Read mbula bwazza 2 Yohana 1 Bible Online

2 Yohana 1 - mbula bwazza bible

2 Yohana 1

¹Mǝnia yì cautera ka, pur nǝ banam, mim jamgula Yohana aban ká aban Nggeaka amuna mǝnana Ɓakuli tárì, andǝ amuni[1], mǝnana ǝn earcea nǝ mǝsǝcau ka. Mǝ nda nǝmurǝam ǝn earkiyi ace wun ngga ɗang, sǝm nda kat sǝnǝ aɓwana mǝnana à surǝna rǝ mǝsǝcau ka.

²Sǝm nggǝ earce wun àkǝ̀ ce mǝsǝcau mǝnana nda aɓalǝ sǝm, sǝ nǝ̀ do ata sǝm, málá male pà kàm raka.

³Ɓǝ̀ ɓwamuru, andǝ mǝsǝswatǝr, andǝ dorǝpwala mala Ɓakuli Tarrû andǝ Yesu Kǝrǝsti, Muna male, do ata sǝm aɓa mǝsǝcau andǝ earcearǝu.

⁴Banɓoaram kǝrkǝr, yi mǝnana ǝn kum aɓea amunio aban do aɓa mǝsǝcau, kǝla mǝnana Ɓakuli Tarrû tsǝka sǝmi ka.

⁵Adyan ngga, we Nggeaka amuna, ǝn nggǝ zǝmbǝo, ɓǝ̀ sǝm earce rǝarǝ sǝm. Mǝnia ka bǝsa nzongcau na ǝn nggǝ gilǝa wun ngga ɗang; nda kǝ nzongcau mǝnana sǝm ndanǝi a tite ka.[2]

⁶Mǝnia yì earcearǝu ǝn nakiyi cau amuri ka ɓālǝi nda mǝnana ama ɓǝ̀ sǝm dumnǝ okiru arǝ anzongcau mala Ɓakuli. Kǝla mǝnana wu ok a tadǝmbe ka, nzongcau nì nda mǝnana ama, wu kǝ gya aɓa earcearǝu.

⁷Ən bang mǝnia ka acemǝnana amǝ swarkiban pas mana à ear ama Yesu Kǝrǝsti yiu aɓa nggūrǝu raka, à kutina a ɓanza. Ɓwa kǝla ulang amǝno ka, mǝswarkiban na sǝ ɓimǝbura mala Kǝrǝsti na.

⁸Wu tsǝkir wun, ace mǝnana wu kǝa ɗwanyi tangnakusǝu turo ma'wun ɗang. Wu ak tangnakusǝ wun ɗǝɗak.

⁹Ɓwa mǝnana yàl-nzong aban ká dǝmbǝa, kpata mǝnia yì kanigir mala Kǝrǝsti raka, surǝ Ɓakuli ɗang. Sǝ ɓwa mǝnana lidǝmbǝa aɓa kanigir mala Kǝrǝsti ka, nda aɓa dotarǝu andǝa Ɓakuli Tarrû andǝ Muni.

¹⁰Ɓǝ̀ kǝɓwa yiu aɓa kpapi ma'wun, sǝ yinǝ mǝnia yì kanigir raka, wu kǝa é arǝ aɓala ma'wun, ko wu cianda ɗang.

¹¹Ɓwa mǝnana kat ak mǝnia yì ɓwa ka, oasǝna bui aɓa turo ɓealɓikea male.

¹²Mǝ ndanǝ acau mǝnana ǝn earce mǝ nǝ na wun ngga, sǝ ǝn earce mǝ nǝ gilǝia nǝ gilǝe ɗang. Acemǝnana mǝ ndanǝ tsǝkɓalǝu mala yiu aban wun tù, sǝ mǝ nǝ yia na wun nǝ nggearǝam, ace mǝnana ɓǝ̀ banɓoarnado ma'sǝm lumsǝo.

¹³Amuna mala mǝ'nggauleo[3] mǝnana Ɓakuli tárì ka, à kǝ makko kun.