Read mbula bwazza Sǝna 22 Bible Online

Sǝna 22 - mbula bwazza bible

Sǝna 22

¹Ɗǝm ngga mǝturonjar lǝmndǝam nggeasala mala mùr pa yilǝmu. Mur nî kwar gǝraɗau kǝla kǝrstal. Kǝ ɓun aban bunomurǝm mala Ɓakuli andǝ mala Mǝgam sǝ kǝ ɓangŋa.

²Ɓangŋa kǝ kuti nǝ ɓaɓalǝu mala njar mǝgule mala ɓa nggeala. A koya nkaring mala kun múr mala nggeasala ka, nggun na kam mǝnana kǝ pa yilǝmu ka. Nggunî kǝ pusǝ a'ulang aɓǝle ɗàngɗáng lum-nong-ɓari aɓa pǝlǝa mwashat; koya zongŋo ka, kǝ pusǝ ulang male yì ɓǝle. Ambu nggunì ka ɓuri na ace wal kwano mala anzali mala aɓwapǝndǝa.[189]

³Suban ngga pà nǝ̀ pàk kàm ɗǝm amur kǝgir aɓa mǝno yì nggeala ka ɗang. Ɓakuli nǝ nggearǝì, andǝ Mǝgam ngga, à nǝ̀ do a ɓalǝi amur abuno-murǝm malea, sǝ aɓwana male nǝ̀ nggǝ peri abani.[190]

⁴À nǝ̀ sǝn ɓamǝsǝi sǝ lullǝi ka à nǝ̀ gilǝì a kundǝmbǝia.[191]

⁵Dù pà nǝ̀ nyare nǝ̀ pak ɗǝm ɗang. À pà nǝ̀ earce pitǝla ko pwari ace pa tǎlaban ɗǝm ɗang, acemǝnana Mǝtalabangŋo Ɓakuli ka, nda tǎlaban, nǝ̀ tǎ amuria. Sǝ à nǝ̀ duk amurǝma masǝlǝate pà kàm ɗang.

⁶Pǝlǝa mǝturonjar banggam ama: Amǝnia yì acau ka mǝsǝcau na sǝ à nǝ̀ earnǝia. Mǝtalabangŋo Ɓakuli mǝnana ginggi nǝ bangŋo mala amǝ'ɓangna male ka, nda tasǝ mǝturonjar male ɓǝ̀ yì banggi aguro male, agir mǝnana à nǝ̀ yia pur púp banì pà nǝ̀ sau raka.

⁷Yesu kǝ na ama, “Wu sǝni, mǝ ndya ǝn nggǝ yiu adyan tu ka! Aɓwana mǝnana à kǝ kpata acau ɓangna mǝnana à gilǝia aɓa mǝnia yì malǝmce ka, à ndanǝ tsǝkbu!”

⁸Mim Yohana, mǝ nda mǝnana ǝn ó sǝ ǝn sǝn amǝnia yì agir ka. Lang ǝn ongŋǝnia sǝ ǝn sǝnǝnia ka, kara ǝn kpa a nzali mǝ nǝ peri a kusǝ mǝturonjar mala Ɓakuli mǝnana lǝmndǝam mia ka.

⁹Sǝ yì ka, nam ama: Awo, kǝa peri abanam ɗang. Mǝ nda guro mala Ɓakuli, kǝla we wunǝ amǝ'eambǝo, amǝ'ɓangna mala Ɓakuli, andǝ aɓwana kat mǝnana à kǝ kpata gir mǝnana à gilǝì aɓa mǝnia yì malǝmce ka. Peri aban Ɓakuli nǝmurǝì ɓǝrɓǝr!

¹⁰Pǝlǝa kwarkiram ama: Kǝa na ama a nǝ sǝmbǝrǝ ce acau ɓangna mǝnana aɓa malǝmce mǝnia ka ɗang, acemǝnana pwari gbashina tu mana amǝnia yia agir kat ka à nǝ̀ kumban ngga.

¹¹Ɓwa mǝnana kat kǝ pak gir mǝɓane ka, ɓǝ̀ lidǝmbǝa aɓa pakkiagir mǝɓane. Ɓwa mǝnana kat mǝɓealɓikea na ka, ɓǝ̀ lidǝmbǝa aɓa ɓealɓikea male. Ɓwa mǝnana mǝɓealɓoarna na ka, ɓǝ̀ lidǝmbǝa aɓa do-ɓealɓoarna. Ɓwa mǝnana tàr ɓamuri ɓǝ̀ duk mala Ɓakuli ka, ɓǝ̀ lidǝmbǝa aɓa do tàr ɓamuru aban Ɓakuli.[192]

¹²Yesu kǝ na ama, “Wu sǝni, mǝ ndya ǝn nggǝ yiu adyan tu ka! Atangnakusǝu mem na a buam, mǝ nǝ yia pe koya ɓwa ka tangnakusǝi mala gir mǝnana karǝ arǝ turo mǝnana pak ka.[193]

¹³Mǝ nda Alfa andǝ Omega, Mǝdǝmbǝa andǝ Mǝtankwang, Tite andǝ Masǝlǝate.”[194]

¹⁴Aɓwana mǝnana à kǝ lákkí anggea-daura malea, à do aɓa ɓoarnsari mala ɓabum ngga, à ndanǝ tsǝkbu. Ɓakuli nǝ̀ nyinggia wia ban arǝ kunɓala ɓǝa kutio aɓa yì nggeala sǝ ɓǝa li ɓǝlanggun mala nggun yilǝmu.

¹⁵A nza nǝ nggeala ka à ndaka amǝ do kiɗìkì kǝla anvwa, andǝ amǝ pakkia gir monzǝo, andǝ amǝ pak cauɓikea nonggi nǝ rǝarǝu, andǝ amǝ walki-alú, andǝ amǝ peri aban ankúl andǝ alú, andǝ aɓwana kat mǝnana à kǝ earce pak turo nyir, sǝ amǝ swarkiban na ka.

¹⁶Mim Yesu, ǝn túr mǝturonjar mem ɓǝ̀ bangga wun amǝnia yì agir ka ace a'ikǝlisiya. Mǝ nda Mǝkà Murǝm Dauda, ǝn pur a tau male. Mǝ nda nlero dǝmbari mǝ tàne.[195]

¹⁷Bangŋo mala Ɓakuli andǝ Manfela, à kǝ na ama, “Yiu!” Ɓwa mǝnana kat ok mǝnia yì cau ka, ɓǝ̀ na ama “Yiu!” Ɓǝ̀ mǝsamur wal kǝɓwa ka, ɓǝ̀ yiu! Ɓwa mǝnana earce ka, ɓǝ̀ yi nu mur yilǝmu ɓà.[196]

¹⁸Ən nggǝ nunkir koya ɓwa na kat kǝ ok acau ɓangna mǝnana à gilǝia aɓa malǝmce mǝnia ka: Ɓǝ̀ kǝɓwa tsǝk ɓe amur agir mǝnana à gilǝe akani ka, Ɓakuli nǝ̀ tsǝki wi ɓe amur agir yinǝ tanni twal la mǝnana à kanicea aɓa mǝnia yì malǝmce ka.

¹⁹Sǝ ɓǝ̀ kǝɓwa amsǝ ɓe kǝgir aɓalǝ acau mala malǝmce ɓangna mǝnia ka, Ɓakuli nǝ̀ amsǝi wi kāmbe male. Pà nǝ̀ kumo nǝ̀ li ɓǝlanggun yilǝmu ɗang, sǝ pà nǝ̀ kutio aɓa nggeala mǝfele mǝnana à kaniki ce aɓa mǝnia yì malǝmce ka ɗang.

²⁰Yì, yì ɓwa mǝnana kǝ bangŋa ama amǝnia yì agir ka mǝsǝcau na ka, kǝ na ama, “E, mǝ ndya ǝn nggǝ yiu adyan tu ka!” “Amin! Yiu, Mǝtalabangŋo Yesu!”

²¹Ɓǝ̀ ɓwamuru mala Mǝtalabangŋo Yesu do ata aɓwana mala Ɓakuli.[197]