ká aban amǝkpata Kǝrǝsti mǝnana aɓalǝ atau lum-nong-ɓari mala amǝ Isǝrayila, mǝnana à mesǝkea arǝ anzali aɓa ɓanza ka. Ən nggǝ makka wun kun![1]

²Wun amǝ'eambǝam, ɓǝ̀ wu kutio aɓalǝ akárǝkiban ɗàngɗáng ngga, ɓǝ̀ ban ɓoara wun kǝrkǝr,

³acemǝnana ɓǝ̀ wu cam kàngkàng aɓa karǝkiban ngga, paɓamuru ma'wun nǝ̀ lidǝmbǝa nǝ rǝcandǝa.

⁴Wu lidǝmbǝa nǝ came kàngkàng, wu kǝa kpa ɗang, acemǝnana ɓǝ̀ ɓeal wun pa kǝla mǝnana Ɓakuli kǝ earce kat ka, wu kǝa gatti ɗang.

⁵Ɓǝ̀ kǝɓwa aɓalǝ wun ɗwanyi sǝlǝe ace pak mǝɓoarne ka, ɓǝ̀ zǝmbǝa aban Ɓakuli mǝnana kǝ pa nǝ ɓabumi kat nggwani pà kàm raka. Sǝ à nǝ̀ pe wi.

⁶Ɓǝ̀ zǝmbǝi wi nǝ ɓabumi mwashat, ɓǝ̀ kǝa pak nǝ ɓukibum ɗang, acemǝnana ɓwa mana ɓabumi kǝ ɗǝnggǝli ka nda kǝla gung nggeamur mǝnana kǝ came aban mǝ'mwashati raka.

⁷Ulang mǝnia yì ɓwa ka ɓǝ̀ kǝa tsǝk ɓālǝi ama nǝ̀ ak kǝgir a bu Mǝtalabangŋo Ɓakuli ɗang;

⁸yì ka, ɓwa na, ɗenyicau male gakia, kǝ tamsǝ kusǝì amur kǝgir mwashat ɗang.

⁹Mǝ'eamrǝarǝu mǝnana mǝtǝr na ka ɓǝ̀ pak banɓoarnado acemǝnana Ɓakuli kǝ twali nǝ gulo kǝrkǝr.

¹⁰Sǝ mǝ'eamrǝarǝu mǝnana mǝkume na ka ɓǝ̀ jali aɓa kyamsǝɓamuri, acemǝnana yì ka, nǝ̀ ime nǝ̀ sukkio kǝla pwasǝo bondo.[2]

¹¹Ɓǝ̀ pwari ta ka, kǝ pisǝ abondo sǝ pwasǝia kǝ sukkio, ɓoarjam malea kǝ kiɗìkì. Anggo gbal, mǝkume nǝ̀ ueɓà andǝ aturo male.

¹²Ɓakuli nǝ̀ tsǝkbu amur aɓwana mǝnana à dum nǝ mǝsǝcau abani aɓa karǝkiban mana yiu amur paɓamuru malea ka. Acemǝnana ɓǝa camǝna kàngkàng ngga, a masǝlǝate ka à nǝ̀ kum tangnakusǝu mala yilǝmu mǝnana Ɓakuli pacau ama nǝ̀ pea aɓwana mǝnana à lǝmndǝi wi earcearǝu ka.

¹³Ɓǝ̀ karǝkiban yipi ɓwa ka ɓǝ̀ kǝa na ama, Ɓakuli na kǝ karǝki ka ɗang. Acemǝnana Ɓakuli ka à pà nǝ̀ karǝki nǝ ɓealɓikea ɗang, sǝ yì ka, kǝ karǝki kǝɓwa gbal ɗang.[3]

¹⁴Sǝa ma koyan ngga kǝ kutio a karǝkiban yi mǝnana ɓǝ̀ suno male swarǝni, ɓosǝna kusǝì ka.

¹⁵Sǝ ɓǝ̀ suno gongŋǝna ka kǝ ɓǝl aturo mala cauɓikea, sǝ ɓǝ̀ cauɓikea gulna ka nǝ̀ ɓǝl lú.

¹⁶Wun amǝ'eamrǝarǝu mǝnana ǝn earkiyi acea raka, ɓǝ̀ ɓwa ɓǝ̀ kǝa swarki wun ɗang.

¹⁷Koya ɓoro mǝɓoarne, mǝɓafoe ka, sulǝ nǝ kuli, nǝban Ɓakuli Tarrû mǝnana pak atalaban[4] ngga, mǝnana ɓǝ̀ pǝlǝa aya bui ka kǝ nggaɗi ɗang sǝ kǝ tur pǝndǝa raka[5].

¹⁸Aɓa kane male sǝ yi ɓǝl sǝm nǝ cau mǝ'mǝsǝcau nì; tàr sǝm ata dǝmbe aɓalǝ aɓwana mǝnana pusǝia kat ka.[6]

¹⁹Wun amǝ'eambǝam aɓa earcearǝu, wu parkir wun arǝ mǝnia ka: koyan ngga ɓǝ̀ kaurǝa ta okcau, ɓǝ̀ dǝndi arǝ nacau, sǝ ɓǝ̀ dǝndi arǝ pak bumlulla.

²⁰Acemǝnana ɓǝ̀ bumo lul ka a pà nǝ gandǝ pak gir mǝɓoarne mǝnana Ɓakuli earce ɓǝa pe ka ɗang.

²¹Ace mani ka wu bwaki bu wun arǝ anggaman aɓealɓikea kat sǝ wu ak cau mala Ɓakuli mǝnana à pandǝa a ɓabum wun, mǝnana nǝ̀ amsǝ wun ngga, nǝ nyesǝmuru.

²²Wu duk aɓwana mǝnana à kǝ ok cau sǝ à kǝ ci aɓa turo ka, wu kǝa duk amǝ oe nǝ kiru nǝmurǝì ɗang. Mǝno ka wu nda ban swarki ɓamur rǝ wun. Wu pak gir mǝnana ceì bang ngga.

²³Ɓwa mǝnana kǝ ok cau mala Ɓakuli sǝ kǝ ci aɓa turo raka, nda kǝla ɓwa mǝnana kǝ sǝn ɓamǝsǝi a tapwari ka,

²⁴anzǝm mǝnana sǝnǝna ɓamǝsǝi sǝ kutina umna ka, kara ɓālǝi lorǝna ko lang sǝ ɓamǝsǝi pa.

²⁵Sǝ ɓwa mǝnana kǝ tsǝkiri pepe arǝ bǝlki ɓalǝ anggurcau mǝɓafoe mala Ɓakuli mǝnana kǝ panzǝban ngga, sǝ ɓǝ̀ lidǝmbǝa, ɓālǝi lorǝ cau mǝnana ok raka, Ɓakuli nǝ̀ tsǝki wi bu aɓa gir mǝnana pakkiyi ka.

²⁶Ɓǝ̀ kǝɓwa kǝ ne ɓamuri ama yì ka, mǝkpata Ɓakuli na, sǝ bwal kuni raka, ɓwarkina aɓa ɗenyicau male. Kpata Ɓakuli male ka mǝɓane na.

²⁷Kwaɗi mǝɓoarnsari, mǝɓafoe mǝnana Ɓakuli Tár sǝm earkiyice ka, nda tsǝkir akawa andǝ aman-lú aɓalǝ atanni malea, andǝ ɓanggi pǝndǝkiban mala ɓanza.