Read mbula bwazza 1 Yohana 1 Bible Online

1 Yohana 1 - mbula bwazza bible

1 Yohana 1

¹Sǝm hamba wun cau amur ɓwa mǝnana ndakam a tite ka. Yì nda mǝnana kir sǝm ongŋǝni, sǝ mǝsǝ sǝm sǝnǝni ka. Sǝm pelǝkini sǝ sǝm jeni nǝ abu sǝm. Yì ka, nda Cau mala Yilǝmu.[1]

²Mǝnia yì ɓwa mǝnana nda yilǝmu nǝ nggearǝì ka, yi pusǝrǝi, sǝ sǝm sǝnǝni. Sǝ ado ka sǝm na ce sǝ sǝm hamba wun ama yì ka, nda yilǝmu mǝnana málá male pà kàm raka. Yì ka, à nda a tarǝia andǝ Ɓakuli Tarrû, sǝ yi pusǝrǝi aban sǝm.[2]

³Sǝm nggǝ na wun ce gir mǝnana mǝsǝ sǝm sǝni, sǝ kir sǝm oe ka, ace mǝnana wun gbal ka ɓǝ̀ wu kum dotarǝu nǝ sǝm. Sǝ dotarǝu ma'sǝm ngga, sǝm nda andǝ Ɓakuli Tarrû, andǝ Muni, Yesu Kǝrǝsti.

⁴Sǝm nggǝ gilǝ amǝnia yì agir ka, ace mǝnana ɓǝ̀ banɓoarnado ma'sǝm kat ɓǝ̀ lumsǝo.[3]

⁵Mǝnia ka nda cau mǝnana sǝm oe abani, sǝ sǝm nggǝ hamnǝi aban wun ama: Ɓakuli ka tǎlaban na, sǝ kǝ pǝndǝa pa aɓalǝi ɗang ko bǝti.[4]

⁶Ɓǝ̀ sǝm na ama, sǝm ndanǝ dotarǝu sǝnǝia, sǝ sǝm lidǝmbǝa nǝ gya aɓa pǝndǝa ka, sǝm naná nyir, sǝ sǝm pa aɓa kpata mǝsǝcau ɗang.

⁷Sǝa ma ɓǝ̀ sǝm gya aɓa tǎlaban, kǝla mǝnana yì ka, nda aɓa tǎlaban ngga, lǝmndǝ ama sǝm ndanǝ dotarǝu nǝ rǝarǝ sǝm, sǝ nkila mala Muni Yesu kǝ lak sǝm arǝ acauɓikea kat.[5]

⁸Ɓǝ̀ sǝm nggǝ ne ɓamur rǝ sǝm ama sǝm pànǝ cauɓikea raka, sǝm nda ban swarki ɓamur rǝ sǝm, sǝ mǝsǝcau pà aɓalǝ sǝm ɗang.

⁹Sǝa ma ɓǝ̀ sǝm bang acauɓikea ma'sǝm ngga, yì ka, mǝ'mǝsǝcau na, mǝɓealɓoarna na, mǝnana nǝ twala sǝm ban acauɓikea ma'sǝm, sǝ nǝ̀ lak sǝm aɓalǝ aɓealɓikea ma'sǝm kat ka.

¹⁰[6]Ɓǝ̀ sǝm ne ɓamur rǝ sǝm ama sǝm pàk cauɓikea raka, sǝm nyesǝ Ɓakuli ama yì ka, mǝ'nyir na, sǝ lǝmndǝ ama cau male pà aɓalǝ sǝm ɗang.[7]