Read mbula bwazza Yahuda 1 Bible Online

Yahuda 1 - mbula bwazza bible

Yahuda 1

¹Mǝnia yì cautera ka pur nǝ bu Yahuda,[1] guro mala Yesu Kǝrǝsti, andǝ mǝ'eam Jemis, aban ká aban aɓwana kat mǝnana Ɓakuli Tarrû tunǝia, sǝ earcea, sǝ dumsǝia aɓa yálban mala Yesu Kǝrǝsti ka.

²Mǝsǝswatǝr, andǝ dorǝpwala, andǝ earcearǝu ka ɓǝa aliki amur wun.

³Wun agyajam mem mǝnana ǝn earkiyi acea raka, mǝ ndanǝi a ɓabumam nǝ rǝɓǝla mǝ nǝ gilǝa wun cau amur amsǝban mǝnana sǝm kat sǝm ndanǝi ka. Sǝ ado ka ǝn nggǝ sǝni dumǝnam ama mǝ nǝ gilǝa, mǝ nǝ ɓakɓabum wun ɓǝ̀ wu munǝ ace yál dokwaɗi[2] mana Ɓakuli pa kusǝ mwashat ɓǝrɓǝr ace anza kat, a ɓabu aɓwana male mǝnana tària ka.

⁴Ən bangŋa anggo acemǝnana aɓea aɓwana mana à kǝ ɓanggi Ɓakuli raka, à swarǝ́na zàng, à kutikina aɓalǝ wun. À nda ka ɓwana mǝnana à nyesǝ ɓwamuru mala Ɓakuli ma'sǝm pǝlǝia wia njar pakki agirɓana mala nonggi nǝ rǝarǝu, sǝ à kǝ ginǝki kǝ Múr sǝm, Mǝtala sǝm, Yesu Kǝrǝsti. Ɓashi mǝnana nda amuria ka Ɓakuli angŋa dǝmbǝa gilǝni ɓara-ɓara.[3]

⁵Ən nggǝ earce kasǝ ɓalǝ wun, kat andǝ amani ama wu surǝna rǝ agir mǝnia kat ka, ama, Mǝtalabangŋo amsǝ aɓwana male, pusǝia aɓa nzali Masar, sǝ nǝ̀ nzǝmo ka, yi twalta aɓwana mǝnana à guli a rǝì raka.[4]

⁶Ɗǝm ngga wu sǝlǝna ama amǝturonjar mǝnana à turta gulo malea, à yàllî bancame malea ka, Ɓakuli kurkia nǝ ansolo, kùrban mǝnana málá male pà kàm raka, sǝ girkunia aɓa pǝndǝa, ba Pwari ɓashi mǝgule.

⁷Ɗǝm ngga wu ɗenyi nǝ gir mǝnana kum amǝ Sodom andǝ Gomora, andǝ acili ala mǝnana abania tu, mǝnana à kuti aɓa do kìɗìkì mala nonggi nǝ rǝarǝu andǝ pakki agir suno nongnǝban mǝnana kyanggi do mǝɓoarne ka, kǝla mana amǝturonjar mǝno pe ka. Ɓakuli sok bǝsa amuria, ace mǝnana ɓǝ̀ duk girkani aban aɓwana kat, mala pibǝsa mǝnana malkiyi raka.[5]

⁸Anggo gbal, amǝnia yì aɓwana à twali ɓamuria ama à kǝ sǝnsǝna aɓa bangŋo ka, à kǝ pǝndǝki nggūrǝia nǝ cauɓikea nonggi nǝ rǝarǝia; à burice yalban mala Ɓakuli amuria, sǝ à nyesǝ amǝturonjar mǝɓoarɓwe mala Ɓakuli ɓà.

⁹Ko nggearǝ Makel, yì gbani mala amǝturonjar mala Ɓakuli ka, twalki kǝ cau arǝ ne Shetan kǝ mǝɓane aban nunggirǝu amur lú Musa ɗang. Ne wi nǝ na ama: “Mǝtalabangŋo Ɓakuli ɓǝ̀ peauó!”[6]

¹⁰Sǝ amǝnia yì aɓwana ka, à kǝ bangcau nǝ ɓǝsǝkiban amur agir mǝnana à bwaltea raka. Sǝ agir mǝnana à bwaltea nǝ gyata oe malea a rǝǔ, andǝ ɗwanyi ɗenyicau kǝla agirkusǝu ka, à ndaka kǝ gir mǝnana à kǝ kiɗikia ka.

¹¹Gir'murmwana na amuria! À twalǝna kusǝ Kayinu. Rufi malea ata boalo tsǝngŋǝnia à kpana aɓa ɓwarkio mala Balaam. À mgbikiru kǝla Kora, sǝ à kpana kìɗìkea kǝla yì.[7]

¹²Amǝnia yì aɓwana ka amǝ'kiɗiki agir na aɓalǝ wun aban kpapi likwar mala dotarǝu ma'wun, sǝ à panǝ ɓangciu ko kǝsǝkya ɗang. À nda kǝla ayalgir mǝnana à karǝ bumia à ɗenyi nǝi ka. À nda kǝla pǝrɓang mǝnana gung twali kǝ nya mbulo raka. À nda kǝla anggun mǝnana ko nǝ kún gbangŋan ngga à kǝ pa ɓǝlea raka, anggun mǝnana à ukkinia andǝ anlerǝia sǝ à wuna mak ka.

¹³À nda kǝla nggeamur mǝnana gung kǝ songnǝki nǝ burabura, à kǝ gbanggǝri agir kǝsǝkya malea kǝla pupwalo. À nda kǝla anlero mǝnana à cam aban mǝ'mwashati raka, sǝ ban mǝnana Ɓakuli ci acea ka nda nggea pǝndǝa mǝcikciki mǝnana málá male pà kàm raka.

¹⁴Sǝ Inok, mǝnana nda tongno-nong-ɓaria kau, twal a ɓǝlban mala Adamu ka,[8] ɓangnǝ-ɓangna amur a'ulang amǝnia yia aɓwana ka. Bangŋa ama: “Wu sǝni, Mǝtalabangŋo nia kǝ yiu andǝ amǝturonjar male amǝfele mǝnana à pà nǝ̀ gandǝ ɓalǝia raka,

¹⁵ace yinǝ ɓashi amur ɓwapǝndǝa kat. Nǝ̀ yia mak aɓwana kat mǝnana à surǝ Ɓakuli raka nǝ ɓashi, ace agir mǝnana kat à pea aɓa do malea mala ɗwanyi surǝ Ɓakuli ka, andǝ acau mǝɓike mǝnana amǝ'cauɓikea, amǝ ɗwanyi surǝ Ɓakuli ne amuri ka.”[9]

¹⁶Amǝnia yì aɓwana ka, amǝ sǝn ɓwarkio mala aɓwana na andǝ amǝ'nggwani, à kǝ pakki agir mǝɓike mǝnana kat à earkiyice ka. Yia ka, amǝ nggori na, andǝ amǝ'swarban nǝ kunɓoarna ace kum gir mǝnana à earkiyice ka, a bu aɓwana.

¹⁷Sǝ wun, agyajam mem ngga, wu ɗenyi nǝ agir mǝnana amǝ'mishan mala Mǝtala sǝm Yesu Kǝrǝsti bang ɗiɗyal ama à nǝ̀ yia kumban ngga.

¹⁸À bangŋǝna wun ama: “A masǝlǝata apwari ka, amǝ oalban arǝ njar dokwaɗi nǝ̀ yia puro, aɓwana mǝnana ɓa do malea ka nda kpata anpel malea mala ɗwanyi surǝ Ɓakuli.”

¹⁹Amǝnia yì aɓwana ka, à nda mǝnana à kǝ yinǝ gakia aɓalǝ wun ngga. À kǝ gya ata anpel mala nggūrǝia, sǝ à panǝ Bangŋo mala Ɓakuli ɗang.

²⁰Sǝ wun agyajam mem ngga, wu lidǝmbǝa nǝ ɓak rǝarǝ wun aɓa dokwaɗi[10] ma'wun nggea mǝfele. Wu kǝ pak hiwi aɓa rǝcandǝa mala Bangŋo Mǝfele.

²¹Wu bwal ɓamur rǝ wun aɓa earcearǝu mala Ɓakuli, yi mǝnana wu nda arǝ kundǝ mǝsǝswatǝr mala Mǝtala sǝm Yesu Kǝrǝsti, mǝnana nǝ̀ yinǝ wun aɓa yilǝmu mana málá male pà kàm raka.

²²Wu lǝmndǝ mǝsǝswatǝr, wu bwali aɓwana mǝnana paɓamuru malea cam raka.

²³Wu amsǝ aɓea aɓwana nǝ faban aɓa bǝsa. Sǝ aɓea aɓwana ka, wu sǝn mǝsǝswatǝr malea nǝ tsǝkiru, wu ɓinǝki ce gir mǝnana kat a rǝia nǝ̀ kánǝ wun a pǝndǝkea nǝ npel mala nggūrǝu ka.[11]

²⁴Adyan ngga, gulo ka ɓǝa pe Ɓakuli, mǝnana nǝ̀ gandǝ bwal wun, wu kǝa kpa raka, sǝ nǝ̀ yinǝ wun a ɓadǝmbǝi, mana lumsǝ nǝ ɓoarɓwa ka, nǝ banɓoarnado mǝgule andǝ ɗwanyi cau a rǝǔ.

²⁵Gulo kat ka, ɓǝa pe wi, yì Ɓakuli mwashat, Mǝ'amsǝ sǝm nǝ bu Yesu Kǝrǝsti Mǝtala sǝm. Nggearǝ ɓoarɓwa, andǝ gulo, andǝ rǝcandǝa, andǝ murǝm ngga, male na ɓara-ɓara, arǝ anza mǝnana à kutikina ka, ba adyan, andǝ dǝmbǝa. Amin.