Read mbula bwazza Jemis 3 Bible Online

Jemis 3 - mbula bwazza bible

Jemis 3

¹Wun amǝ'eamrǝarǝu, bangula wun ɓǝa kǝa duk amǝkanigir aban kpapi mala amǝkwaɗi ɗang, kǝla mǝnana wu sǝlǝna ka, sǝm amǝkani cau mala Ɓakuli ka, ɓashi ma'sǝm aban Ɓakuli ka nǝ̀ cande nǝ̀ yalî mala acili aɓwana.

²Acemǝnana sǝm kat ka sǝm nggǝ ɓwarkio arǝ anjar pas. Ɓǝ̀ ɓwa kǝ ɓwarki aɓalǝ acau male raka, man yì ɓwa ka lumsǝna ɓwa, mǝnana nǝ̀ gandǝi nǝ̀ bwal ɓamuri a koya njar kat ka.

³Sǝm nggǝ oasǝi apǝr nggwiandan a kunia ace mǝnana ɓǝ̀ sǝm cia ɓǝa oka sǝm, sǝ sǝm nggǝ pǝlǝ muria aban mǝnana kat sǝm earce ɓǝa pǝlǝ kam ngga.

⁴Sǝni, kat andǝ gulo mala waru-bǝsa mǝnana nggea-gung mǝcande na kǝ ging nǝi ka, mǝgara samsǝa na à kǝ pūrǝí nǝi aban o aban mǝnana mǝtawaru earce nǝ̀ ká nǝi kam ngga.

⁵Anggo gbal, lasǝu ka gir mǝkyauwe na aɓa nggūrǝu, sǝ kǝ gandǝ jali amur agir mǝgulke. Wu sǝni, mǝlasǝ bǝsa bǝti kǝ pisǝ nggea nda'nggun dalǝm.

⁶Nggearǝ lasǝ ɓwapǝndǝa gbal ka lasǝ bǝsa na, ɓanza mala ɓealɓikea na aɓa nggurǝ sǝm, nyar ɗǝm ngga kǝ kiɗiki ɓwa kǝring. Lasǝu ɗǝm ngga kǝ kiɗiki ɓwa aɓa do male kat, sǝ yì ka, bǝsa ɓa tuli-lú na kǝ earki nǝi ka.

⁷Ɓwapǝndǝa nǝ̀ gandǝ bwalmúr agirkusǝu kat; anyal, agir mǝnana à kǝ pūrǝ nǝ bumia a nzali, andǝ agir mǝnana nǝ yilǝmu aɓa nggeamur ka. Ɓwapǝndǝa kǝ gandǝ ɓunggia sǝ nǝ̀ tsǝia ɓǝa oki wi.

⁸Sǝ kǝɓwa pà kàm nǝ̀ gandǝ bwalmúr lasǝu ɗang. Ndanǝ songnǝo sǝ lumsǝ nǝ ɓealɓikea andǝ barya mǝnana nǝ̀ wal-lú ka.

⁹Nǝ́ lasǝ sǝm sǝ sǝm nggǝ ɓwangsǝ Mǝtalabangŋo mǝnana nda Tar sǝm ngga. Sǝ nǝ́ kǝ lasǝuî sǝ sǝm nggǝ su aɓwana mǝnana Ɓakuli pea aɓa nggūrǝi ka.

¹⁰Nǝ́ kun sǝ sǝm nggǝ ɓwangsǝban, sǝ nǝ́ kun sǝ sǝm nggǝ suban. Wun amǝ'eambǝam, ɓoaro ɓǝ̀ pa anggo ɗang!

¹¹Mǝsǝcau ka, mur mǝɓoarne andǝ mur mǝ'nkaunkauni kǝ pur a mǝsǝmur mǝ'mwashati ɗang.

¹²Wun amǝ'eambǝam, nggun vwari pa nǝ̀ pusǝ ɓǝla mpandimuru ɗang, sǝ nggun ɓau pa nǝ̀ pusǝ vwari ɗang. Mǝsǝmur mǝnana nda nkaunkaun ngga pa nǝ̀ pà mur mǝɓoarne ɗang.

¹³Ɓǝ̀ wu ndanǝ sǝlǝe sǝ wu surǝna rǝ anjargula mala Ɓakuli ka, wu lǝmndǝi aɓa do mǝɓoarne, wu kǝ pak aturo mǝɓoarne nǝ nyesǝɓamuru mǝnana kǝ pur aɓa sǝlǝe ka.

¹⁴Sǝ ɓǝ̀ wu lumsǝ nǝ mɓali, andǝ ɓinǝmuru, andǝ earce ɓamuru a ɓabum wun ngga, wu ɗeki nggori, wu kǝa gìr mǝsǝcau nǝ nyir ɗang.

¹⁵Acemǝnana mɓali andǝ earce ɓamuru ka à pa aɓa sǝlǝe mǝnana mala Ɓakuli na ka ɗang. Amǝno yì agir ka à mala ɓanza na, mala Bangŋo mala Ɓakuli na ɗang; mala mgbǝrǝm na.

¹⁶Ban mǝnana kat mɓali andǝ earce ɓamuru na kam ngga, abanì sǝ a wu nǝ̀ kum zurǝki andǝ koya ɓealɓikea.

¹⁷Sǝ sǝlǝe mǝnana pur nǝ kuli ka mǝɓoarnsari na, sǝ ndanǝ earce dotarǝu, nda ɓukɓuk aɓa pa male, kǝ ɗenyi nǝ aɓwana, lumsǝ nǝ mǝsǝswatǝr andǝ aturo mǝɓoarne, kǝ lǝmndǝ tàrban ɗang sǝ kǝ pak gir aɓa mǝsǝcau.

¹⁸Aɓwana mǝnana amǝ yinǝ dotarǝu na aɓa rǝpwala ka, aturo malea nǝ̀ tsǝk aɓwana ɓǝa kǝ pak agir mǝɓoarne mǝnana Ɓakuli earkiyicea ka.