Read mbula bwazza 1 Bitǝrus 4 Bible Online

1 Bitǝrus 4 - mbula bwazza bible

1 Bitǝrus 4

¹Sǝ acemǝnana Kǝrǝsti nu tanni aɓa nggūrǝu ka, wu twal ulang mǝno yì ɓealǝu ka, wu gilǝ rǝwun ace tanni kǝla male; acemǝnana ɓwa mana kat tanni a nggūrǝu ka, malǝna nǝ cauɓikea.

²Twal ado ka, cili do yilǝmu male a ɓanza ka pà nǝ̀ duk mala ɓangŋa ata anpel mala nggūrǝu ɗǝm ɗang. Nǝ̀ dukdo mala lumsǝ kani mala Ɓakuli.

³Apwari mǝnana à kutikina ka, à karǝna mala pakkia agir mǝnana amǝɓanza earkiyice pe ka, kǝla ɓiki do-kiɗìkì mala nongginǝ-rǝarǝu, andǝ npel, andǝ nukia agir aban wal-wale, andǝ dapi ace likiali-ɓana andǝ nongginǝ-rǝarǝu, andǝ akpapíkí mala nu mba andǝ loasǝban, andǝ aturo mǝɓike mala peri aban ankúl.

⁴Ado ka, agyajam ma'wun mǝnana ɗiɗyal ka, à kǝ ndali acemǝnana wu kǝ kpapi wunǝia ɗǝm aɓa mǝno yì do-kiɗìkì andǝ ɗwanyi bwalrǝu ka ɗang. Nda gir nî sǝ à kǝ sanggi wun,

⁵sǝ yia ka, à nǝ̀ ngga bǝl kunia aban Ɓakuli mǝnana angŋa dǝmbǝa gilǝna rǝì ace pakki aɓwana mǝnana nǝ yilǝmu andǝ alú ka ɓashi.

⁶Nda gir mǝnana tsǝa sǝ à hamnǝ Cau Mǝɓoarne gbal aban aɓwana mǝnana à wuna ado ka, ace mǝnana yia ka, ɓǝa ɓashia wia kǝla aɓwapǝndǝa aɓa nggūrǝu, sǝ ɓǝa dum nǝ yilǝmu aɓa bangŋo aban Ɓakuli.

⁷Masǝlǝata ɓanza ka, gbashina. Ace mani ka, wu shambum wun, nǝ gandǝrǝu ace pak hiwi.

⁸Gir mǝnana kutibanì kat ka, wu lidǝmbǝa nǝ lǝmndǝì arǝ wun earcearǝu mǝlime, acemǝnana earcearǝu ka, kǝ gír múr acauɓikea pas.[23]

⁹Wu ak rǝarǝ wun arǝ aɓala ma'wun, nggwani ɓǝ̀ kǝa pàk kàm ɗang.

¹⁰Ɓakuli panì koyan ngga ɓoro mala sǝlǝ pak ɓe kǝgir. Ace mani ka, ko yan ngga ɓǝ̀ pakturo nǝ male yi ɓoro ace pakkia acilia ɓwana gbasha, ace mǝnana ɓǝ̀ sǝm duk aɓwana mǝnana Ɓakuli earnǝia arǝ tsǝkir aɓoro male mǝnana à ndakam ɗàngɗáng ngga.

¹¹Ɓǝ̀ we ka, sǝlǝ nacau na à po ka, ne kǝla Ɓakuli na nakiyi cau nǝ kuno ka. Ɓǝ̀ mo yi ɓoro ka ndà pea aɓwana gbasha ka, pè nǝ rǝcandǝa andǝ rǝɓǝla mǝnana Ɓakuli po ka. Anggo ka, gir mǝnana kat a pe ka, nǝ̀ yinǝi Ɓakuli gulo nǝban Yesu Kǝrǝsti. Gulo andǝ rǝcandǝa kat ka amale na, málá male pà kàm ɗang! Amin.

¹²Wun amǝ'eambǝam, wu kǝa ndali arǝ akárǝkiban mǝkwane mǝnana wu kǝ tanni aɓalǝia, kǝla ɓe kǝgir mǝbǝshe na kǝ kum wun ngga ɗang.

¹³A kun mani ka, ɓǝ̀ ban ɓoara wun ama wu ndarǝ nu tanni arǝ agir mǝ'mwashati mǝnana Kǝrǝsti twal gandǝa nǝia ka. Wu pak bumpwasǝa ado ace mǝnana ɓǝ̀ wu kum banɓoarnado mǝgule a pwari mǝnana nǝ̀ nyar nǝi sǝ nǝ̀ lǝmndǝ ɓoarɓwa male ka.

¹⁴Ɓǝ̀ aɓwana kǝ sang wun acemǝnana wu nda ka amǝkpata Kǝrǝsti ka, tsǝkbu na amur wun, acemǝnana Bangŋo mala gulo andǝ mala Ɓakuli sulǝna amur wun.

¹⁵Ɓǝ̀ ɓwa nǝ̀ tanni ata wun ngga, ɓǝ̀ kǝa do ama nda ace wal-lú, ko iun'i, ko altacau, ko oasǝkikun aɓalǝ acau mala aɓwana ɗang.

¹⁶Ɓǝ̀ ɓwa nu tanni acemǝnana yì ka, mala Kǝrǝsti na ka, gir kǝsǝkya na ɗang. Ɓwangsǝ Ɓakuli, acemǝnana à kǝ tunǝo nǝ lullǝi ka.

¹⁷Pwari mala ɓashi karǝna, sǝ ndo nǝ̀ tite nǝ ɓáɓala mala Ɓakuli; sǝ ɓǝ̀ ɓashi tite arǝ sǝm ngga, lang sǝ masǝlǝate nǝ̀ pangnǝ aɓwana mǝnana à mgbikiru nǝ Cau Amsǝban mala Ɓakuli ka?

¹⁸Ɗǝm ngga, “Ɓǝ̀ nda bǝti sǝ amǝ'ɓealɓoarna nǝ̀ au ka, mana nǝ̀ kum amǝ'ɗwanyi kpata Ɓakuli andǝ aɓwana mǝnana amǝ'cauɓikea na ka?”[24]

¹⁹Ace mani ka, ɓǝ̀ wu nda ban tanni aɓa kane mala Ɓakuli ka, wu lidǝmbǝa aɓa pak gir mǝnana nda a nzongŋi ka, sǝ wu nying ayilǝmi wun a ɓabu Ɓakuli mǝnana pusǝ wun ngga, acemǝnana yì ka, pà nǝ̀ pà wun kǝsǝkya ɗang.