Read mbula bwazza Jemis 2 Bible Online

Jemis 2 - mbula bwazza bible

Jemis 2

¹Wun amǝ'eambǝam mǝnana wu pana ɓamur wun aban Mǝtalabangŋo Yesu Kǝrǝsti, mana lumsǝ nǝ tǎlaban ngga, wu nying lǝmndǝ tàrban.

²Ɓǝa twali ama ɓeɓwa kuti aban kpapi ma'wun, sǝ ɓwe ka oasǝ girmunabu zǝnariya andǝ agir-nggurǝu mǝɓoarne a rǝì. Sǝ ɓeɓwa man ngga kutio nǝ asanggina gir mǝpǝndǝke a rǝì.

³Wu nǝ̀ tsǝkir ɓwa mǝnana oasǝ agir-nggurǝu mǝɓoarne ka, wu nǝ̀ pe wi ban-do mǝɓoarne, sǝ mala mǝtǝr ka wu ne wi ama, “Came akana” ko ana raka, “Duk kani a nzali” ka le?

⁴Ɓǝ̀ wu pa anggo ka, wu lǝmndǝ ma tàrban aɓalǝ wun re? Sǝ ɗǝm ngga ɓǝ̀ wu pa anggo ka, wu pa aban lǝmndǝ ama wu nda ban ɓashi arǝ wun nǝ ɓabum mǝɓike re?

⁵Wu kwaki kir wun, wun amǝ'eamrǝarǝu mǝnana ǝn earkiyi acea raka, Ɓakuli twal aɓwana mǝnana amǝɓanza nyesǝia amǝtǝr na ka, ɓǝa duk amǝkume aɓa paɓamuru abani. Sǝ ɗǝm ngga ɓǝa kum domurǝm mǝnana Ɓakuli pàcau ama nǝ̀ pe aɓwana mǝnana à kǝ earce ka.

⁶Sǝ wun ngga wu twal amǝtǝr a kun kǝgir ɗang. Nggearǝì ka amǝkume na mǝnana à pakiyia wun tanni, à nunggiyi wun aban ká a ndaɓashi ka re?

⁷À ndaka kǝ aɓwana mǝnana à kǝ na mǝɓane amur lullǝu mǝɓoarne mala Yesu Kǝrǝsti mǝnana à tunǝkina wun nǝi ka re?

⁸Ɓǝ̀ ɓafo na wu bwalǝna mǝnia yì nggurcau mala murǝm Ɓakuli, mǝnana à gilǝì aɓa Malǝmce ka, ama “Wu earce ɓio-mǝ'njarmurkala kǝla mǝnana a earce ɓamuro ka,” wu nǝ̀ nggǝ pak mǝɓoarne.[7]

⁹Sǝa ma ɓǝ̀ wu kǝ lǝmndǝ tàrban ngga, wu nda re pak cauɓikea, sǝ wu yalni nggurcau mǝno.

¹⁰Acemǝnana ɓwa mana bwal anggurcau mala Ɓakuli kat, sǝ yàllî mwashat ka, yalni anggurcau kat.

¹¹Ɓakuli mǝnana na ama, ɓǝa kǝa nongginǝ-rǝarǝu raka, kǝ nda na ama ɓǝa kǝa wal-lú raka. Ko ɓǝ̀ a nda mǝ'nongginǝ-rǝarǝu raka, sǝ a kǝ wal-lú ka, a dumǝna mǝyàli nggurcau.[8]

¹²Ace mani ka, ɓǝ̀ mana kat wu nǝ̀ na, ko wu nǝ̀ pak ka, wu ɗenyi ama à nǝ̀ pakka wun ɓashi nǝ nggurcau mǝnana kǝ panzǝ sǝm ngga.

¹³Ɓǝ̀ yiua pak ɓashi ka, à pà nǝ̀ sǝn mǝsǝswatǝr mala aɓwana mǝnana à kǝ lǝmndǝ mǝsǝswatǝr aban acilia aɓwana raka ɗang; sǝ ɓwa mǝnana kǝ lǝmndǝ mǝsǝswatǝr ka Ɓakuli nǝ̀ lǝmndǝì wi mǝsǝswatǝr a pwari ɓashi!

¹⁴Mana nda ɓoaro male, wun amǝ'eamrǝarǝu, mǝnana ɓǝ̀ ɓwa na ama pana ɓamuru aban Yesu, sǝ lǝmndǝi aɓa pakki aturo male raka? Mǝno yì paɓamuru ka nǝ̀ amsǝi le?

¹⁵Ɓǝ̀ do ama ɓe mǝ'eamrǝarǝu ɓwabura ko ɓwama na aɓalǝ wun, sǝ pànǝ agir-nggurǝu ko girlina ɗang.

¹⁶Ɓǝ̀ ɓeɓwa ata wun ne wi ama, “Kyan jam, ɓǝ̀ Ɓakuli tsǝko bu, wu kum girkuroarǝu sǝ wu ɗǝmbǝo,” sǝ pe wi gir mǝnana ɓoaro ɓǝ̀ pangŋǝni ace nggūrǝi raka, mana nda ɓoaro male?

¹⁷Anggo gbal, ɓǝ̀ paɓamuru pa a tarǝia andǝ turo raka, nda ɓà.

¹⁸Sǝa ma ɓǝ̀ ɓwa nǝ̀ na ama, “A ndanǝ paɓamuru sǝ mǝ ndanǝ aturo.” Lǝmndǝam paɓamuru mo mǝnana pànǝ aturo ate raka, sǝ mǝ nǝ lǝmndǝo paɓamuru mem aban Ɓakuli nǝ aturo mǝɓoarne mem.

¹⁹A ear ama Ɓakuli na mwashat; a pangŋa pepe. Sǝ ko nggearǝ akukwar gbal ka à earǝna nǝ mǝnia, sǝ rǝia kǝ ɓǝla ace ɓangciu.

²⁰We gǝm ɓwa, a kǝ earce ɓǝa lǝmndǝo ama paɓamuru mǝnana aturo mǝɓoarne pa ate raka mǝɓane na le?

²¹Kà-sǝm Ibǝrayim ngga, pa ace turo mǝnana pa, mǝnana yi pa ɓoro nǝ muni Ishaku amur gyangŋan ngga, sǝ Ɓakuli twali mǝ'cauɓoarna na ka re?[9]

²²Wu sǝni ka, paɓamuru male andǝ aturo male ka à kǝ gya a tarǝia. Nǝ aturo sǝ paɓamuru male lumsǝo.

²³Sǝ cau mǝnana Malǝmce bangŋi ama, “Ibǝrayim earnǝ cau mala Ɓakuli, sǝ Ɓakuli lǝmndǝí mǝ'cauɓoarna na” ka, yi duk mǝsǝcau, nda sǝ à tunǝi ama gyajam mala Ɓakuli ka.[10]

²⁴Wu sǝni, Ɓakuli kǝ twal ɓwa mǝ'cauɓoarna na ace aturo male, pa ace paɓamuru nǝmurǝì ɗang.

²⁵Anggo gbal sǝ Rahap man-gung ka, Ɓakuli e mǝ'cauɓoarna na ace aturo, acemǝnana ak Amǝ Isǝrayila mana à turia ace shenzǝ nzali ka a ɓala male, sǝ kya pusǝia nǝ ɓe njar ɗang sǝ a au ka.[11]

²⁶Kǝla mǝnana dǝɓang'rǝu mǝnana yilǝmu pa a ɓalǝi raka lú na ka, anggo gbal paɓamuru mǝnana kǝ lǝmndǝ rǝì aɓa turo raka lune na.