Read mbula bwazza Jemis 4 Bible Online

Jemis 4 - mbula bwazza bible

Jemis 4

¹Mana gir nì na yiki nǝ munǝo sǝ mana gir nì na yiki nǝ loasǝkiaban aɓalǝ wun ɗe? Asuno ma'wun mala earce banɓoarnado mǝnana à kǝ munǝ a ɓabum wun ngga, à nǝ̀ yiki nǝia re?

²Wu kǝ earce gir, sǝ wu kum gir nì ɗang, ace mani ka, wu kutia wal-lú; wu sham agir mala aɓwana kǝrkǝr, sǝ wu gandǝ kumia ɗang, ace mani ka wu kutia loasǝban andǝ munǝo ace mǝnana wu nǝ̀ ea arǝ amǝtalea ka. Wu kǝ kum gir mǝnana bum wun earce ka ɗang acemǝnana wu zǝmbǝi Ɓakuli ɗang.

³Andǝa zǝmbǝa mǝnana wu zǝm ngga, wu kum ɗang, acemǝnana wu zǝm nǝ ɓabum mǝɓoarne ɗang. Wu zǝmbǝa acemǝnana ɓǝa pa wun wu nǝ̀ lumsǝna anpel mala ɓamur rǝ wun nǝia ka.

⁴Wun amǝ ɗwanyi do nǝ mǝsǝcau aban Ɓakuli andǝ doɓala! Wu sǝlǝ mbo ama duk gyajam mala ɓanza ka do ɓibura na arǝ Ɓakuli? Ace mani ka ɓwa mǝnana twalo nǝ̀ pa kǝla mala amǝ'ɓealɓikea ka, dumǝna ɓimǝbura mala Ɓakuli.

⁵Mana ɗe wu twali nda ɓa mǝnia yì cau mǝnana Ɓakuli bangŋa aɓa Malǝmce male ama: Bangŋo Mǝfele mǝnana ci a ɓabum sǝm ngga earce ɓǝ̀ sǝm kpapì andǝ ɓe kǝgir ɗang.

⁶Sǝ Ɓakuli ka kǝ pa sǝm ɓwamuru kǝrkǝr. Nda gir mǝnana tsǝa sǝ Malǝmce na ama, “Ɓakuli kǝ ɓinǝ cau mala amǝ'twalɓamuru, sǝ kǝ ɓwamur amǝ'nongsǝmuru.”[12]

⁷Ace mani ka wu nyesǝ mur wun aban Ɓakuli! Wu ɓinǝi Shetan, sǝ yì ka, nǝ̀ ɓanggi ban wun.

⁸Wu sung aban Ɓakuli tu sǝ yì gbal ka nǝ̀ sung aban wun tu. Wu ɗeki pakki agir mǝɓane, wun amǝ'cauɓikea! Wu gilǝki ɗenyicau ma'wun ɓǝ̀ dum nǝ ɓoarnsari, wun aɓwana mǝnana ɓabum wun gaki ka!

⁹Ɓǝ̀ ɓabum wun kìɗìkì, wu ɓua, sǝ wu dukdo tímúrû. Ɓǝ̀ oalo ma'wun nyar a doatu, sǝ ɓǝ̀ banɓoarnado ma'wun nyar a tímúrû.

¹⁰Wu nongsǝmur wun a ɓadǝm Mǝtalabangŋo, sǝ yì ka, nǝ̀ gusǝlǝ wun.

¹¹Wun amǝ'eambǝam, wu nying twal-lullǝarǝ wun. Ɓwa mǝnana kǝ na cau mǝɓane amur ɓi, ko kǝ kiɗiki ɓi ka, ndaban na mǝɓane amur, andǝ ɓashi nggurcau mala Ɓakuli. Sǝ ɓǝa kǝ ɓashi nggurcau ka a ndarǝ ɓinǝ kpata nzongcau mala earcearǝu. Anggo ka a ndarǝ na ama a ndanǝ rǝcandǝa mala ɓashi nggurcau mala Ɓakuli.

¹²Ɓakuli na nǝmurǝì pākiyi nggurcau ka, sǝ kǝ yì nda mǝɓashi, yì nda kǝ ɓwa mǝnana ndanǝ rǝcandǝa mala amsǝban ko kiɗikiban ngga. Sǝ we ka, a nda yana mǝnana a nǝ ɓashi ɓio ka?

¹³Wu kwaki kir wun, wun aɓwana mǝnana wu kǝ na ama, “Yalung ko li ka sǝm nǝ̀ ká a la mǝnia ko la mǝno, sǝm nǝ̀ ngga pak pǝlǝa mwashat abanì. Sǝm nǝ̀ nggali, sǝm nǝ̀ kum boalo kpǝm” ngga.

¹⁴Mana gir nì na a surǝi mǝnana nǝ̀ kumban li ka? Mana nda yilǝmio, mǝnana à nǝ̀ na ama nda a ɓabuo ka? Nda kǝla burambulo mǝnana à nǝ̀ sǝni ado sǝ zuku ka ndǝrmina ka.[13]

¹⁵Cau mǝnana ɓoaro ɓǝ́ wu nǝ̀ na ka nda mǝnana ama, “Ɓǝ̀ Mǝtalabangŋo earǝna, sǝ nying sǝm nǝ yilǝmu ka, sǝm nǝ̀ pak mǝnia ka ko mǝno.”

¹⁶Sǝ ado ka wu kǝ arkikun wun sǝ wu kǝ nggori aɓa ɗenyicau ma'wun. Sǝ mǝno yì arkikun ngga mǝɓane.

¹⁷Ace mani ka, ɓwa mǝnana surǝna rǝgir mǝɓoarne mǝnana ɓoaro ɓǝ̀ pa sǝ pe raka, pangŋǝna cauɓikea.