Read mbula bwazza Sǝna 16 Bible Online

Sǝna 16 - mbula bwazza bible

Sǝna 16

¹Pǝlǝa ǝn ok giu mǝcande pur nǝ ɓa Ndàmǝgule, aban banggi amǝturonjar mǝno tongno-nong-ɓari ka ama, “Wu kyane, wu kya solǝki bumlulla mǝgule mala Ɓakuli, mǝnana aɓalǝ atasau tongno-nong-ɓari ka, amur ɓanza!”

²Nda mǝturonjar mǝdǝmbe puro wario kya solǝ gir ɓa tasau male amur ɓanza, kara anggea npenye-gula amǝɓike andǝ amǝkwanbanì purkio arǝ aɓwana mǝnana à ndanǝ nyoulǝa mala nyamɓikea, sǝ à peri aban ɓǝ̀nzál male ka.[119]

³Ɓárià mǝturonjar solǝ gir ɓa tasau male amur nggeamur, kara nggeamur pǝlǝ nkila, kǝla nkila lú ɓwa, sǝ agir kat mǝnana nǝ yilǝmu aɓa nggeamur ka, à wukio.[120]

⁴Tàruia mǝturonjar solǝ gir ɓa tasau male amur anggeasala andǝ amgbeaɗe mùr, sǝ à pǝlǝ nkila.

⁵Ən ok mǝturonjar mǝnana tsǝkiyikir amúr ka bangŋa ama: “A pangŋǝna pepe aɓa mǝnia yi aɓashi ka, we Mǝfele mǝnana a ndakam ado sǝ a ndakam ɗiɗyal ka!

⁶Yia ka, à sukki nkila mala aɓwana mo amǝfele, andǝ mala amǝ'ɓangna mo. Ace mani ka, a pania wia nkila ɓǝa nu. À nda rǝ kum tangnakusǝia arǝ gir mǝnana karǝ a rǝia ka.”[121]

⁷Sǝ ǝn ok giu pur nǝ ban gyangŋan ɗarǝa na ama: E, Mǝtalabangŋo Ɓakuli mǝnana a Karmur Gulo Kat ka, aɓashi mo ka, amǝ'mǝsǝcau nì na, sǝ à nda pepe![122]

⁸Inea mǝturonjar solǝ gir ɓa tasau male amur pwari, sǝ pwari tita pisǝki aɓwana nǝ bǝsa.

⁹Ace ɓiki pisǝkiban mala pipwari amur aɓwana ka, à kutia naki acau mǝɓane arǝ lullǝ Ɓakuli mǝnana ndanǝ rǝcandǝa amur amǝnia yì agir yinǝ tanni twal la ka. À gine à pà nǝ̀ pwanzali à nǝ̀ pǝlǝ nzǝmia arǝ acauɓikea malea, à nǝ̀ pe Ɓakuli gulo ɗang.

¹⁰Tongnia mǝturonjar solǝ gir ɓa tasau male amur bunomurǝm mala nyamɓikea. Kara pǝndǝa gir ɓamǝsǝ domurǝm male, sǝ aɓwana mǝnana aɓata domurǝm male ka, à nǝmnggi minǝia ace kwanban mǝnana sulǝo amuria ka.[123]

¹¹À kutia naki acau ɓǝsǝkiban arǝ Ɓakuli, yì murǝm kuli, àtàcau mala kwanban andǝ anpenye mǝnana kumia ka. Sǝ à ginǝ pwanzali amur agir mǝɓane mǝnana à pakkia ka.

¹²Tongno-nong-mwashatia mǝturonjar solǝ gir ɓa tasau male amur nggeasala mǝgule mǝnana à tunǝki ama Yiufǝretis ka. Sǝ mur mana aɓa mǝnia yì nggeasala ka, twalo ime ace mǝnana amurǝma andǝ amǝ'lwa malea, amǝnana à nǝ̀ yiu nǝ njartakuli ka, ɓǝa kum njar kutio.[124]

¹³Pǝlǝa ǝn sǝn abangŋo mǝɓane tārú, amǝnana à nda kǝla anɗwalung ngga. Mwashat ka, puro a ɓakun dǝragon, ɓe ka puro a ɓakun nyamɓikea, sǝ ɓe man ngga puro a ɓakun mǝɓangna mǝ'nyir nì.[125]

¹⁴À ndaka abangŋo mala akukwar mǝnana à kǝ pakki agir-ndali ka. À purkio aban o aban amurǝma mala ɓanza kat, à nǝ̀ ngga rambǝia ace lwa arǝ Mǝtalabangŋo, a Pwari Mǝgule mala Ɓakuli mǝnana Karban Kat ka.

¹⁵“Wu sǝni, mǝ nǝ yiu aɓa yasǝlǝban kǝla mǝn'i. Tsǝkbu mala Ɓakuli na amur ɓwa mǝnana kat kǝ dum nǝ mǝsǝì aɓa kundǝmuram, sǝ kǝ bwal agir-nggurǝu male pepe, ace mǝnana ɓǝ̀ kǝa ging nǝ ɓate, ɓǝ̀ kum kǝsǝkya a mǝsǝ aɓwana raka!”[126]

¹⁶Pǝlǝa abangŋo mǝɓane mǝno ramnggi amurǝma andǝ amǝ'lwa malea abanɓwáná aban mǝnana à tunǝki nǝ kun Ibǝru ama Armagedon ngga.[127]

¹⁷Sǝ tongno-nong-ɓaria mǝturonjar solǝ gir ɓa tasau male aɓa gung. Nggea giu mǝcande pur nǝ ban bunomurǝm aɓa Ndàmǝgule, bangŋa ama, “Malǝna!”[128]

¹⁸Kara tǎlaban liki'nzama, mgbarangce sàkkya, agiu akya, sǝ nzali dǝurǝki kǝrkǝr. Ulang mǝno yì dǝurǝkya mala nzali ka, malaká kumban àkǝ̀ fara aɓa do mala ɓwapǝndǝa a ɓanza ɗang.[129]

¹⁹Nggeala mǝgule Babila ka, gau arǝ abanì tārú, sǝ anggea-là mala anzali ɓanza pas ka, à kpakia, à sukki amur rǝarǝia. Nda sǝ Ɓakuli ɗenyi nǝ Babila Mǝgule, sǝ ci ɓǝ̀ nu aɓa kwar mǝnana à lumsǝì nǝ mùr-anap mala bumlulla mǝgule male aɓa ukkio male ka.

²⁰Ko ya luran ngga, ndǝrmi, sǝ ankono kat ka, à bǝbbǝri.

²¹Amǝsǝtali-mbulo mǝgulke, mǝnana dǝmbǝrya malea na kǝla anggea-taligo ka, à ara a kuli aban yiu amur aɓwana a nzali. Aɓwana kutia bang cau mǝɓane arǝ Ɓakuli ata cau mala mǝnia yì gir yinǝ tanni twal la nǝ mǝsǝtali-mbulo ka, acemǝnana gir nî ɓiki kǝrkǝr.[130]