Read mbula bwazza Sǝna 21 Bible Online

Sǝna 21 - mbula bwazza bible

Sǝna 21

¹Pǝlǝa ǝn sǝn kuli mǝbǝshe andǝ nzali mǝbǝshe. Kuli mǝnana ɗiɗyal andǝ nzali mǝnana ɗiɗyal ka, à ndǝrmina, sǝ nggeamur gbal ka pà kàm ɗǝm ɗang.[169]

²Sǝ ǝn sǝn Nggeala Mǝfele, yì bǝsa Urǝshalima. Ən sǝni puro aban Ɓakuli a kuli, sǝ kǝ sulǝo aban yiu. À gilǝkini pepe kǝla manfela mǝnana à gilǝkì wi rǝì aɓa ɓoarnsari ace ká aban burri ka.[170]

³Ən ok ɓe giu mǝgule pur nǝban bunomurǝm mala Ɓakuli, na cau ama: Wu sǝni, ban-do mala Ɓakuli adyan ngga, nda aban aɓwana male! Yì ka, nǝ̀ do andǝia, sǝ yia ka, à nǝ̀ duk aɓwana male. Ɓakuli nǝ nggearǝì nǝ̀ do atea.[171]

⁴Nǝ̀ esǝki mǝrǝm kat a mǝsǝia, sǝ lú, andǝ bumkiɗikea, andǝ ɓua andǝ kwanban ngga, à pà nǝ̀ pàk kàm ɗǝm ɗang. Amǝnia yì agir mǝnana ɗiɗyal ka, à umna ɗǝɗak.[172]

⁵Sǝ ɓwa mǝno do amur bunomurǝm ngga bangŋa ama: Wu sǝni, mǝ ndo mǝ nǝ nyesǝ agir kat à nǝ̀ pǝlǝ bǝshe! Pǝlǝa na ɗǝm ama: Gilǝ cau mǝnia ka, acemǝnana cau na, à nǝ̀ earnǝi, sǝ mǝsǝcau na.[173]

⁶Ɗǝm ngga nam ama: Ko man kat ka à malǝna pě. Mǝ nda Tite, sǝ mǝ nda Masǝlǝate[174]. Ɓwa mǝnana kat mǝsamur wali ka, mǝ nǝ pe wi mùr ɓǝ̀ nu, aɓa mgbeaɗe mur mala yilǝmu, pà nǝ̀ mbwe kǝgir ɗang.[175]

⁷Ɓwa mǝnana kat limurǝm ngga, mǝ nǝ pe wi liɓala mala amǝnia yì agir ka, sǝ yì ka, nǝ̀ duk munem sǝ mǝ nǝ duk Ɓakuli male.[176]

⁸Sǝ mǝnia ka nda gir mǝnana nǝ̀ kum aɓwana mǝnana amǝ'ɓangciu na, andǝ amǝ pakki agir monzǝo[177], andǝ amǝ ɗwanyi earnǝ mim, andǝ amǝ pakki agirɓana, andǝ amǝ walki alú, andǝ amǝ do kiɗikì mala nongginǝ-rǝarǝu na ka. Yia kat andǝ amǝ peri aban ankúl andǝ alú, andǝ aɓwana kat mǝnana amǝ na'nyir na ka, à nǝ̀ ramtea aɓa garang mala bǝsa mǝnana kǝ li nǝ atali ear-bǝsa ka. Mǝnia ka, nda ɓaria lú.[178]

⁹Mwashat ata amǝturonjar mala Ɓakuli, yia mǝno tongno-nong-ɓari, mǝnana à bwal atasau mana à lumsǝkia nǝ masǝlǝata agir yinǝ tanni twal la ka, yiu abanam. Nam ama, “Yiu, mǝ nǝ lǝmndǝo Mālá Mǝgam, yì Manfela male.”[179]

¹⁰Pǝlǝa twalam aɓa rǝcandǝa mala bangŋo, um nǝ mim amúr ɓe nkono mǝgule mǝnana nggea mǝdāre na ka, sǝ lǝmndǝam Nggeala Mǝfele, Urǝshalima. Ən sǝni puro aban Ɓakuli a kuli, sǝ kǝ sulǝo aban yiu.[180]

¹¹Ɓoarɓwa mala Ɓakuli ci kǝ tanzama tyal-tyal. Esǝke ɓoarnsari gǝraɗau kǝla kǝrstal. Gilǝkea male pepe kǝ twal mǝsǝu pǝlilip kǝla tali'gǝna, kǝla jaspa.

¹²Sheran mǝnana kàrǝì nggeala ka, dārya sǝ tangŋa, sǝ ndanǝ akunɓala a rǝì lum-nong-ɓari. À tamsǝ amǝturonjar lum-nong-ɓari à kǝ yal akunɓala mala nggeala. Amur koya kunɓala mǝnana arǝ sheran ngga, à gilǝ mwashat ata lullǝ atau lum-nong-ɓari mala amǝ Isǝrayila.[181]

¹³À tsǝkia akunɓala tāru-tāru arǝ abuban ine mala nggeala; tārú nǝ njartakuli, tārú nǝ njarnza, tārú nǝ njartamur, sǝ tārú nǝ njarnzali.

¹⁴Yì sheran mala nggeala ka, à kwakite amur akusǝɓa lum-nong-ɓari mǝnana à nongsǝia amur rǝarǝia ka. Arǝ koya kusǝɓa ka à gilǝ lullǝ mwashat ata amǝ'mishan lum-nong-ɓari mala Mǝgam.

¹⁵Mǝturonjar mǝnana bangcau nǝ mim ngga ndanǝ mǝmunagara kārǝkigir a bui, a pe nǝ zǝnariya. Nǝ̀ ngga kārǝkina nggeala nǝi andǝ akunɓala andǝ asheran male.[182]

¹⁶Lang mǝturonjar kārǝki nggeala nǝ munagara kārǝkigir male ka, kumi ka sauwa male na mwashat andǝ tangŋa male. Yale dārya male na gbal mwashat andǝ sauwa andǝ tangŋa male, sǝ ko mǝ ye atea kārǝki ka, kilomita á-ɓari nǝ gbǝman-ine[183] na.

¹⁷Ɗǝm ngga kārǝki dārya mala sheran mala nggeala, sǝ kumi ka nda mita lumi-tongno-nong-mwashat [60 m]. Mǝturonjar kpata kārǝkigir mǝnana ɓwapǝndǝa kasǝ ka.

¹⁸Sheran mala nggeala ka à ɓè nǝ atali mǝɓoarne, atali jaspa. Sǝ nggeala ka, à ɓè nǝ zǝnariya kat, zǝnariya mǝnana à zurǝì nǝ kǝgir raka, ɓālǝi ɓoarnsari gǝraɗau kǝla gǝlas.

¹⁹Sheran mala nggeala ka, à kwakite amur akusǝɓa mala atali mǝɓoarne ɗàngɗáng lum-nong-ɓari. Kusǝɓa mǝnana à ci a tadǝmbe ka, tali jaspa na. Ɓaria kusǝɓa mǝnana à nongsǝi amur mǝno ka, safir na. Tāruia ka, aget na. Inea ka emeral na.[184]

²⁰Tongnoia ka, onis na. Tongno-nong-mwashatia ka, karnelia na. Tongno-nong-ɓaria ka, kǝrisolat na. Tongno-nong-tāruia ka, beril na. Tongno-nong-inea ka, tofas na. Lumia ka, kǝrisopǝras na. Lum-nong-mwashatia ka, jasinta na. Sǝ à masǝlǝte nǝ lum-nong-ɓaria kusǝɓa mǝnana à nongsǝi amur aɓi ka, nǝ tali amitis.

²¹Akunɓala lum-nong-ɓari mala nggeala ka, à gilǝkia nǝ sala-ɓá-nkombo-nggeamur; ko ya kunɓala ka, nǝ male yì ulangyi sala-ɓá-nkombo mǝnana à pe nǝi ka. Sǝ njar mǝgule mǝnana aɓa nggeala ka, à pe nǝ zǝnariya mǝnana ɓālǝi nong tyal-tyal nǝ ɓoarnsari kǝla gǝlas.

²²Ən sǝn ma kǝ ndàperi aɓa yì nggeala ɗang, acemǝnana Mǝtalabangŋo Ɓakuli mǝnana Karmur Gulo kat andǝ Mǝgam ngga, à nda ka ndàperi male.

²³Sǝ yì nggeala ka, pà nǝ̀ na ce pwari ko zongŋo ɓǝa tǎ amuri ɗang, acemǝnana tǎ mala ɓoarɓwa mala Ɓakuli ka, kǝ pa tǎlaban a ɓalǝi, sǝ Mǝgam ngga nda tǎlaban male.[185]

²⁴Aɓwana mala anzali nǝ̀ gya aɓa tǎlaban male, sǝ amurǝma mala ɓanza nǝ̀ yiu nǝ agulo malea a ɓalǝi.

²⁵À pà nǝ̀ gìr akunɓala mala nggeala ɗang ko aya pwari ka, acemǝnana akano ka, dù pà kàm ɗang.[186]

²⁶Sǝ ɓoarɓwa andǝ gulo mala anzali ɓanza kat ka, à nǝ̀ yinǝia a ɓalǝi.

²⁷À pà nǝ̀ eare ɓe kǝgir ɓeami ɓǝ̀ kuti kam ɗang. Sǝ kǝɓwa pà kàm gbal mǝnana mǝ pakki agir kǝsǝkya na, ko mǝ ɗwanyi came amur mǝsǝcau na ka, nǝ̀ kuti kano ɗang; she kǝ aɓwana mǝnana lullǝia na kam à gilǝnia aɓa Malǝmce Yilǝmu[187] mala Mǝgam ngga.[188]