Read mbula bwazza 1 Bitǝrus 2 Bible Online

1 Bitǝrus 2 - mbula bwazza bible

1 Bitǝrus 2

¹Ace mani ka, wu swár koya ulang ɓealɓikea, andǝ koya ulang kutan mǝɓane, andǝ kúnɓárína, andǝ mwararǝu, andǝ koya ulang naki acau kiɗiki ɓwa.

²Wu pa kǝla abangna-muna, rǝ wun ɓǝ̀ kǝ ɓǝla arǝ nu kiura mǝɓoarnsari mala cau mala Ɓakuli, ace mǝnana ɓǝ̀ wu gulo a ɓalǝi, ɓǝ̀ kyan nǝ wun a amsǝban,

³mǝnana ado “wu ongŋǝna ɓoaro mala Mǝtalabangŋo ka.”[6]

⁴Wu yiu aban Kǝrǝsti, yì tali mǝyilǝmuì, mǝnana aɓwana ginǝki, sǝ Ɓakuli twali acemǝnana abani ka ndanǝ ɓoaro ka.[7]

⁵Sǝ wun ado ka wu ndaka tali mǝyilǝmuì, mǝnana Ɓakuli na arǝ ɓak ɓala male aɓa bangŋo nǝ wun ngga. Aɓa mǝnia yì ɓala ka, wu nǝ̀ duk apǝris mala Ɓakuli ace pà aɓoro mala bangŋo, mǝnana agir'a na abani, nǝ bu Yesu Kǝrǝsti ka.

⁶Aɓa Malǝmce ka à gilǝa ama: “Wu sǝni, ndya ǝn nggǝ tsǝk tali a Siyona ka, tali kwakita kusǝɓa, mǝnana ǝn tarì, sǝ ɓoaro male ka à pà nǝ̀ kani arǝ kǝgir raka. Ɓwa mǝnana kat guli a rǝì ka, pà nǝ̀ kum kǝsǝkya ɗang.”[8]

⁷Sǝ wun mana wu guli a rǝì ka, ɓoaro male aban wun ngga ulang yi pà kàm ɗang. Sǝ aban aɓwana mǝnana à earnǝi raka dumǝna, “Tali mǝnana amǝɓa ginǝki ka, nda yi duk Tali kwakita kusǝɓa ka.”[9]

⁸Sǝ ɗǝm ngga, “Nda tali mǝnana kǝ tsǝk ɓwapǝndǝa à kǝ anndǝ ka, tali mǝnana kǝ cia à kǝ kpa ka.”[10] À kǝ annda, acemǝnana à kpata cau mala Ɓakuli ɗang, sǝ mǝnia ka, nda gir mǝnana Ɓakuli tsǝkia wia ka.

⁹Sǝ wun ngga, wu ndaka ɓwamǝpǝnde mǝnana Ɓakuli tar wun ngga. Wu nda ka amurǝma pǝris, aɓwana ace Ɓakuli, andǝ agirkuma male. Tàr wun ace mǝnana ɓǝ̀ wu hami aɓwana aɓealɓoarna male, yi mǝnana tunǝ wun aɓa pǝndǝa aban yiu aɓa tǎlaban male mǝ pà ndali ka.[11]

¹⁰“Ɗiɗyal ka, wu nda ka kǝ aɓwana ɗang, sǝ adyan ngga, wu dumǝna aɓwana mala Ɓakuli. Ɗiɗyal ka, à sǝn mǝsǝswatǝr ma'wun ɗang, sǝ adyan ngga, à sǝnǝna mǝsǝswatǝr ma'wun.”[12]

¹¹Wun amǝ'eamrǝarǝu mǝnana ǝn earkiyi acea raka, wun mǝnana wu nda ka amǝgya-kutio andǝ abǝri a ɓanza ka, ǝn nggǝ kwarkir wun, wu gapita re wun nǝ anpel mala nggūrǝu, mǝnana à kǝ munǝo arǝ yilǝmi wun ngga.

¹²Do ma'wun aɓalǝ aɓwana mǝnana amǝkwaɗi na raka ɓǝ̀ dum nǝ ɓealɓoarna. Anggo ka ko ɓǝa tsǝka wun cau arǝ wun ama wu ndaka amǝ'ɓealɓikea ka, à nǝ̀ sǝn aturo mǝɓoarne mǝnana wu pakki ka, sǝ à nǝ̀ pè Ɓakuli gulo a pwari mǝnana nǝ̀ yiu a lǝmndǝ rǝì ka.

¹³Ace Mǝtalabangŋo ka, wu pà ɓamur rǝ wun aɓata aɓwana mǝnana à nda amur bunomurǝm aɓa mǝnia yì ɓanza ka. Wu pà ɓamur rǝ wun aban mǝtala-nzali kǝla ɓwa mǝnana nda mur aɓwana kat ka.

¹⁴Wu oaki amǝyalban mǝnana à twalia sǝ tasǝia ace kwarkir amǝ yàl nzongcau, sǝ ɓǝa ɓwangsǝ aɓwana mǝnana à kǝ pak mǝɓoarne ka.

¹⁵Ɓakuli ka, kane male na ama nǝ́ pakki aturo cauɓoarna ma'wun ngga, ɓǝ̀ wu gir kun amǝ'ɗwanyi-sǝle arǝ nakia acau mǝɓane.

¹⁶Wu dukdo kǝla aɓwana mǝnana à panzǝnia à kumǝna ɓamuria ka, sǝ ce wu pǝlǝ panzǝban ma'wun, dupa wun njargula pakki aɓealɓikea ɗang; ɓǝ̀ do ma'wun pa kǝla aguro mala Ɓakuli.

¹⁷Wu pe koyana le ka gulo, sǝ wu earce amǝ'eamrǝarǝu. Wu kǝ ɓanggi Ɓakuli, sǝ wu kǝ pe murǝm gulo.

¹⁸Wun mǝnana wu nda ka amuna-ɓala ka, wu kǝ okia amǝtala-ɓala ma'wun nǝ pagulo. Ɓǝ̀ kǝa do ama, she ɓǝa nda ka aɓwana mǝnana à kǝ pakka wun mǝɓoarne sǝ à nda ɓukɓuk ka ɗang; nggearǝ amǝnana ɓealia ɓiki ka, wu kǝ okia wia.

¹⁹Ɓakuli ka, bumi kǝ pwasǝ arǝ wun, ɓǝ̀ wu pak gir mǝnana wu sǝlǝ ama mǝɓoarne na, sǝ wu kǝ shakminǝu nǝ munyi aɓa mǝɓane mǝnana kǝ kum wun ata pemǝɓoarne ka.

²⁰Ya gir mǝɓoarne na wu nǝ̀ kum a ɓalǝi yi mǝnana ɓǝ̀ wu twal gandǝa nǝ walban mana wu kumo ace mǝɓane mǝnana wu pak ka? Sǝa ma ɓǝ̀ wu kum tanni ace pak mǝɓoarne, sǝ wu twal gandǝa nǝi ka, bum Ɓakuli nǝ̀ pwasǝ arǝ wun.

²¹Nda àkǝ̀ ce mǝnia ka sǝ Ɓakuli tunǝ wun, acemǝnana Kǝrǝsti gbal ka, nu tanni ace wun sǝ nyingga wuni kǝla girkani, ace mǝnana ɓǝ̀ wu twal kusǝì ka.

²²“Yì ka, pak kǝ cauɓikea ɗang, sǝ swarkiban pa a kuni ɗang.”[13]

²³Lang aɓwana sanggì ka, nyesǝî kǝɓwa nǝ sangban ɗang; sǝ lang à pe wi tanni ka, ɓalbura kǝɓwa ama nǝ̀ ɗi tangna a kúnì mǝnana à pakki wi ka ɗang. Tanni male ka, nyinggi Ɓakuli mǝnana kǝ pak ɓashi nǝ mǝsǝcau ka, a bui.[14]

²⁴Yì nǝ nggearǝì ka, twal acauɓikea ma'sǝm a nggūrǝì amur nggun- gangndi, ace mǝnana ɓǝ̀ sǝm wuki cauɓikea, sǝ ɓǝ̀ sǝm duk do ɓealɓoarna. Nǝ́ anpenye male mana à tsǝki wi ka sǝ wu kum twalban rǝkwana.[15]

²⁵Ɗiɗyal ka, wu nda kǝla anzur mǝnana à ɓwarki tanjar ka. Sǝ ado ka, wu nyarǝna aban Yál wun andǝ Mǝtsǝkkir ayilǝmi wun.